¹ Hali lusiku luguma omw'ezo nsiku, amango Yezu akagiyigiriza abantu omu ishengero n'oku babwira emyanzi minja, abagula bakulu n'abakarani, haguma n'abashosi, baja emundali. ² bamubwira mpu: Orhubwire oku buhashe buci ojiramwo eyi myanzi? Na ndi wakuhaga obu buhashe? ³ Abashuza, ababwira erhi: Nani namudosa mwanzi muguma. ⁴ Munshuze, k'obubatizo bwa Yohana bwarhengaga empingu, erhi oku bantu? ⁵ Badosanya omu garhikabo: Baderha mpu: Nka rhwankaderha oku bwarhengaga empingu, aderha mpu: Bici byarhumaga murhaci muyemera? ⁶ Cikwone rhukaderha oku bwarhengaga oku bantu, abantu boshi bashirhuband'amabuye, bulya bayemire oku Yohana ali mulebi. ⁷ Bashuza oku barhamanyiri aha bwarhengaga. ⁸ Na Yezu ababwira erhi: Ciru nani ntamubwire oku buhashe buci njira mw'eyi myanzi. ⁹ Arhangira okubwira abantu ogu mugani mpu: Muntu muguma, arhweraga ishwa ly'emizabibu, ahandisa mw'abahinzi, abalamira omu cindi cihugo okunsiku nyinji. ¹⁰ N'amango g'okusarhula, arhuma omwambali kuli abo bahinzi, mpu bamuhe ecihimbi c'ago malehe g'emizabibu. Cikwone abahinzi bamushurha, bamuhinva maboko mumu. ¹¹ Nakandi arhuma owundi mwambali,naye bamushurhantyo, bamujira kubi, bamuhinva buzira kantu. ¹² Nakandi arhuma owakasharhu; bamuyagaza, bamukweba embuga. ¹³ Ntyo nahano w'ishwa aderha: Gurhi najira? Narhuma mugala wani muzigirwa wani,nkaba yehe bamukenga. ¹⁴ cikwone, abo bahinzi erhi bamubona, baderhezanya, baderha mpu: oyu y'enfula; rhumuyirhe ly'omwimo guba gwirhu. ¹⁵ Bamuhabulira eburhambi bw'ishwa ly'emizabibu, bamuyirha. Oyo nahano w'ishwa ly'emizabibu bici abajirira? ¹⁶ Ayisha n'okushereza abo bahinzi, lirya ishwa ly'emizabibu aliha abandi. Amango bayunvagya eyo myanzi, baderha mpu: mpu nanga ciru n'ehitya! ¹⁷ Cokwone, abalolereza aderha erhi; ntyo ogumwandiko biri bici: Ibuye balahirag'abubasi lyabire ibuye linene lyoku rhangiza? ¹⁸ Ngasi muntu wahirima enyanya lyer'ibuye avunika, na ngasi muntu lya hirimira lya muvungunyula. ¹⁹ Abagula bakulu n'abandisi balonza oku mugwarha muli ezo nsa, ci bayoboha abantu. Bulya bamanyirire oku aderhaga ogu mugani enyanya lyabo. ²⁰ Barhangira balolereza Yezu; barhuma abantu oku yunverheza emyanzi yage, nabo acijira okuba b'okuli, mpu lyo babona gurhi bamugwarha kawa oku myanzi yage, mpulyo bamuhira oku batwi b'emanja n'oku buhashe bw'omurhambo. ²¹ Abo bantu bamudosa baderha:Mwalimu, rhumanyire oku oanaderhe n'okuyigiriza emyanzi y'okuli, ciru orhalola obusu bw'omuntu cikwone okuli onayigirize enjira ya Nnamahanga. ²² Ka kurhukwanine, erhi nanga okuha Kaisari ibarati? ²³ Yezu amanyirira oburhebanyi bwabo, ababwira erhi: Munyereke olufaranga. ²⁴ Egwerhe nshusho yandi na mandiko gandi galikwo gandi? Baderha mpu ga Kaisari. ²⁵ Lero ababwira: Muhe Kaisari ebiri bya Kaisari, Nnamahanga ebiri bya Nnamahanga. ²⁶ Cikwone barhamukulaga kwa kanwa embere z'olubaga. Kwone basomerwa oku kushuza kwage, bahulika. ²⁷ Abandi b'omu basadukayo, bobaderha mpu nta kufuka baja emundali bamudosa: ²⁸ Baderha mpu mwalimu, alaga oku Musa arhurhegesire ihano: mpu nka mwene wabo omuntu ankafa, naye nka agwerhe omukazi na nk'arhagwerhi mwana, mwene wabo anayanka olya mukazi, aburhire mwene wabo abana. ²⁹ Nantyo, hali balondanyi nda. Owaburanzi aja omubuhya, anafa arhaburhaga mwana. ³⁰ Owakabiri n'owa kasharhu bayanka oy mukazi; ³¹ Ciru boshi oku banali nda banafa barhasigaga bana, ³² na buzinda bw'aho oyo mukazi naye afa. ³³ Ntyo omumango g'okufuka, ayishiba muka ndi omugarhi kabo? Bulya aliyansirwe nabo boshi oku banali nda. ³⁴ Yezu ababwira erhi: Abana b'enigulu baje omu buhya n'oku heruka; ³⁵ Cikwone abo baganjirwa oku bakwanine okuhika oku kasanzi kayisha n'okufuka okurhenga omu bafu barhaj'omubuhya; ciru barhaheruka. ³⁶ Bulya barhankacihasha okufa, bulya bayishi shushana ba malaika kandi bayishiba bana ba Nnamahanga, balikandi bana b'okufuka. ³⁷ Cikwone bulya abafu bafulwa, ciru Musa ayerekine oku, biyerekire ishaka, ahamagire Nnahamwirhu oku Nnamahanga wa Abrahamu, Isaka, na Nnamahnga wa Yakobo. ³⁸ Cikwone, Nnamahanga arhali Mungu wa bafu, cikwone ali w'abazine: Balya bantu boshi bagwerhe obuzine muliye. ³⁹ N'abandi b'omu bakarani, bashuza bamubwira: mwalimu, wadesire bwinja. ⁴⁰ Barhanaci shubiriraga bamudosa omwanzi kandi. ⁴¹ Yezu ababwira erhi: Bici birhuma abantu baderha mpu Kristu ali mwene Daudi? ⁴² Bulya Daudi yene adesire omu citabu c'enanga erhi: NNAHAMWIRHU abwizire Nnahamwirhu: Otamale omu kuboko kwani kulyo, ⁴³ Kuhika mpebe abashombanyi bawe idaku ly'enshando zawe. ⁴⁴ Ntyo Daudi amuderha mpu Nnahamwirhu; Ntyo gurhi ali mugala wage? ⁴⁵ N'amango abantu boshi bakagi muyunvirhiza, abwier'abaganda bage erhi: Mucilange oku bakarani, abo basima okugenda banayambirhe emishangi miriri, n'oku lamusibwa omu byambu, n'okutamala emalanga omu masinagogi, n'ahantu h'embere omu idinye; ⁴⁷ bananyage enyumpa z'abakana, n'omu burhebanyi bahuna amahuno maliri, abo banabone olubanja lunene kulusha.