¹ Be emalaki boo ngia, pe bekiaki la Yesu ngu Pilato. ² Bakamofunda une: tokena ano mito e toma hia eiso a bwango, batsi ende pako i Kaisala, pe e eka ye mangine ebayi Mokonzi Kilisito. ³ Pilato aka muhola une: oye obayi mokonzi u ba Yuda? Yesu aka mwineselia: Okaeka. ⁴ Pilato aka eka la ba Nganga ba Mongalima pe la lindji li baito: ndji eni mbeko mbe li ano mito. ⁵ Kasi boo be kakamela pe baka eka: etoma baito a botomboki la botei Yudea kwitu, botsui Galilea, eelo ebandi ye, tee kwane. ⁶ Ane eokoki Pilato yo liohi li Galilea, ak'uhola amba ano mito ebayi mogalilea; ⁷ pe, la bolembeli ine ebayi nga mito o lohia lo bokumu bo Elode, aka motoma ngu Elode; boo baose Elode eteyalaka a Yelusaleme ⁸ Ane akena Elode Yesu, akaliala a yenanga; fuko ine, iketa baose bofela, epala bo moeni, po ebakita beokoki ye po elahe, pe amwene akele bikamwisi. ⁹ Aka muhola mbala bofela, kasi Yesu etsi mwineseli soo liohi. ¹⁰ Banganga bafulaku boo la bakomi mibeko beteyalaka amo, pe be mokamba a ngulu. ¹¹ Elode, la bakengeli bahahe baka motiola a bobwei ndundu, pe mbuse e bo moholi pe bo motwesi tulu e itamake, baka mwaesa ngu Pilato. ¹² Woo mwasa, Pilato la Elode bakakundana; felo beteyalaka banguna. ¹³ Pilato isikani emoyi la Banganga Bafulaku, la ba zuzi, pe la baito ba lohia, aka baekela: ¹⁴ Bolweli ngo la ano mito oine e toma baito ba lohia a botomboki, pe sikane, nga mohuhola felo felo eino, pe ndji mwenyi la bakita bane bemokambi onu; ¹⁵ Elode pe etsi mwenyi a likita libitake, po emoli aka mohulesia ngiso. Ano mito etsikeli yema mbe, etsikoki a loko. ¹⁶ Mbuse e bomoofesi fimbo, leokomomina ake. ¹⁷ Ngonga e bosepeli Pasika, Pilato ebayi a lotomo lo botusesi mito'omoyi a boloko. ¹⁸ Baito ngia mbala emoyi bakahama: olaka ano, pe mina Balabasi. ¹⁹ Ano mito bete mwisa a elinga po e lienge liteyalaka a lohia li mbau, pe eteolaka mito. ²⁰ Pilato aka baekela kwa ituta, la likanisi li bomini Yesu. ²¹ Pe bakasumba mehui: awe a yekulusu, awe a yekulusu. ²² Pilato aka baekela mbala e isaso: mbi ikeli ye i mbeembe? Ndji eni yene yekeli ye po awe.Mbuse e bomoofi fimbo, leoko momina. ²³ Pe bakamata a lokulu la bolongi te awe o yekulusu.Pe miamatsi mieibo mikookokana. ²⁴ Pilato akaeka une: ine ikalonga onu, iokokelama. ²⁵ Akamina mito ano ete hola a linga po e lienge pe bo olaki mito, pe akabaesa Yesu po bakele la ye ndenge ekundji bo. ²⁶ Ane ekia bo lahe, bakakulana la mito omoyi o Silena, lina li lahe Simoni, e hula a yehua, baka mwaesa yekulusu, atole pe ayale mbuse e Yesu. ²⁷ Bofela bo baito bete mo bilaka, pe bahali bane bete yalaka boya ofi yetetele la boleli bo bowaowa. ²⁸ Yezu aka lenga mwatsi waibo, pe aka beka: Bionga bi Yeluzaleme, so lela fuko ela, kasi bo lele fuko eino pe e bane baino. ²⁹ Fuko ene, lita, baose be oko lwa ombe bane be oko beka ombe wo: Yenanga ye bahali betsi ota, yenanga ye mesolo me tsi ota pe bahali bane betsi te lomesa. ³⁰ La koyo, be