¹ Lelo Imfumu Solomoni yalitemenwe abanakashi na bambi ukucila pali mwana Farao. Alyupilepo na banakashi ba ku Moabu, aba ku Amoni, abena Edomu, abena Sidoni na bena Hiti. ² Bali ba ku mitundu iyo Yawe aebele abena Israeli ukuti, “Tamufwile ukulaupana nabo, pantu bakapilibula imitima yenu ukwamba ukulakonka imilungu yabo.” Lelo Solomoni akonenafye mukubatemwa. ³ Akwata abakashi imyanda cine lubali aba ku bufumu elyo na bakashi bakwe abo ashaupile mu bwinga nabo imyanda itatu. Na bakashi bakwe bayalula umutima wakwe. ⁴ Ilyo Solomoni akota, abakashi bakwe balenga umutima wakwe ukupilibukila ku milungu imbi, no mutima wakwe waleka ukuba uwacishinka kuli Yawe Lesa wakwe, ngefyo umutima wakwa wishi Davidi wali ⁵ Alakonka Ashitoreti umulungu uwanakashi wa bena Sidoni, na Moleki umulungu uwakowela uwa bena Amoni. ⁶ Solomoni asuka acita ifyabipa mu menso yakwa Yawe, aleka ukulakonka Yawe umupwilapo ngefyo Davidi wishi acitile. ⁷ Pa lupili ku kabanga ka musumba wa Yerusalemu, Solomoni akuula incende yakupepelapo akalubi ka Kemoshi umulungu uwakowela uwa bena Moabu. Acita cimo cine kabili akuulila akalubi ka Moleki, umulungu uwakowela uwa bena Amoni. ⁸ Ifyo fine efyo acitila ne milungu ya bakashi bakwe bonse abafumine kumbi. Balafukilisha ububani no kulatuula amalambo ku milungu yabo. ⁹ Yawe afulilwe Solomoni pafyo umutima wakwe wafumine kuli Yawe Lesa wakwa Israeli uwamonekele kuli ena imiku ibili. ¹⁰ Nangu Solomoni bamuleseshe kuli Lesa ukukonka imilungu imbi, Solomoni tasungile amafunde yakwa Yawe. ¹¹ Eico Yawe aebele Solomoni ati, “Apo iyi e mbela yobe kabili wafilwa no kubaka icipangano candi ne fipope fyandi ifyo nakukonkomeshe, nalasesha ubufumu ukufuma kuli iwe no kubupeela kuli umo pa babomfi bobe. ¹² Lelo, pa mulandu wakwa Davidi wiso, nshakacite ici mu nshita ya bumi bobe. Ndi no kwisa sesha ubufumu ukufuma ku mwana obe. ¹³ Nalyo line nshakaseshe ubufumu bonse ukufuma kuli ena. Ndi nokumupeelako uluko lumo pa mulandu wakwa Davidi umubomfi wandi na pa mulandu wa Yerusalemu umusumba uo nasala.” ¹⁴ Elyo Yawe aimisha Solomoni umulwani Hadadi umwina Edomu, ukufuma ku bufumu bwa bena Edomu. ¹⁵ Kunuma ilyo Davidi alelwisha abena Edomu, Yoabu umukalamba wa fita fya nkondo ilyo aile mukushiika abafwa, aile ipaya abaume bonse mu Edomu. ¹⁶ Yoabu na bonse abena Israeli baile ikala kulya pa myeshi mutanda mpaka balofyafye bonse abaume ba mu Edomu. ¹⁷ Nomba Hadadi ninshi acilifye akalumendo abutukile ku Egupto pamo na bacilolo bamo aba mu Edomu ababomfi bakwa wishi. ¹⁸ Pakubutuka, bafumine ku Midiani baya ku Parani. Lilya basendako abantu ku Parani baya ku Egupto kuli Farao imfumu ya ku Egupto. ¹⁹ Farao amupeela iŋanda ne ncende elyo amupeela ne fyakulya. Farao atemwa nganshi Hadadi icakuti amupeela na mulamu wakwe, nkashi nankwe wakwa namfumu Tapenesi ukuba umukashi wakwe. ²⁰ Kuli nkashi nankwe yakwa Tapenesi, Hadadi afyalako umwana umwaume amwinika ishina lya Genubati. Tapenesi akushishe uyu mwana kwisano, eko alakulila pamo na bamwana Farao. ²¹ Lintu acili mu Egupto, Hadadi aumfwile ukuti Davidi nafwa no kuya lala ukwalala ifikolwe fyakwe, kabili aumfwa nokuti Yoabu umukalamba wa fita fya nkondo nao nafwa. Elyo Hadadi aebele Farao ati, “Leka ndeya pakuti mbwelelemo ku calo ca kumwesu.” ²² Farao amwasuka ati, “Finshi ifyo uculila ifyalenga ukuti ufwaye ukubwelela ku calo kumwenu?” Hadadi ati, “Tapaba, lelo leka ndeya.” ²³ Kabili Lesa aimishe Solomoni na umbi umulwani, Resoni mwana Eliada uwabutwike ukufuma