¹ Bana yimuka boshi, banaheka Yezu emalanga ga Pilato. ² Bana muheka lubanja, baderha: Rhwarhimanyire oyu muntu alikw'arhirika olubaga, n'oku balahiza okulyula ecitoro emwa kaizari, n'okuciderha yene oku ye Kristo, mwami. ³ Pilato amudosa, omu kuderha: Ka we mwami w'a Bayahudi? Yezu amushuza: Okudesire. ⁴ Pilato abwira abadahwa bakulu n'olubaga: Nta mahushe goshi goshi nbwine e mwoyo muntu. ⁵ Cikwoki banagendekera, n'okuderha mpu: Alikwo ayigiriza olubaga n'oku lushumika omu Yudea, ciru n'e Galilaya, yo arhonderaga, kuhika eno. ⁶ Erhi Pilato ayunva baderha e Galilaya, adosa erhi oyo muntu ali mugalilaya; ⁷ Erhi amanya oku ali w'omu burhegesi bwa Herode, ashubi murhuma emwa Herode, wali e Yerusalemu omw'ezo nsiku. ⁸ Erhi Herode abona Yezu, ashagaluka bwenene; bulya kurhenga mango mali, alicifinjire oku mubona, kushimbana n'ebyali akayunva bamuderhera, n'obulangalire bwage mpu abone ajir'ebisomerine. ⁹ Amudosa madoso manji; cikwoki Yezu arhamushuzagya. ¹⁰ Abagula bakulu na bandisi bali aho, n'oku muderhera ebirhali. ¹¹ Herodi n'abalanzi bage, bamuganyagusa; na, buzinda bamuyambika omushangi mweru, n'okumushubiza emwa Pilato. ¹² Olwo lusiku lonene, Pilato na Herodi bayinjibana n'obwo bali shombine burhanzi. ¹³ Olwo lusiku Pilato arhumbika abagula bakulu, bazuzi, n'olubaga, ¹⁴ ababwira: Mwandwirhire oyu muntu nk'oli wagomesa olubaga. Nani nanamudosa emalanga ginyu, ntamubwine kwo chijiro cibi ciru n'eciguma omubyoshi mwamuderhire; ¹⁵ Herode naye kwonokwo, aciri rhurhumira ye, kuziga ntaco oyo muntu ajijire cikwanine afe. ¹⁶ Namulika, enyuma ly'oku mushurhisa orhurhi. ¹⁷ Ngasi lusiku lukulu, byali shinganine balike mushwekwa muguma. ¹⁸ Boshi haguma bayakuza: Oyirhe oyu, orhulikire Baraba. ¹⁹ Oyo muntu ahebirwe omu mugozi erhi bugoma ajiraga omu lugo, n'obunizi. ²⁰ Pilato aciri babwira buhyahya, omukulonza okulika Yezu. ²¹ Banacikubiza: Ayirhwe, ayirhwe! ²² Pilato aciri babwira bwa kasharhu: Bubi buci ajijire? Ntabwini bici byankarhuma afa. Namulika hano mba namomushurhisa orhurhi. ²³ Cikwone banagendekera bayakuza n'okuhuna okw'anigwe. OKuyama kwabo kwaluga: ²⁴ Pilato ayakuza oku eci bahunaga cajirwa. ²⁵ Alikula olya wahebagwa omu mugozi erhi obugoma n'obunizi burhuma, bulya kwo bali lonzize; abaha Yezu bamujire nk'oku banalonzize. ²⁶ Erhi bakola bamudwirhe, bagwarha Simoni wa Kweno, erhi afuluka omu mashwa, bamuberhuza omusalaba mpu aguberhule enyuma lya Yezu. ²⁷ Olubaga lunene lwali bashimbulire, n'abakazi bajaga bacishurha ebifuba n'okuci duduma enyanya lyage. ²⁸ Lero Yezu abahindamukira n'oku babwira: Erhi banyere be Yerusalemu, murha ndakire nye; ci mucilakire mwene n'abana binyu. ²⁹ Bulya, ensiku ziyishire bashikaderha: Iragi emw'engumba, iragi