¹ Mefutesi me tako la baito ba mbeko mbe kwatu baka sangana ngi Yezu fuko e bo mo okoki. ² Pe la Bafalisayo la bakomeli ba imaimai, la bobeki: Ano mito eyamba baito ba mbeko mbe pe ela la ibo bima. ³ Kasi aka bekela boo yene yekwe: ⁴ Mito nda katsi eino, la obai la kondolo monkama, pe ine emoi eka unga, etsi oko tsika kondolo metuku sumbanga emoi la sumbanga emoi isiaka la yesobe po e bokei mbuse e kondolo ene e ungi, tee kwane eko ena lo. ⁵ Yekeleko ye oko mwena yee, a motole a bakelekele kwa mesimo la tola. ⁶ Pe la bo uli a mbele, a etake bainina bahe pe ba lisusuka liahe, pe a bekele boo: Bonangela lango isikani imoi, po ine nga ukola kondolo ela ene e ungaki. ⁷ Ko ndenge emoi, le bekela onu, yenanga yeko yala bo eteli a loola po e mito o mbeko mbe komoi ano aka lenga, koliko fuko e metuku sumbanga emoi la sumbanga emoi bane betsi lengi la botubeli bikweli bi aibo. ⁸ Too mohali nda ano ebai la mbela laabo, pe ine a ungesi emoi etsi oko onganesa mwenzi, etsi oko omba mbele, pe etsi okopala la likebi, tee kwane eko ukola yee yoo yebende? ⁹ Yeleko ye oko ukola yee yoo lobela, a etake bainina bahe pe ba lisukaka liahe, pe bobeki: Bonangele la ngo ilongo imoi, po ine nga ena lobela loka palake ngo. ¹⁰ Ko londenge, le bekela onu, yenanga yebai felo e Baanzelu ba Mongalima po e mito komoi ano aka lengesa motema uahe. ¹¹ Aka beka kwaisia: Mito omoi ete yalaka la bana balome baele. ¹² Ombuse aka beka la ise o ahe: Aha, aesi ngo line lila lifako li bima bikoki ngo bo ukoli. Pe ise aka mo fakela bio bima bite itaka yee. ¹³ Mbuse baose peeni mona olome u mbuse, aka sila bima ko bitu, aka kia moki usiaka yesika, kohe ete kafwelesa yee bio bima ngia la boseka. ¹⁴ Yeleko yeka fwela bima, motolo ta umotsi uka tswa a moki, pe aka banda bokikami la bima. . ¹⁵ Aka kia boka keli yesili ngi mito omoi uwoo moki, ano ete mo toma a bihwa botambani pe la boleisi ba nama iahe. ¹⁶ Ete kundaka bo liali la metsika me bima bi lia bandehe i lohia, po ine so mito ano etsi te biaka e mwaesa yema ye bolei. ¹⁷ Aka mo ulela bayele, aka ya bekela: Mesali meha ngia melia bofela bo tofoe ngi Aha, pe ngo, ane, lewa la semba! ¹⁸ Le oko emala, lekie ngi Aha, pe le oko mo bekela: Aha, le keli yekweli ngi Mongalima pe ngwaho, ¹⁹ Nzi yali la lokumu aisiaka bo etakemi mongo o aho; sile ngo aine omoi katsi e mesali me aho. ²⁰ Pe mona o mbuse aka emala, pe akakia ngi Ise, yeleko ye te yalaka yesika, Ise aka mwena pe akaka mokela bowaowa, aka kia luhele botumani la mona la bo mo lingi yekopi a ngingo pe aka mopepwa. ²¹ Mongo o ahe aka mo bekela: Aha, lekeli bobe a loola pe ngwaho, nzi yali la lokumu lo bo etakemi aisiaka mongo aho. ²² Kasi Ise aka beka la mesali me ahe: Lwa aisanga la lobe bweteli mwali, pe bo mo tolesi, mwisa lopete a lotaka, pe mo tolosi biboloko a mekele, ²³ Lwa la mona o ngombe e baina, pe mo olaka. Tole pe to nangele. ²⁴ Po ine mongowa ano ebai une ewaki, pe a aka lenga boumake, eungaki, pe aka enena. Pe baka banda bonangeli. ²⁵ Ainzi nga mongo o ahe ano o felo ete yalaka a basanga. Tango ene e akalenga yee pe aka angana yee a mbele, aka okoka mesiki pe bioha. ²⁶ Aka etaka mosali umoi, pe aka mo uhola ine ite etaka. ²⁷ Wo mosali aka mo bekela: Monganoe aka lenga, pe, kune aka mo ena yee la bilongo nzali, Ato aka olaka mona o ngombe e baina. ²⁸ Aka angoa, pe aka feta boholi a mbele. Ise aka tswa, pe aka mo ondela ine ahole. ²⁹ Kasi aka inesela ise: Lita,ika eta bilanga bofela kune e mosunge ngo oye, so mwasa omoi ine inzi tosi baoyi baho, pe so mwasa ine o aesi ngo mona o kondolo e moi po ine le ya nangelesi la bainina baha, ³⁰ Pe yeleko ye katswana mongo aho, ano elei bima biaho la bahali ba boseka, tsina elahe nga eka olaka oye mona o ngombe e baina. ³¹ Mona owa, Aka mo bekela Ise,o bai baose kwato lango, pe ine kwatu iyiki ngo bibai biaho. ³² Kasi ite kokaka ine oya sepelesi pe oya nangelesi wali, po ine monganoe ebai aine ewaki pe a aka lenga la bo umake, pe aine e ungaki pe aka enena.