¹ Yawe alandile kuli Samwele ati, “Bushe ukafika pa nshita nshi ukumfwa ubulanda pa mulandu wakwa Saulo, apo ine nalimukaana ukuba imfumu pali Israeli? Isusha ulusengo lobe amafuta, wambeko ukuya ubulendo. Nalakutuma kuli Yese umwina Betelemu. Ninsalapo umo ne mwine pa bana bakwe abaume ukuba imfumu.” ² Elyo Samwele ayaswike ati, “Bushe ndi nokuya mu musango nshi? Pantu Saulo nga aumfwa, ali nokunjipaya.” Yawe atile, “Usende umusepela wa ŋombe iyikota no kuyatila, ‘Naisa kukuleka ilambo kuli Yawe.’ ³ Ukete Yese kwilambo elyo na ine nkakulanga ifyakucita. Mukunjimininako, uli nokusuba amafuta pali uyo nkakusontela.” ⁴ Samwele acitile ifyo Yawe asosele. Ilyo afikile ku Betelemu, abakalamba ba mu musumba balaitutuminafye pakumukumanya. Bamwipwishe abati, “Bushe waisa mu cibote?” ⁵ Samwele nao alandile ati, “Ee, naisa mu cibote. Njishile kukutuula ilambo kuli Yawe. Isangululeni mwe bene, kabili tuleyeni bonse mukutuula ilambo.” Elyo asangulwile Yese na bana bakwe abaume no kubasenda ukuya ba nabo kwilambo. ⁶ Ilyo bafikile, Samwele amwene Eliabu elyo atontonkanya ukutila, “Ca cine umusubwa wakwa Yawe euyu aiminina pa cinso cakwa Yawe.” ⁷ Lelo Yawe aebele Samwele ati, “Tecakwesha ukulolesha imimonekele yakwe nangu icimo, pantu nimukaana. Yawe tamona ifyo umuntunse amona. Umuntunse aloleshafye ifimoneka kunse epela, lelo Yawe amona mukati ka mutima.” ⁸ Kanshi Yese aitile Abinadabu kabili nao amupishishe na ku ntanshi yakwa Samwele. Lelo Samwele atile, “Noyu wine teo Yawe asalile.” ⁹ Yese kabili apisha Shamaya ku ntanshi yakwa Samwele, nalyo line Samwele atile, “Noyu wine nao teo Yawe asalile.” ¹⁰ Yese apishishe abana cine lubali ku cinso cakwa Samwele, lelo Samwele atile kuli wena, “Tapali nangu umo uo asalile pali aba.” ¹¹ Elyo Samwele aipusha Yese ati, “Bushe abana bobe bonse abaume epo bali pano?” Yese atile, “Kushelefye umwaice pali bonse, nomba ena ali kukucema impaanga.” Samwele atile, “Tuma uwakuya mubuula. Tatwaikale panshi mpaka ese.” ¹² Elyo Yese atumine uwakuya mubuula kabili bamuleta mukati. Ali uwakashikila, ne mimonekele iyayemba kabili umusuma mukumoneka. Nomba Yawe atile, “Ima umusube amafuta, pantu euyu wine.” ¹³ Kanshi Samwele abuulile ulusengo lwa mafuta no kumusuba pa cinso ca bamunyina, elyo ukufuma pali ubu bwine bushiku ukuya kuntanshi Umupashi wakwa Yawe waishile pali Davidi na maka. Elyo Samwele afumapo aya na ku Rama. ¹⁴ Nomba Yawe afumishe Umupashi wakwe pali Saulo, elyo amupeelelapo umupashi ubi uwatendeke ukumucusha. ¹⁵ Elyo ababomfi bakwa Saulo bamwebele abati, “Mona umupashi ubi ukufuma kuli Lesa eulekucusha. ¹⁶ Eico peelafye icipope ku babomfi aba pano pesano ukuti bafwaye umuntu uwacenjela ukulisha iseese, pakuti aleti ilyo umupashi ubi ukufuma kuli Lesa waisa, ayamba ukulisha, lyena wakulaumfwafye bwino.” ¹⁷ Kanshi Saulo epakweba ababomfi bakwe ati, “Fwayenipo umo uwacenjela bwino kukulisha iseese mumulete kuli ine.” ¹⁸ Umubomfi wakwe umo ayasuka ati, “Nimona umwana mwaume wakwa Yese uwa ku Betelemu uwacenjela ukulisha iseese. Untu washipa nganshi kabili mushilika wa nkondo, uwacenjela mukulanda kabili uwayemba mukumoneka. Elyo Yawe aba na ena.” ¹⁹ Elyo Saulo atumine inkombe shakwe kuli Yese nokutila, “Tuma kuli ine umwana obe umwaume Davidi, ulya uucema impaanga.” ²⁰ Yese epakubuula punda uo batwikile imikate, kabili abuula ne nyambi umwali umwangashi, no mwana wa mbushi, elyo atuma Davidi umwana wakwe umwaume ukutwalila Saulo. ²¹ Davidi afikile kuli Saulo no kwamba imilimo yakwe. Saulo alimutemenwe nganshi, kabili amucitile ukuba umo uwa bakusenda ifyanso fyakwe. ²² Elyo Saulo atumine ishiwi kuli Yese nokutila, “Suminisha Davidi ukuti ambe ukulabomba imilimo kuno, pantu nacinsekesha ukuba nankwe.” ²³ Ilyo lyonse umupashi ubi uwalefuma kuli Lesa waleisa pali Saulo, Davidi alebuula iseese lyakwe no kulisha, lyena Saulo aleumfwako bwino, ku mutima kwalebwela kabili no mupashi ubi wafuma pali ena.