¹ Ba-lokundu, so bakesia bwinoli a molimo kutu, kasi meka melimo, po e bolembeli amba mebayi me Mongalima, tsina ine bofela bo ba polofeta imbembe ilwei katsi e mwano. ² Lembela ine Molimo u Mongalima, molimo ngia une uyambola Yesu elwei a bo mito ebayi o Mingalima; ³ pe molimo ngia une utsiyambola Yesu utsibayi u Mongalima, ubayi une u mito etsi hinoli Klisto ano eokokaki onu bolwei, pe sika ene ebayi kala katsi e mwano. ⁴ Onu bana bake bobayi ba Mongalima, pe bwinolesi wo, po ine ano ebayi ngi ino eheteli ano ebayi a mwano bonene. ⁵ Wo bebayi ba mwano; tsina e motsi eheka wo a yelenge ye mwano, pe mwano wokoki wo. ⁶ Osu tobayi ba Mongalima, ano elembeli Mongalima etokoki osu; ano etsibayi o Mongalima etsitokoka osu; la eelo nga elembela osu molimo u liekela pe molimo u mbembe. ⁷ Ba-lokundo, tokundane bamoyi la basiaka; po ine lokundo lobayi lo Mongalima, pe mito soko mito ekundji eotami ngi Mongalima pe elembeli Mongalima. ⁸ Ano etsi kundji etsilembeli Mongalima, po ine Mongalima ebayi lokundo. ⁹ Lokundo lo Mongalima lwenanaki ngi iso la tsina ine Mongalima akatoma Mona o wae ko omoy a mwano, po ine osu tume laye. ¹⁰ Pe lo lokundo lolitsi ta po ine osu tokundaki Mongalima, kasi la ine etekunda osu pe ete toma Mona o wae aine mwimbaneli u basumo ba iso. ¹¹ Ba-lokundo, la Mongalima e tetokunda osu bune, tokoki pe bokundani osu bangine bamoyi a basia. ¹² Mito so mwasa etena Mongalima; ekumoa boyali ngi iso, pe lokundo lo lae botsibayi a liunga katsi e iso. ¹³ Tolembeli ine tumoyi boyali katsi e lae, pe ine ye umoyi boyali katsi e iso, a yelenge ye tetwaya ye Molimo u wae. ¹⁴ Pe osu to tena pe tokinola ine Aha etetoma Mona aine Mumesi u mwano. ¹⁵ Ano ekoyambola ombe ine Yesu ebayi Mona o Mongalima, Mongalima umoyi boyali ngae, pe ye ngi Mongalima. ¹⁶ Pe osu, tolembelaki lokundo bwiki Mongalima po e iso, pe osu tomwinoelaki. Mongalima ebayi lokundo; pe ano ekumoa a boyali katsi e lokundo umoa katsi e lae. ¹⁷ Ko une eyali ye, ko une osu lokola katsi e une mwano: aimotsi ine lokundo ngi iso lotsiyali a liunga, po ine toyale la bwinolami a mwana u yesambi. ¹⁸ Boangi botsiyali a lokundo, kasi lokundo lolimbi liunga lokofia bowa; po ine boangi bokanesa yetumbo, pe ano e anga ebayi liunga katsi e lokundo. ¹⁹ Po e iso, tomokundji, po ine etetokunda osu mito felo. ²⁰ La mito omoyi akaeka: Lekundji Mongalima, pe ine ebayi a findji e monginena, ebayi mito o isuma, po ine ano etsikundji monginena ano ena ye, iya ekoki ye bokundji Mongalima ano etsena ye? ²¹ Pe twiki mbeko uwae une : Mina ine ano ekundji Mongalima akunde monginena lokola.