¹ Panuma ya nshita iyitali kwacitike umulandu uwakumine kwibala lyakwa Naboti umwina Yesireli. Ili bala lyali mu Yesireli, mupepi ne sano lyakwa Ahabu, imfumu ya bena Samaria. ² Ahabu aeba Naboti ati, “Nimpe bala lyobe pakuti ndelimamo umusalu, pantu ili bala nalipalama kwisano lyandi. Mukukabushanya, na ine ndi nokukupeelelapo ibala ilisuma, nangu nga ulefwaya nkulipile icuma conse ico ulepingula.” ³ Lelo Naboti ayasuka ati, “Yawe aleshe ukuti nkupeele icacishilano ca fikolwe fyandi.” ⁴ Elyo Ahabu aya ku ŋanda, nafitwa ku mutima kabili uwafulwa pantu Naboti umwina Yesireli acimweba ati, “Nshakupeele icacishilano ca fikolwe fyandi.” Alala pa musengele wakwe aletontonkanya, afilwa nokulya. ⁵ Umukashi wakwe Yesebele aingila amwipusha ati, “Cinshi wafitilwa ku mutima icakuti wafilwa no kulya?” ⁶ Ayasuka umukashi ati, “Nico naceba Naboti umwina Yesireli nati, ‘Nshitisha ibala lyobe, nangu nga ulefwaya nkupeelelepo ibala limbi pali lyena.’ Lelo acasuka ati, ‘Nshakupeele ibala lyandi.’” ⁷ Yesebele umukashi wakwe asosa ati, “Bushe ifi efyo ufwile ukucita nge mfumu ya bena Israeli? Ima ulye. Sansamuka pantu ine ndekupokela ibala lyakwa Naboti umwina Yesireli.” ⁸ Yesebele alemba inkalata mwishina lyakwa Ahabu, aumapo inshimbi ya mfumu no kushituma ku bakalamba na basambashi abaleikala nankwe mu musumba wakwa Naboti. ⁹ Muli ishi nkalata alembamo ukutila, “Pekanyeni ubushiku bwakufunga, elyo muteke Naboti pa cipuna icacindama pakati ka bantu. ¹⁰ Lelo muteke abaume babili ifinangwa fya bantu pa menso yakwe abakuti bamubepeshe abati natuka Lesa kabili natuka ne mfumu. Elyo mumusende no kuya mutobaula amabwe afwe.” ¹¹ Elyo abakalamba na basambashi abaikele mu musumba wakwa Naboti bacita ifyo Yesebele abebele mu nkalata abalembele. ¹² Bapekanya ubushiku bwakufunga baisa teka Naboti pa ncende iyicindami pakati ka bantu. ¹³ Elyo ifinangwa fibili fyaisa ikala kuntanshi yakwe fyalabepesha Naboti pa cinso ca bantu filetila, “Naboti natuka Lesa pamo ne mfumu.” Epa kumwimya bamusenda kunse ya musumba bamupolaula amabwe afwa. ¹⁴ Elyo batuma amashiwi kuli Yesebele abati, “Naboti nabamupola amabwe nafwa.” ¹⁵ Yesebele panuma yakumfwa ukuti Naboti nabamupola amabwe nafwa, aeba Ahabu ati, “Ima uye poka ibala Naboti umwina Yesireli akene ukukushitisha. ¹⁶ Pantu Naboti tali mumi, nafwa.” Ilyo Ahabu aumfwa ukuti Naboti nafwa, aima aya pokolola ibala lyakwa Naboti. ¹⁷ Elyo ishiwi lyakwa Yawe lyaishile kuli Eliya umwina Tishibe aliti, ¹⁸ “Kabiye uye eba Ahabu imfumu ya bena Israeli uuteeka mu Samaria. Pali ino nshita ali mwibala lyakwa Naboti ilyo endele ukuya pokolola ¹⁹ Umwebe auti, ‘Ifi efyo Yawe alanda ati, bushe tawipeye umuntu no kumupokolola icipe cakwe?’ Elyo umwebe auti, ‘Ifi efyo Yawe alanda ati, pa ncende apo imbwa shacimyanga umulopa wakwa Naboti epo imbwa shili nokumyanga umulopa obe na iwe wine, ee, umulopa uobe.’” ²⁰ Ahabu aeba Eliya ati, “Kanshi wansanga we mulwani wandi?” Eliya ayasuka ati, “Ee nakusanga, pantu nauipeelesha mukucita ifibi pa cinso cakwa Yawe. ²¹ Nalaleta icinkunka pali iwe. Nalalofya uluko lobe elyo nalaonaula mu ŋanda yakwa Ahabu umwaume onse uwakulekelesha uwa bena Israeli umusha nangu umuntungwa. ²² Nalalenga iŋanda yobe ukuba nge yakwa Yeroboamu umwana umwaume wakwa Nebati kabili nge yakwa Baasha umwana mwaume wakwa Ahiya, pantu naunsonsomba ukuti nkalipe kabili walenga na bena Israeli ukucita ububifi. ²³ “Elyo pa mulandu wakwa Yesebele, Yawe asosa ati, ‘Imbwa shili nokulya Yesebele mukati ke linga lya ku Yesireli.’ ²⁴ “Imbwa shili nokulya bonse abakwa Ahabu abakafwila mu musumba ne fyuni ifipupuka fikalya bonse abakafwila mu mpanga.” ²⁵ Tapatalile apaba umuntu uwapala Ahabu ukuiposaika mukucita ububifi pa cinso cakwa Yawe, kabili uwalesembeleka Ahabu no kumutunka ni Yesebele umukashi wakwe. ²⁶ Ahabu alikwete umulandu pa fintu acitile ifyakwamba ukupepa utulubi tumbi, kwati bena Amoli abo Yawe atamfishe pantanshi ya bena Israeli. ²⁷ Ilyo Ahabu aumfwa amashiwi aya, alepula ifyakufwala fyakwe, afwala insalu shabulanda elyo afunga. Alala nafwala insalu shabulanda kabili aima no kwenda bulanda bulanda. ²⁸ Elyo ishiwi lyakwa Yawe lyaishile kuli Eliya umwina Tishibe aliti, ²⁹ “Bushe naumona ifyo Ahabu aicefeshe pa cinso candi? Pa mulandu wakuti aicefya, nshalete icinkunka mu nshiku shakwe, lelo ndi nokucileta pa ŋanda yakwe mu nshiku sha mwana wakwe umwaume.”