¹ O! La onu boko kaki bonangi motema po e mai lilwa muku uwa! Kasi onu bo nanga motema. ² Po ine lebai la yembanda po eino la yembanda ye Mongalima, po aine le te tomesa onu la molome komoi, po ine onu boya yangesi ngi Kilisito aine mohali ano ete lembelaka balome. ³ Sokoyo, saka kune ete hemba fele Eva la bokutu bo ahe, le banga ine bakanesi ba ino ba selengetane po boungesi la bo ya iseisi la lolenge lo Kilisito. ⁴ Po ine,la omoi aka lwa bohani onu Kilisito esiaka aine une ete hana osu, la ambi onu bo ukola Molimo usiaka aine une ute ukula onu, simi ko Mboli e Mongalima esiaka aine ene ete inola onu, bonange motema wali penza. ⁵ Ainzi, le inoli ine nzi te biaka seese e boo ba postolo ba wali. ⁶ La lebai mounga la lolenge lo bopomi, nzi bai so peeni la lolenge lo bolembeli, pe to te enesa katsi eino la kinda ngia pe la bima koitu. ⁷ Soko kahe, li nde kela lisumu po ine, bo ya iselesi ngo matuke po ine onu bo lile, inde sumbela onu so yema mboli i Mongalima? ⁸ Inde tsaka ba Eklezia isiaka, bo ukoli ngibo lifuti limoi po e bosalesi onu. Pe ane ete yalake ngo ngino pe ane ete yalake ngo katsi e bolumbi,nzi te biaka la lisungi li mito; ⁹ po ine bangwaya be te luaka muku u Macedoine bete aesa bine bite lumbake ngo. La bima ngia li nde feta boyali mokumba po e aino, le ko ya fetesa. ¹⁰ Ko la liekela li Kilisito ano ebai katsi ela, le beka aine yoo tsina e nkembo itsi okofesanele ngo katsi e meki me Achaie. ¹¹ Po e mbi? ... Mongalima elembeli! ¹² Kasi lekela pe le okokela sokoyo, po e bo okofesi monga ngi bane be paana monga, po ine bokulane kune aine osu katsi e bima bine bi yakumesa boo. ¹³ Boo baito be bai bapostolo ba isuma, be itami katsi e baposotolo ba Kilisito. ¹⁴ Pe yoo itsi bai bi bokamwiseli, po ine satana yee matuke e itami katsi eanzelu u bongengi. ¹⁵ Itsi yale kahe likamwisi ine basali bahe be itami katsi e basali ba bosembo, suka eibo eko yala kinda e mosala mo aibo. ¹⁶ Le ulela yoo, ata mito omoi atsi lite aine mito o bolema, sokoyo, bo inole ngo aine molema, po aine ngo pe, le yakumesi mai peeni. ¹⁷ Yene ye beke ngo, la bokikimeli boyali la tsina e boya kumesi, nzi beka yoo la kinda e Kolo, kune e lilwa. ¹⁸ Po aine bebai linzi line li yakumesa kinda e monio, ngo le ko ya kumesa kahe. ¹⁹ Po ine bonanga motema le bokundake bo bolema, boyali baito ba bwanya. ²⁰ La omoi e enela onu, la omoi aka mbwa onu, la omoi ebai mo angatala, la omoi e ofa onu a bosio, bonanga motema. ²¹ Lebai la bosambo lo bobeki, to te enesa mbese. Sokoyo, ine ngia ikoki bomeki omoi,- Le poma la kinda e bolema, - Ngo pe, le oko meka! ²² Be yali ba Hebreo? Ngo pe lokola. Beyali ba yelombo ye Abrahama? Ngo pe lokola. ²³ Beyali basali ba Kilisito? - Le beka la kinda e mito ano eungesa bayele. Le yali bo eteli aituta : Kwa mesala, bo eteli bofela, kwa bisuli, kwa bonangemi a linga, bo eteli bofela. Mbala mingi katsi e yelonga ye lokoo, ²⁴ mbala emoi nga ukola ngi bayuda bisuli metuku mekeleka okofesa emoi, ²⁵ mbala isaso inde ofana la keli, mbala emoi bete filingele ngo bamukeli, mbala isaso inde linda a baye, inde etesa mwasa umoi pe botsio bomoi katsi e ngungu. ²⁶ mbala mingi katsi e mobembo, inde biaka katsi e yelonga likolo li libange, la yelonga muku u baito ba bwiba, la yelonga ngi bane ba moki uwa, katsi e yelonga ngi bapagano, la yelonga katsi e hia ifulaku, katsi e yelonga a mbu ilumbi biingi, katsi e yelonga likolo li libange li mokwa, katsi e yelonga katsi ba likinda baiso. ²⁷ Inde biaka katsi e yesili pe katsi e lisengia, bolumbi iloho, la semba pe la kamo e baye, la bokili bolei mbala nzike, la fio pe la bolimbo. ²⁸ Pe, so beka bima bisiaka, liose ngia le lialesana la bakanesi bane be aesi ngo Eklezya ngia. ²⁹ Nda e lembi, aine inzi lembe? Nda e paana bokweyi, aine inde hiake? ³⁰ La ikoki bo ya kumesi, ibai katsi e mbese ela nde eko ya kumesi ngo! ³¹ Mongalima, ano ebai Ise o Kolo Yezu, pe ano ehambolami bikeke la bikeke, elembeli ine nzi kitakolaka!... ³² Katsi e Damas, Kumi e lohia lo Kumi Aretas ete nanga lohia lofulaku lo Damasceniens po e bo mbwi ngo; ³³ kasi bete iselesi ngo katsi e yetanga la lohambi lo yetutu, pe nga uma katsi e bafinzi baibo.