¹ Dabidi na bantu bakwe bafikile ku Sikilagi mu bushiku bwalenga shitatu. Nomba ninshi abena Amaleki nabesa sansa mu matololo ya Negebu elyo na mu Sikilagi. Basansa Sikilagi elyo baoca no musumba. ² Kabili basenda na bankole abanakashi na bonse abali mu mushi, bonse abaice na bakote. Tabaipeyepo nangu umo, lelo babasendafye ilyo baleya uko balungeme. ³ Dabidi na bantu bakwe baishile ku Sikilagi basanga umusumba naocewa ku mulilo. Elyo abakashi babo, abana babo abaume elyo na bakashana bonse nababasenda muli bunkole. ⁴ Kanshi Davidi na bantu bakwe balalooshafye apakalamba mpaka na maka yakuloosha yapwa. ⁵ 5Na bakashi bonse babili abakwa Dabidi balibasendele muli bunkole, Ainoamu wa ku Yesireli elyo na Abigaili, mukamfwilwa uwali muka Nabali wa ku Kameli. ⁶ Dabidi aumfwile ubulanda nganshi pantu abantu balalanda pakumulasaula amabwe. Cila muntu ali uwakalipwa pa mulandu wa bana babo abaume elyo na bakashana. Lelo Dabidi asangile amaka muli Yawe Lesa wakwe. ⁷ Elyo Davidi aebele Abiyata shimapepo mwana Aimeleki ati, “Shindetelako icakufwala ca pa mulu wa mwingila efodi.” Abiyata nao amuletela. ⁸ Kabili Davidi aipusha Yawe ati, “Bushe nkonke mukufwaya aba abatapile ifyuma? Bushe ndebasanga?” Yawe amweba ati, “Bakonke uye bafwaya. Icine cine ulebasanga nokuya lubula abantu bonse.” ⁹ Dabidi elyo na bantu imyanda mutanda ali nabo bafikile ku kamana ka Beso, pa ncende apo baishile shapo bamo. ¹⁰ Pantu imyanda ibili iya bantu balinakile sana bafilwa no kwabuka umumana. Lelo Dabidi na bantu imyanda ine batwalilila ukuya balebafwaya. ¹¹ Awe basanga umwina Egupto umo mwibala bamuleta kuli Davidi. Bamupeelako amenshi yakunwa ne fyakulya. ¹² Bamupeelako akacipande ka mukate wa mukunyu uwakamwa, elyo ne mikate ibili iya fisansangu fya myangashi iyauma. Awe alya elyo akwata amaka, pantu talilepo kantu nelyo kamo nangufye kunwa amenshi pa nshiku shitatu, akasuba no bushiku. ¹³ Elyo Davidi atampa ukumwipusha ati, “Bushe uli muntu wakwa nani? Kabili ni kwi wafuma?” Nao atile, “Ine ndi mwina Egupto, umusha wa mwina Amaleki. Shikulu nao alinsha pantu nali umulwele pa nshiku shitatu ishapita. ¹⁴ Twasanshile aba mu matololo ya Negebu wa ku Kereti elyo ne calo ca bena Yuda na Negebu wakwa Kalebu. Elyo twasha twaoca na Sikilagi.” ¹⁵ Dabidi amwipusha ati, “Bushe kuti wantungulula ku mpuka iyo iyaishile sansa?” Ayasuka ati, “Icikulu ulape kuli ine pa cinso cakwa Lesa ukuti tauli nakunjipaya nangu ukumpeela mu maboko yakwa shikulu elyo lyena nalakutwala uko bali.” ¹⁶ Elyo atungulula Davidi uko baile. Ilyo bafikile, basangile basalangenefye mpanga yonse, balelya, balenwa nokusansamuka pa mulandu wa bwingi bwa fitapwa bafumishe mu calo ca Bafilisiti elyo ne calo cakwa Yuda. ¹⁷ Dabidi abalwishishe ukufuma ulucelo mpaka ukufika na ku cungulo ca bushiku bwakonkelepo. Kanshi tapali nelyo umo pali bena uwafulumwike kanofye abalumendo imyanda ine abaninine pa ngamila no kufulumuka. ¹⁸ Davidi apokolwele icintu conse ico abena Amaleki basendele, ukulundapofye na bakashi bakwe bonse babili. ¹⁹ Tapali icintu nelyo cimo icabulilepo, icinono nangu icikalamba, umulumendo nangu umukashana, icitapwa nangu icintufye conse pafyo basendele. ²⁰ Dabidi abweseshefye fyonse. Dabidi apokolwele ifitekwa ne ŋombe shonse isho batangishe ukucema pantanshi ya fitekwa fibiye, elyo balelanda nokuti, “Ifi e fitapwa fyakwa Davidi.” ²¹ Elyo Davidi afikile pa bantu imyanda ibili abanakile nganshi mukumukonka, abo ashile kunuma ku kamana ka Beso. Nabo bafumine kukumukumanya pamo na bantu ali nabo. Ilyo Dabidi na bantu bakwe bapalama, abaposha. ²² Lelo abantu imbifi kabili abawelewele bonse abo bali nabo kabili abakonkele Davidi batila, “Pantu tatwaile pamo nabo, ifwe tatwabakenyeko ifitapwa twile sanga. Lelo umwaume onse kuti asenda umukashi elyo na bana bakwe, no kuya aleya.” ²³ Elyo Davidi ayasuka ati, “Awe, mwe bamunyinane mwicita ifyo pali ifi fintu Yawe atupeele. Yawe alitucingilila no kupeela mu maboko yesu abalwani aba abaishile tusansa. ²⁴ Nga kanshi, ni bani bengamusuminisha kufyo mwasosa pali ifi? Pantu icakaniko ca bantu bashele balelinda ifipe efyo ne cakaniko ca baile ku bulwi cili nokuba cimo cinefye. Bonse bali nokwakanafye cimo cine.” ²⁵ Kanshi Davidi acitile ici ukuba ifunde ne cebo ku bena Israeli, ukufumafye pali bulya bwine ubushiku ukufika na pali lelo. ²⁶ Ilyo Davidi afikile mu Sikilagi, atumine ifitapwa fimo ku bakalamba ba bena Yuda, abali abanankwe asosa nokuti, “Ubu e bupe kuli imwe ubo nafumya pa fitapwa fya balwani bakwa Yawe.” ²⁷ Awe afituma na ku bali ku Betele, Ramoti wa mu Negebu, elyo na ku bena Yatiri. ²⁸ Kabili atuma na ku Aroeli, Sifimoti, Eshitemoa, ²⁹ elyo na ku Rakali. Kabili atuma na kuli bonse abaleikala mu misumba ya bena Yerameli na ku bena Keni. ³⁰ Atuma na ku bali mu Homa, Borashani, na ku Ataki, ³¹ elyo na ku Hebuloni. Kabili atuma na kuli bonse abali mu fifulo fimbi uko Davidi na bantu bakwe baendawike.