oko bekela ombe totsikolo: Kwa likolo lia iso! pe la ngemba: To lika osu! ³¹ Fuko ine la bekela wo baoyi la mote usuake, ye oko bia iya la mote une u wali? ³² Bete kiaka a yoo yekeleko bakeli ba meko mbe baele, bane bete kokaka bo olakami la yene mbala emoi. ³³ Ane aka twsana boo la isikani ine ite ataka boo lokokolo lo moto, baka mo kakamesa a yekulusu la mekoli me me mbeko mbe myele, omoi lifinzi li lolome, osiaka lifinzi l lihali. ³⁴ Yezu aka beka: Aha lembesa boo, po ine betsi lembeli ine ikela boo, Baka fakana tulu iyahe la bo otsi tseke. ³⁵ Baito bete emalaka aelo, pe be lita. Ba Zuzi baka ola Yezu, la bobeki: Ete umakesa basiaka; aya umesi yee mangine, la ebai Kilisito, mominolami u Mongalima. ³⁶ Basola pe bete mo olaka, bo ya fili kelekele elahe, baka mo aesa yefonge ine anwe; ³⁷ Be mo sekakola la bobeki:La obai kumi e fulaku e meyuda, ya umesa pe oye mangine! ³⁸ Likomi limoi lite yalaka likolo li ahe: Ano une ebai kumi e fulaku e meyuda. ³⁹ Mokeli umoi u mbeko mbe ete kakamaka la yekulusu aka mo sekakola, bobeki: Otsi bai Kilisito? Ya umesia oye mangine pe tumesia pe osu! ⁴⁰ Kasi ano omoi aka sila lioyi, pe aka beka: oye otsi banga Mongalima, oye ano eukoli ko yemotsi yetumbu. ⁴¹ Po eiso, ibai sembo, fuko ine to ukola ine ikoki la baoyi babitake bekeli osu, kasi ano une etsi keli yema yemoi yebitake, ⁴² Pe aka bekela Yezu: Okanesi ngo yeleko ye oklwa iye biyelesi bo bokumi bo aho. ⁴³ Yezu aka mo inesela: le mo bekela ko liekela, bonoombe oko yala la ngo katsi Paladiso. ⁴⁴ Ite kokaka aine saa e mbala-emoi, pe liita lika isela a moki u seese kuitu tee kwa saa e sumbanga-emoi. ⁴⁵ Mwasa ukila, pe tulu e tepelo eka hea katsi-katsi. ⁴⁶ Yezu aka hamata mohehe likolo: Aha, nga inesa yelimo yeha katsi e ndala iyaho. Pe la bobeki boo baoyi, aka tena motema. ⁴⁷ Aka ena mokonzi u basola ine ite etaka, aka kumesa Mongalima, pe aka beka: Ano mito e yali moyengebeni ko liekela. ⁴⁸ Pe bane koatu bete yalaka bofela la lyo likita, mbuse e bo eni ine iyetsi, baka ulaula pe la boya ofi yetetele, ⁴⁹ Bane kwatu be te lembelaka Yezu, bahali bane be tswaka laye bo okoyi Galilea, bete emalaka yesika pe bete biaka belita baoyi ngia bete etaka be eta. ⁵⁰ Moiseyi bakane umoi, utomi Yozefu, mito o wali pe moyengebeni. ⁵¹ Aho mito etsi te holaka a yekateli pe mesala me aibo, ete yalaka mito o Alimateo, lohia lo mbau lo meyuda, pe ete ambelaka bokumi bo Mongalima. ⁵² Aho mito akakia ngi Pilato, pe aka uhola molonda u Yezu. ⁵³ Aka mo iselesia a yekulusu, aka molinga la tulu, pe aka mwisa a lombeto lote tekaka boo a libanga, ane etsi te isaka ino boo mito. ⁵⁴ Ite yalaka mwasa u bolengeli, pe sabato etsi te biaka bobandi. ⁵⁵ Bahali bane bete lwaka muku u Galilea la Yezu, baka kia isikani imoi la Yosefu, baka ena lombeto pe yelenge yene ye engali molonda u Yezu. ⁵⁶ Pe baka ula, baka lengela pumba la bolako. Mbuse, baka hooma mwasa u sabato, kune e beki molembo.