ly'enda zirhaburhaga, n'amabere garhayonsagya! ³⁰ Lero bashirhondera n'okubwira entondo: Murhu hirimire! n'ebirhwa: murhu bwikire! ³¹ Nka bankajira omurhi mubishi ntya, gurhi byahikira oku murhi mûmu? ³² Olwo lusiku bali hesire ebishumusi bibiri, byali shinganinwe okunigwa haguma na Yezu. ³³ Erhi bahika oku ntondo edesirwe kanpanga, bamu manika oku musalaba haguma na balya babi babiri, muguma ekulyo, owindi ekumosho. ³⁴ Lero Yezu aderha: Larha, oba babalire bulya barhamanyiri ebi bajijire. Baja cigole, n'okugaba emishangi yage. ³⁵ Olubaga lwali aho, luli lwalola. Abatwi b'emanja baganyagusa Yezu, n'okuderha: Acizize abandi, Aci cizagy' aho; nkaba Ali Kristo, mwishogwa wa Mungu! ³⁶ Ciru n'abasirika nabo bamu ganyagusa bwenene; baka muyegera n'oku munywesa amishi malulu, ³⁷ Bakaderha: Nkaba oli mwami w'a Bayahudi, cicize wene! ³⁸ N'oku nyanya ly'ogwo murhi bali yandisire: "Oyu ye mwami wa bayahudi". ³⁹ Muguma w'abo bashambo arhondera ajacira, n'okuderha: K'orhali Kristu? Cicize wene, na nirhu orhucize! ⁴⁰ Cikwoki owindi alongoza owabo, n'okuderha: Orha yobohiri Nnamuzinda, we ohabirwe obuhane buguma naye? ⁴¹ Ci rhwehe bishinganine n'ebyo rhwajijire, cikwoki yehe arhagwerhi mahushe goshi goshi. ⁴² Lero abwira Yezu: Onkengere, han'oja omu bwami bwawe. ⁴³ Yezu amushuza: Nkubwizire n'obwalagale bwoshi, ene waba haguma na nani omu paradizo. ⁴⁴ Hali hofi omu kagarhi k'omulegerege, omwizizi gwaba omw'igulu lyoshi kuhika aha nsa mwenda z'omulegerege. ⁴⁵ Izuba lyaja mw'omwizizi, n'omushangi gw'omu kagombe gwabereka mwo kabiri. ⁴⁶ lero yezu akubiza okw'izu linene: "larha mbisire omurhima gwani omu maboko gawe". n'omwako kasangi ana hola. ⁴⁷ omukulu w'abasirika erhi abona echana hikirira, akoza Nnamuzinda, ana derha: kwobinali, oyo muntu ali mushinganyanya. ⁴⁸ Na balya boshi bali aho kusinza eco cajirikanaga, erhi babona ecahikirire, bagaluka baja bacishura oku cifuba. ⁴⁹ Boshi balimanyire Yezu, n'abakazi bali mulusize kurhenga e galilaya, bali yimanzire hali n'okusinza ecali kajirikana. ⁵⁰ Hali omuhanuzi, alikwo ahamagalwa okw'izino lya Yosefu, ali muntu mwinja na mushinganyanya. ⁵¹ Nta mango ayemire ihano n'ebijiro bya babo; ali w'e Arimatayo, murhundu gw'e Buyahudi, anakagi lindirira obwami bwa Nnamuzinda. ⁵² Oyo mulume aja emwa Pilato, anahuna omubiri gwa Yezu. ⁵³ Aguhonosa oku musalaba, aguboha omu mishangi, n'oku gubisha omu nshinda, erhali cihebwa mw'owindi muntu. ⁵⁴ Lwali lusiku lwa marheganyo, n'esabato yalikola yarhondera. ⁵⁵ Abakazi barhengaga e Galilaya haguma na Yesu balusa Yosefu, babona enshinda na gurhi omubiri gwa Yesu gwali mudekereze, ⁵⁶ Banagaluka, banarheganya amavurha g'ibaya n'amarasi. Bana rhamuka olusiku lwa Sabato, nkolu byali rhegesirwe.