¹ Yezu alambula amasu gage, abona abahirhi bahere baheba entulo omu isandaku ly'okubikira. ² Abona mukana muguma mukenyi, ahiramwo masengi gabiri masungunu. ³ aderha erhi: okuli mubwizire, oyu mukana mukenyi ahizire binji kulusha abandi boshi; ⁴ Bulya omu kulugirwa kw'ebirugu binji kwo bahebire mwo omu cibikiro c'entulo, cikwone oyu kulonza kwage ahizire mwo ngasibyoshi analigwerhe, okumulamisa. ⁵ N'amango baguma omu bantu bajaga derha ogw'abuye minja n'ogw'entulo baliyubasire mwo ishengero, Yezu aderha erhi: ⁶ Ensiku zayisha, amango ebi muli mwalola, harhasigale ibuye enyanya l'ibuye buzira okushabwa. ⁷ Bamudosa baderha mpu: mwalimu, mangaci eyi myanzi yahika, na cimanyiso cici caba amango eyomyanzi yaba hofi h'okuhikirira? ⁸ Yezu ashuza erhi: Mucilange murharhebwe. Bulya banji bayisha okw'izino lyani, baderha mpu: nie ye,kandi amango gakola gayegerire. Murhabakulikiraga. ⁹ amango mwayunva baderha ogw'entambala n'obwagalwa, murhayobohaga, bulya kukwanine eyi myanzi ehikirire burhanzi. Ciwone ago mango g'obuzinda burhacihika. ¹⁰ Nantyo ababwira erhi: Omulala gwalwa n'ogundi mulala, n'obwami okulwa n'obundi bwami; ¹¹ n'omusisi gwaba enigulu, na hantu endwala z'ecisha, ecizombo, n'emyanzi y'oku yobohya, n'ebimanyiso binene kurhenga empingu. ¹² Cikwone, embere z'ebyo byoshi bamugwarha, n'okumulibuza; bamulerha emalanga g'amasinagogi, n'oku muhira omu mugozi, mwa hirwa emalanga g'abami na barhambo enyanya ly'izino lyani. ¹³ Cikwone ebyo bwaba budima kulimwe. ¹⁴ Ntyo murheganye eyo myanzi omu mirhima yinyu, murhagererezagyw burhanzi mpu gurhi rhwashuza; ¹⁵ Bulya niene namuha omwanzi n'obwenge ciru abashombanyi binyu barhahashe oku shuza erhi okuhimana nako. ¹⁶ Mwahanwa ciru n'ababusi binyu, na benewinyu, n'emilala yinyu n'abira binyu na bayisa banji mulimwe. ¹⁷ Mwashombwa n'abantu boshi; enyanya l'izino lyani. ¹⁸ Cikwone kurharhereke ciru n'oluviri luguma okw'irhwe linyu; ¹⁹ oku bushibirizi bwinyu mwafumya emirhima yinyu. ²⁰ cikwone amango mwabona eyerusalemu ekola ezungulusirwe n'olubaga lw'abasirika, mumanye oku okusherera kwalyo kukola kuli hofi. ²¹ N'agomango abantu bali ayudeya bayakira oku ntondo, nabo bali omu kagarhi k'eyerusalemu bahuluka, nabo bali omu mashwa barhashidahe omu lugo. ²² Bulya ntyo ezi nsiku ziri za kucihola, lyo ebyo byayandisirwe byoshi bihikirira. ²³ Obuhanya okubakazi bali mazimi, n'abalibayonsa muli ezonsiku! Bulya obuhanya bunene bwaba enyanya l'igulu, n'oburhe enyanya ly'aba bantu. ²⁴ N'abo bahirima oku bwoji bw'engorho, bahekwa mpira omu milala yoshi, n'eyerusalemu yalabarhwa n;ab'eyindi milala, kuhika amango g'ezo mbaga gahikirire. ²⁵ N'ebimanyiso byaba omw'izuba, omu mwezi n'omu nyeneyezi. N'omu igulu oburhindibuke omu mbaga barhamanye oku bajira, oku mukungulo gw'enyanja n'akalaba. ²⁶ Abantu bakahola n'ecoba c'okulindirira ebyahikira igulu; bulya emisi y'amalunga ya dirhimanyibwa. ²⁷ N'agomango babona mwene omuntu ayisha omu hitû n'obuhashe n'obukuze bunene. ²⁸ Amango ebyo byarhangira okuhika, mugalamire enyanya muyinamule amarhwe ginyu, bulya obucize bwinyu bukola buli hofi. ²⁹ Ababwira omugani erhi: mulole omuzetuni n'enyindi mirhi yoshi. ³⁰ Amango mwabona ebyo byarhangira oku shoga, munabone n'okumanyirira oku ecanda ciri hofi cihwe. ³¹ Ninyu ntyo, hano mubona eyo myanzi erhangira, mumanye oku obwami bwa Nnamahanga bukola buli hofi. ³² Okuli mubwizire, ogu mwimo gurhagere kuhika ebyobyoshi bihikirire. ³³ Empingu n'igulu byagera, cikwoki emyanzi yani erhagere ciru n'ehitya. ³⁴ Cikwone mucilange mwene, emirhima yinyu erhakizidoherwa enyanya ly'obudambye n'obulalwe n'amalibuko g'akalamu, olwo lusiku luragiyishi muyishira murhana cirheganyizi. ³⁵ Bulya byayisha k'oku murhego gugwarha enyanya lyabo bayishiba bali omu igulu lyoshi. ³⁶ Mucirheganye ngasi kasanzi, muhune lyo muhabwa emisi y'okuyaka eyo myanzi yoshi amango yaba, n'okuyimanga emalanga ga mwene omuntu. ³⁷ Ntyo ngasi mushi, akagi yigiriza omu ishengero, n'amango g'obudufu agendi kalala oku ntondo y'emizetuni. ³⁸ N'abantu boshi, balamukira sezisezi, emundali omu ishengero oku muyunvirhiza.