¹ Mbuse e baose mbalemoi, Yesu aka sambela ye la Petelo, Yakobo pe Yoane monginena o ahe, pe aka eta la boo o etsikolo emoi ete sondama. ² Aka yalengesa felo e ibo, pe bosio bo ahe bongengi oine mwasa, pe tulu elahe ika kwa fuluu oine bongengi. ³ Pe lita, Mose pe Eliya baka tsuela bo, be yekelana lahe. ⁴ Petelo la bosili liohi, aka beka la Yesu: Kolo eitani te toyale ane; la okundji, le kenga ombe ane yeengaelo isaso, emoyi po elaho, emoyi po e Mose pe emoyi po e Eliya. ⁵ Ane e beka ye a lisiaka, lipata lingengi ika lika bo. Pe lita, mongongo emoyi lika okokana la yoo lipata bane baloba: ano ebayi mona owa e lokundo, ano eisi ngo lokundo lola ngia: bo mokoke. ⁶ Ane eokoki boo lo mongongo', bayekoli baka isa bosio seese, pe baka anga makasi. ⁷ Kasi Yesu , aka lwa kelekele, aka mbwa bo, pe aka beka: bo emale, so anga! ⁸ Baka lilesa baiso, pe baka yena ko Yesu matuke. ⁹ Ane iseli boo a etsikolo, Yesu aka ba yaesa ine mobeko: So bekela mito line limoniseli, tee ko Mona o mito eo ko sekwa ngi bawei. ¹⁰ Bayekoli baka mouhola: po embi bakomi bebeka te Eliya eoko lwa felo felo? ¹¹ Aka ulesa: ebayi solo Eliya eeko lwa, pe eeko ulea bima ngia. ¹² Kasi nga bekela onu te Eliya ete lwa kala, betsi te molembelaka, pe bete mokela ene ndenge ekundji boo. Soko lo ndenge Mona o mito eoko nyokwama la boo. ¹³ Bayekoli baka lembela kwamo ine e babekela po e Yoane Batisimo. ¹⁴ Ane etsuani boo kelekele e lindji li baito, mito emoyi aka kwa a mekele felo e Yesu, pe aka beka: ¹⁵ Kolo yala a bowaowa bo mona owa, ano ebayi a lolendo pe e nyokwama makasi; e kwa mbala-mbala a yohé, pe mbala-mbala a loyé. ¹⁶ Le lui laye ngu bayekoli ba aho, pe betsi koki o bo moumesi. ¹⁷ Yesu aka ulesa: liota lilumbi buinoli pe be tsila losambo, tee ko endei ngonga leo koyala a ino? tee ko endei ngonga leo ko landa bakita e ino? bo luele laye ane. ¹⁸ Yesu aka bekela a longulu lo molimo mbe mbe, ano etsui ngi mona, pe mona aka huma kwa lo ngonga. ¹⁹ Kwamo bayekoli baka lwa kelekele e Yesu, pe baka mwekela mangine: po embi osu totsi koki bobili yo molimo mbe mbe? ²⁰ Yesu aka ba bekela, ebayi po e bolumbo boino bo buinoli. nga ekela onu a bosembo, la bo yalaki la buinoli ene mbume i sefene, bo ekela ombe a ine estikolo: ya tola ane, pe eeko ya tola; yema so limoyi lio kwetela onu. ²¹ Kasi ene ndenge e molimo mbe, e tsua kwa losambo pe bokili. ²² Tango ene be yeta a Galileya, Yesu aka bekela bo: Be oko aesa Mona o mito a bafindji ba baito; ²³ Be ko moolaka, pe mbuse e baose isaso, eeko sekwa. baka okoka bowawa. ²⁴ Etsuani bo a Capelenau, bane besila mbela iyele be ya'ekana a Petelo pe baka mwekela: Kumi e ino esti enda mbela iyele? ²⁵ Eyee, aka ulesa. Pe ene tango e holi ye katsi e mbele, Yesu aka ba kebesa pe aka beka: Nda ebayi Simoni? Bakonzi ba mbu, po embi esila bo mbela pe pako? ebayi po e bana e ibo too po e bane be lwa isiaka hia? ²⁶ Aka mwekela: bane be lui isiaka hia. Yesu aka muineola: bana betsi yali amo. ²⁷ Kasi, po ine batsi kwe a basumu, kyaka a loye lofulaku li mokwa, filinga ndobo, pe benda swe e felo ene eyeli; uwola monwa uwae, pe oko ukola mbela. Sila yoo, pe aesa po elaho pe po ela.