¹ Le ekeli onu bane bakita, po ine itsiyale po enu ndole i bokwei. ² Beko bila onu a Synagoga; pe kwa emotsi yekeleko ano eoko olaka onu esumba kwine ekela losambo lo Mongalima. ³ pe bekokela lo ndenge fuko ine betsilembeli aha ko la ngo. ⁴ Le ekelaki onu bane bakita, po ine, la yekeleko yeka koka, bolembele te leteekelaka onu. Ndjite ekelaka onu felofelo, po ine leyalaki a ino. ⁵ Sikane ngakia ngu ano etomi ngo, pe so mito atsi uhole: kohé ekia oye? ⁶ Kasi, po ine lete ekelaka onu bane bakita, bowawa ika liala a mitema yeino. ⁷ Sikane nga ekela onu liekela: ebayi a litomba yeino po ine leke, fuko ine la ndji kei, moondesi etsi lwa ngino; kasi, la ngakia leoko motomela onu. ⁸ Pe ane eokolwa ye, eokuinolesa mwano likita li masumu, boyengebene pe yesambi: ⁹ bine bilitsi masumu, po ine betsi inoeli ngo; ¹⁰ boyengebene, ngakia ngu aha, pe botsiokoene mbala isiaka; ¹¹ Yesambi, po ine mona o mangine o mwano, aka samba. ¹² Liki aingina bakita ofela po e boekeli onu, kasi botsikoki bolembele sikane. ¹³ Ane eokolwa moondesi, molimo mo liekela, eokokamba onu kati e liekela; fuko ine etsiekoeka po elahe matuke, kasi eekoeka kwitu eokoki ye, pe eekoekela onu bakita bine biokolwa. ¹⁴ Eekokumesi, po ine eekosila bine bibayi kati ela pe anolembelesi. ¹⁵ Kwitu eiki aha ebai ela; tin'emoli leekaki te esila bine biya, pe anolembelesi. ¹⁶ Ikatsikala yekeleko mai peni, pe botsiokoene ngo aituta, pe ikatsikala yekeleko mai peni, pe bokoene ngo, po ine lekia ngu aha. ¹⁷ Aho likolo, bamoyi bayekoli ba ahe beekelana kati eibo: elembelesi mbi bine biekela ye osu: ikatsikala yekeleko mai peni, pe botsiokoene aituta; pe ikatsikala yekeleko mai peni, pe bokoene ngo? pe po ine lekia ngu aha? ¹⁸ Be eka te: elembelesi mbi: ikatsikala yekeleko mai peni? Osu totsilembeli mbi eeka ye. ¹⁹ Yesu, elembeli ine beoko muhola motuna, aka baekela: uholanani onu angine line lieki ngo: ikatsikala yekeleko mai peni,pe botsiokoene aituta, pe ikatsikala yekeleko mai peni, pe bokoene ngo. ²⁰ Ko liekela, ko liekela, nga ekela onu, bookotusia pisoli pe bookoyasemia, pe mwano iokobia a yenanga: bookoyala a bowawa, kasi bowawa yeino, iyokolenga yenanga. ²¹ Mwali, eleko e ooti, ebayi a bowawa, po ine yekeleko elahe ikakoka, kasi la akaota mona owae, etsi kanesa ombe aituta yefefe, po e yenanga e ooti mona a mwano. ²² Onu pe, bobayi sikane a bowawa, kasi leokoena onu, pe mitema mieino miokonangela, pe so mito eokoluhola yenanga yeino. ²³ Woo mwasa, botsiokohuhola ngo so likita. ko liekela, ko liekela, nga ekela onu a lina lila. ²⁴ Tee sikane, botsi longi yema emoyi a lina lila. Bolonge, pe bookoukola, mbuse e yenanga yeino ebayi tsangaa. ²⁵ Le ekelaki onu yoo bakita a mbeko. Emoyi yekeleko, ndji okoekela onu a mbeko, kasi leekoekela onu polele po e likita li aha. ²⁶ Bonombé, bookolonga a lina lila, pe ndjiekeli onu te leoko lombela po eino ngu aha. ²⁷ fuko ine aha matuke ekundji onu, po ine onu pe bokundji ngo, pe boteinolaka 'te ngo le tsui ngu Mongalima. ²⁸ Letsui ngu aha, pe le lui a mwano, sikane nga mina mwano, pe ngakia ngu aha. ²⁹ Bayekoli baka moekela: lita, sikane oeka polele polele, pe otsisi so mbeko. ³⁰ Sikane, tolembeli 'te oye olembeli bakita ngia, pe otsiyali a posa e mito emoyi amouholé; ko loo ndenge, to inoli 'te otsui ngu Mongalima. ³¹ Yesu aka bainoela: bokinola sikane? ³² Lita, yekeleko eyeli, pe ite luaka ko felo, bookotsangana mito a mito mbale elahe, pe bookomine ngo mangine; kasi ndji bayi ngo mangine, fuko ine aha ebayi la ngo. ³³ Le ekelaki onu yoo bakita, po ine boyale a kimia ela. Bookoukola menyoko a mwano,kasi boike ngolu, ngo ngalonga mwano.