¹ Yezu, erhi aja eyeriko, agerera omu murhundu. ² Alaga, muntu mugale, ohamagalwa Zakayo, murhagesi wa bavurhisa, ³ alilonzize oku bona Yezu yendi; ci arhakahashire enyanya z'olubaga, bulya ali mwofi. ⁴ alibirha embere, ashonera oku murhi gw'omukuyu mpu lyo amubona, bulya aligwasirwe agere aho. ⁵ Erhi Yezu ahika aho, ayinamula amasu amubwira: Zakayo, jira duba ohonoke; bulya ngwasirwe mbe omumwawe ene. ⁶ Zakayo ahonoka dubaduba, amuyegereza oku mwishingwe. ⁷ Erhi babonantyo, boshi bacilumbija, n'okuderha, ajirihanda emwa omupagani. ⁸ Cikwona Zakayo, ayimanga embere na nnahamwirhu, amubwira: lolaga, Nnahamwirhu, mpire abakenyi ecihimbi c'ebirugu byani, nan akaba nanyazire omuntu akantu, namugalulira kani. ⁹ Yezu amubwira: Obucunguke budahire ene omweyi nyumpa, bulya oyu nayae anali mugala wa abraahamu. ¹⁰ Bulya mwene omuntu ayishiri lonza n'okuciza abali hezire. ¹¹ Bakagi yunv'ebyo, na Yezu ayushula omugani, bulya alihofi n'eyerusalemu, banalimanyire omwago mango obwami bwa Nnamahanga bwaboneka. ¹² Aderhaga: Muntu muguma olengerire agenda omu cihugo c'ekuli, mpu ajihebayo obukulu bw'akanabwami, na buzinda agaluke. ¹³ Ahamagala ikumi omu bakozi bage, abaha bicere ikumi n'okubabwira: muje mwabirhimula kuhika ngaluke. ¹⁴ Cikwone benewabo bamuganyagus, bamurhumira entumwa, mpu emubwire: Rhurhalonzizi oyu muntu arhurhegeke. ¹⁵ Erhi agaluka enyuma z'okuyimikwa oburhwali bw'akanabwami, ahamagala hofi naye balya bakozi asigiraga enfaranga, mpu lyo amanya oku ngasi muguma azikolesize. ¹⁶ Omurhanzi ayisha aderha: Ecicere cawe cayungusire bicere ikumi. ¹⁷ Amubwira: Biri binja mukozi mwinja; bulya wali mwikubagirwa oku bitya, ohabwe okurhegeka mirhundu ikumi. ¹⁸ N'owakabiri ayisha aderha: Nnahamwirhu, ehishweko hyawe hyayungusire rhushweko rhurhanu. ¹⁹ Amubwira ntya: Nawe, oyime nyo enyanya za mihundu irhanu. ²⁰ N'owundi ayisha, aderha: Nnahamwirhu, olole ehishweko hyawe hy'enfaranga, nalihibisire mpibohire omu citambara; ²¹ Bulya nali nkuyoboha, bulya oli muntu mudarhi; onabikule ebi orhabikaga, onasarhule ebi orha rhweraga. ²² Amubwira erhi: Nakuyaza kurhenga ebinwa by'akanwa kawe wene, we murhumisi mubi; walimanyire oku ndi muntu mukali, nambikule ebi ntabikaga; ²³ Ntyo cici carhumire orhabika efaranga zani oku ibanki, nani hano ngaluka nzirhole n'obunguke bwazo? ²⁴ Lero abwira abobaliyimanzire aho; Mumukule ehyo hishweko hy'enfaranga, muhihe oyu ogwerhe rhushweko ikumi. ²⁵ Bamubwira erhi: nnahamwirhu, agwerhe rhushweko ikumi rhwa nfaranga. ²⁶ Mubwizire oku, ngasi muntu ogwerhe akantu ahabwa, cikwone orhagwerhi kantu ako agwerhe karhenzibwa kuliye. ²⁷ Cikwone, mulerhe aba bashombanyi bani, abo barhalonzizi mpu nyime enyanya lyabo, mubayirhire emalanga gani. ²⁸ Erhi aba amaderha ntyo, Yezu agenderera embere ly'olubaga, oku rheremera eyerusalemu. ²⁹ Erhi ali hofi h'okuhika ebetifage n'ebetaniya, kuyerekera oku ntondo ederhwa y'emizetuni, yezu arhuma babiri b'omu baganda bage, ³⁰ aderha erhi: Mugende omu lug luli emalanga ginyu; na hano mulujamwo, mwabona akanina ka punda kashwesirwe, ntamuntu osagi kagendakwo, mukashwekule, munakalerhe. ³¹ Na nk'omuntu akamudosa mpu: Bici birhumire mwakashwekula? Muderhe ntya: Bulya Nnahamwirhu akalonzize. ³² Nabo barhumagwa bagenda, banabona ebintu n'oku Yezu anababwiraga. ³³ n'amango bajaga bashwekula akanina ka punda, beneko babadosa mpu, cirhumire mwashwekula akanina ka punda? ³⁴ Baderha mpu: Nnahamwirhu akalonzize. ³⁵ Bakalerhera Yezu , banakweba emishangi yabo enyanya lyako. ³⁶ N'erhi akola agenda, abantu babumba emishangi yabo omunjira. ³⁷ N'erhi aba ayegera eyerusalemu, hofi n;omwandaglo gw'entondo y'emizetuni, olubaga lwoshi lw'abigirizibwa, bagwarhwa n'obushagaluke, lwarhangira oku kuza Nnamahanga n'izu linene, enyanya ly'ebijiro byoshi byobuhashe ebyo babonaga. ³⁸ Baderha mpu: Mugishwa oyishire okw'izino lya Nnahamwirhu!Omurhula empingu n'obukuze omuhantu henyanya bwenene! ³⁹ N'abandi bafarisayo, b;omu kagarhi k'olubaga, babwira Yezu mpu: Mwalimu, okalihire abigiribwa bawe. ⁴⁰ Ashuza: aderha erhi, mubwizire, erhi akaba aba bankahulika, amabuye g;anabanda endulu! ⁴¹ Naye erhi ayegera hofi n'omurhundu, Yezu erhi agubona agulakia, aderha erhi: ⁴² Akaba walimanyire muli olu lusiku ohirwe! emyanzi eyerekire omurhula gwawe! Cikwone buno eri mifulike omu masu gawe. ⁴³ Bulya ensiku zayisha enyanya lyawe, amango abashombanyi bawe bayubaka ecogo eburhambi bwawe, banakuzunguluka banakuhanza oku ngasi ntambi; ⁴⁴ Ciru bana kushurha shurha okwidaho, mwen'abana bawe muliwe, barhakuleke ibuye liguma enyanya z'erindi, bulya orhamanyiraga amango g'oku lolwa kwawe. ⁴⁵ Aja omu ishengero, arhangira okubahulsa abakagiguza n'abakagigula, ⁴⁶ Ababwira mpu: Byayandisirwe oku: enyumpa yani yaba nyumpa ya kuhuniramwo. Cikwone mukola muyijijire nyumpa ya bishumusi. ⁴⁷ Ajaga ayigiriza ensiku zoshi omu ishengero. Cikwone abagula bakulu omu kagarhi k'abantu balonzagya oku mushereza; ⁴⁸ Cikwone barhabonaga okubajira, bulya abantu boshi bamufundeza bamuyunvirhiza oku bushagaluke.