¹ Yezu aderha omugani, mpu abayerese oku bikwanine oku shenga buzira okurhama. ² aderha: Omu murhundu muguma mwabaga omuzuzi orhayobohaga Nnamahanga arhanacigonzagya muntu. ³ Omw'ogwo murhundu mwabaga mukana muguma wakagi yishi mubwira: Otwire olubanja oku bashombanyi bani. ⁴ Akalahira kurhenga nsiku nyinji. Cikwone buzinda acibwira yene: Ciru akaba ntayooha Nnamahanga ntana cigonza muntu, ⁵ Cokwone, bulya oyu mukana ana ndibuza, namutwira olubanja, lyo arhacikayisha burhahusa oku mber'irhwe. ⁶ Nnahamwirhu ayushula: yunva ebi omuzuzi mubi adesire. ⁷ Na ka Nnamahanga arhatwire abishogwa bage olubanja, bamulakira budufu na mushi; na k'ayorherera oku bibayerekire? ⁸ Nmubwizire, abajirira dubaduba oku batwira olubanja. Cikwone, ka hano omwana w'omuntu ayisha, kayishi rhimana obwemere omw'igulu? ⁹ Aciriderha ogu mugani; enyanya z'abantu bakagi cibona nka bali bashinganya, n'oku ganyagusa abandi boshi: ¹⁰ Bantu babiri bajaga omw'isengero okusalira; muguma mufarisayo n'owundi muvurhisa. ¹¹ Omufarisayo, bwimanga, ahuna ntya muliyene: Ewe Nnamahanga, nkukuzizzze bulya ntayosiri nk'abandi banu, bali banyazi, barhashinganini, bashungu erhi nk'oyu muvurhisa; ¹² Nankajira amahuno g'oku cishalisa kabiri omu mugobe, nankahana ecihimbi ca kalikumi c'obunguke bwani. ¹³ Omuvurhisa, aciyegula, arhageraga oku sinza enyanya, ci acishurha oku cifuba, n'okuderha emwa Nnamahanga, orhambere burhe, nie munabyaha. ¹⁴ Nmubwizire, oyu ayandagalire omu mwage erhi aganjirwe okuli, kuleka oyo mufarisayo. Bulya ngasi owaciyinula ahonolwa, na ngasi wacihonola ayinamulwa. ¹⁵ Bamulerhera kandi abana barho, mpu abahumekwo. Cikwone abigirizibwa bage, erhi babonantyo, bakalihira abalibadwirhe. ¹⁶ Na Yezu abahamagala, anaderha: Muleke abana barho bayish'emwani, murhana barhange, bulya obwami bwa Nnamahanga buli bwa ababashushire. ¹⁷ Nmubwizire okunali, orhayankirire obwami bwa Nnamahanga nka mwana murho arhanka mudaha. ¹⁸ Murhegesi muguma adosa Yezu, aderha: Mwigiriza minja, bici ngwasirwe okujira lyo nyima obulamu bw'emyakula? ¹⁹ Yezu amushuza: Bulyagurhi ompamagire mwinja, ntaye mwinja nka Nnamahanga yene. ²⁰ Omanyirire amarhegeko: orhakazi gona; orhakazi niga; orhaka zimba; orhakagi hamiriza obunywesi; okenge sho na nyoko. ²¹ Aderha, kukenga nkenga ebyo byoshi kurhangira obusole bwani. ²² Yezu erhi ayunva ntyo, amubwira: kucikubulire kantu kaguma: oguz'ebyugwerhe byoshi, ogabire abakenyi, nawe wacibikira omuhako omu mpingu. buzinda oyishe onkulikire. ²³ Erhi ayunva ebyo binwa, agaya, bulya ali mugale bwenene. ²⁴ Yezu, abona oku amagaya, aderha: Biri bizibu bwenene oku bagwerhe obugale okudaha omu bwami bwa Nnamahanga! ²⁵ Bulya biri birembu engamiya okugera omu murhule gw'ensindani kulusha omugale okudaha omu bwami bwa Nnamahanga. ²⁶ Abakagi muyunva baderha: nandigi waka cunguka? ²⁷ Yezu ashuza: Ebirhaka hashikana oku bantu bihashikine emwa Nnamahanga. ²⁸ Lero Petro aderha: Alaga, rhwalesire byoshi rhwa kukulikira. ²⁹ Na Yezu ababwira: Mubwizire okunali, ntaye muntu, walesire erhi bwami bwa Nnamahanga burhuma, erhi babusi bage, erhi bana bage, ³⁰ wabula kukumarha binene omuzino nsiku, n'omu nsiku zayisha obuzine bw'emyakula. ³¹ Yezu ayegera balya ikumi na babiri, ababwira: alaga, rhuyinamukire eyerusalemu, na ngasibyo byayandikagwa n'abalebi oku biyerekire omwana w'omuntu byahikirira. ³² Bulya ahanwa oku bapagani; bamujacira, bamulibuza, bamutwirakwo, ³³ N'enyuma ly'oku mushurha orhurhi, bamuyirha; n'olusiku lwakasharhu afuka. ³⁴ Cikwone barhayunvagya bici kulibyo; kulibo lyal'ihwe,myanzi barhankayunva ecirhumire. ³⁵ Erhi Yezu ayegera eyeriko, muhurha muguma alitamire eburhambi bw'enjira akagi hunira obuligo. ³⁶ Aynva o,lubaga lwagera, adosa bicibyo. ³⁷ Bamubwira: Yezu w'enanzareti oyo wagera. ³⁸ Ayakuza: Yezu, mugala wa Daudi, ombere obwonjo! ³⁹ Abali omu lugenzi bamukalihira, mpu bamuhulise, cikwone agendekera oku yakuza bwenene: Mugala wa Daudi, ombere obwonjo! ⁴⁰ Yezu ayimanga, arhegeka oku bamulerhere ye; n'erhi amuyegera, ⁴¹ amudosa, bici olonzize nkujirire? Ashuza: Nnahamwirhu, nonzize okubona. ⁴² Na Yezu amubwira: bona; obwemere bwawe bwanakuciza. ⁴³ honaho abona, anakulikira Yezu, n'oku kuza Nnamahanga. Olubaga lwoshi, erhi lubon'ebyo, lwakuza nnamahanga.