¹ Bongo bangwaya, leyalela la ino, a bowawa bo Mongalima ine bofake bilongo byaino mbeka esuake, tsangaa, wali ngi Mongalima, ine yokoyala ngino likita li bayele. ² So bila bahoyi ba yene yekeleko, kasi bolenge la bokanesi yelenge ye faifai, tsina ine bolembele likanesi li Mongalima, ine ebayi wali mpe ikoki. ³ Leekela onu mito a mito ine botsiyale a bakanesi ba boyafofoli, kasi botole biyaeli bi loyesesi mpe li wali bolandani a bonene bo bwinoli bowae bone bo mwayi Mongalima. ⁴ Fuko ine, kune ebayi osu la binama bofela a yelongo ko yemoi mpe ine binama kwitu bitsiyali a yesili yelenge yemoi, ⁵ La oyo, usu bane bebayi bofela, tobayi yelenge ko yemoi katsi e Kilisito, mpe tobayi osu ngia binama bamoi a basiaka. ⁶ Fuko ine toyali la babonza bekeseni, bolandani a ngolu etwayameli osu, ine ano ebayi a libonza li bosakoli, asakole a boulani la bwinoli. ⁷ Ano etahami a yesili ye Mongalima, ayaisii a yo yesili, ano e hana ayeisi a bohani bowae. ⁸ ano elendesa baito, ayaeisi a bolendisi baito, ano efakela baito afakake kooyo, ano e elesa baito, atsikele a bosekani, ano eokokela aito bowa, akelake kooyo a yenanga. ⁹ Lokundo loino lotsiyale lo bokosakosi, bofete bahoyi betsiitani, boyabwele a bahoyi beitanake. ¹⁰ La lokundo lo banginena, bokundake la motema umoi. Boyale baito ba felo bwayani lokumo! ¹¹ Boyale a kasakasa, mpe ta la yosele, boongane e yohe e yelimo, bosaele Nkolo. ¹² Nangela la yelikia, yala la moteme sese mpe i yaala katsi nkwokoso, bumoe bolongi Mongalima. ¹³ Bofakelake batsangami katsi e biposa byaibo, bonangelake bafaya. ¹⁴ Bohambolake banebenesa onu lumbe. Hambola mpe so'umaka. ¹⁵ Nangela la bane benangela, lela la bane belela. ¹⁶ Bokanesaki bamoi baito kune eyakanesa onu mangine. So yalaa a likanesi li boyatomboli kasi boyale nga la likanesi li boyisesi. So yasila baito ba wanya a baiso baino matuke. ¹⁷ Suineselia mito mbeko mbe likolo li mbeko mbe, bokelake bahoyi nzali la mito komotu. ¹⁸ Ikoki boyale la baito ngia hai. ¹⁹ Bangwaya, swineselia mito akamokela oye mbeko mbe bobe, kasi mina nkanda eino ekele yesili, fuko ine ikomami ine: boulesi mbeko mbe ilitsi ngo, eeki Nkolo. ²⁰ Kasi la monguna owao ebayi a semba, mwaya bima bi bolei, la'ebayi a kamo e baye, mwaya baye ba bonwei, fuko ine la'okakela oyo, okamwisa baala ba yohe a moto uwae. ²¹ So kunda ine mbeko mbe i molonge oye, kasi longa mbeko mbe a bokeli mbeko nzali.