kuli shikulu wakwe Hadadesa imfumu ya ku Soba. ²⁴ Alonganika impuka ya bantu abakumukonka ababulwi elyo aba ne ntungulushi ya bacisanguka. Pali ilya nshita Davidi aleonaula abashilika bakwa Soba, bacisanguka baile ku Damasika eko baya ikala. Babika na Resoni ukuba imfumu yabo. ²⁵ Resoni ali umulwani wa bena Israeli pa nshita yonse iya bumi bwakwa Solomoni, alunda na ku bubi bonse Hadadi alecita. Kanshi Resoni ateekele mu Aramu kabili ali cipondo ca bena Israeli. ²⁶ Yeroboamu nao, mwana Nebati, apondokele imfumu. Ali umo pali bacilolo bakwa Solomoni. Ali umwina Efulemu uwa ku Sereda, kabili nyina ali ni namfwilwa ishina lyakwe Serua. ²⁷ Umfweni icalengele ukuti apondokele imfumu. Solomoni alikuulile ifibumbili fyakwikasha ifikulwa no kucilika umupokapoka mu cibumba ca musumba wakwa Davidi wishi. ²⁸ Nomba Yeroboamu aba umwaume uwamaka, kabili ilyo Solomoni amona ifyo uyu mulumendo alebomba imilimo yakwe bwino, amubika ukuba umukalamba wa babomfi bamulaasa ku ŋanda yakwa Yosefu. ²⁹ Pa nshita ine ilya Yeroboamu aima ubulendo ukuya ku Yerusalemu, elyo pa nshila akumanya Ahiya kasesema wa ku Shilo, nafwala umwingila upya. Bonse babili babafye beka mu mpanga, ³⁰ na Ahiya abuula umwingila upya afwele no kuulepaula mu tupimfya ikumi limo na tubili ³¹ Elyo asosa kuli Yeroboamu ati, “Buulapo utupimfya ikumi limo tube tobe, pantu ifi efyo Yawe, Lesa wa bena Israeli alanda ukuti, ‘Mona, nalaputula ubufumu ukufuma mu maboko yakwa Solomoni no kukupeelako inko ikumi limo. ³² Lelo pa mulandu wa mubomfi wandi Davidi, na pa mulandu wa musumba wa Yerusalemu uo nasala ukufuma mu nko shonse isha bena Israeli, ali nokushalapo no luko lumo. ³³ Nalacita ifi pa mulandu wakuti nabansha no kwamba ukupepa Ashitoreti umulungu wa bena Sidoni, Kemoshi umulungu wa bena Moabu elyo na Moleki umulungu wa bena Amoni. Kabili bafilwa no kwenda mu nshila shandi nangu ukucita ifintu ifyalungama pa cinso candi, nangu ukubaka ifipope fyandi na mafunde yandi ngefyo Davidi wishi wakwa Solomoni acitile ³⁴ “‘Nomba nshafumye ubufumu bonse mu maboko yakwa Solomoni. Nalimubika ukuba imfumu mu nshiku shonse isha mweo wakwe pa mulandu wa mubomfi wandi Davidi, uo nasalile elyo kabili uwabakile ifikomo na mafunde yandi. ³⁵ Ndi nokufumya ubufumu ukufuma mu minwe ya mwana wakwe no kukupeelapo inko ikumi limo. ³⁶ Nkapeela uluko lumo ku mwana wakwe pakuti umubomfi wandi inshita yonse akakwate icisaniko pa cinso candi mu Yerusalemu, mu musumba umo nasalile ukubika ishina lyandi. ³⁷ Lelo palwa iwe, nkakubuula kabili uli nokuba imfumu pali Israeli yonse. ³⁸ Iwe nga wacita fyonse ifyo nakukonkomesha, no kwenda mu nshila shandi no kucita ifyalungama mu menso yandi mukubaka ifipope na mafunde yandi ngefyo Davidi umubomfi wandi acitile, ninshi ndi nokuba nobe. Nkakukuulila ubufumu ubwamaka, kwati ni bulya nakuulile Davidi, no kupeela icalo ca Israeli kuli iwe. ³⁹ Nkapetamika aba mu ŋanda yakwa Davidi pa mulandu uyu, nomba te nshiku shonse.’” ⁴⁰ Solomoni afwaile ukwipaya Yeroboamu, nomba nao abutukila ku Egupto kuli Shishaki imfumu eko aya ikala mpaka ilyo Solomoni afwile. ⁴¹ Palwa milandu imbi iya bufumu bwakwa Solomoni, fyonse ifyo acitile na mano akwete, bushe tafyalembwa fyonse mu citabo ca milandu yakwa Solomoni? ⁴² Solomoni aikele mu Yerusalemu no kuteeka icalo conse ica Israeli pa myaka amakumi yane. ⁴³ Ilyo afwile, bamushiikile ku ncende ukwalala ifikolwe fyakwe mu musumba wakwa Davidi wishi. Kabili Reoboamu umwana wakwe umwaume ewamupyene pa bufumu