¹ Enyuma zaho, Yezu ashubi ciyerekana emw'entumwa zage, uku burhambi bw'enyanja y'Etiberiya. Alaga nkagurhi aciyerekanaga. ² Simoni Petro, Tomaso oderhwa Kahasha, Natanayeli, w'e Kanani omu Galilaya, bagala ba Zebadayo, haguma na zindi ntumwa ibiri za Yezu, erhi bacigushire haguma. ³ Simoni Petro amubwira mpu: Nkola najiloba. Banacimubwira mpu: Nirhu rhwagenda haguma nawe. Banacihuluka bashonera omu bwarho, ci omw'obwo budufu barhabonaga bici. ⁴ Erhi buca, erhi Yezu ako ali ishiriza; ci entumwa zirhamanyaga oku ye Yezu. ⁵ Yezu abadôsa mpu: mwebana, kanta kalyo mugwerhe? Bamushuza mpu: Ntako. ⁶ Ababwira erhi: Mukwebe akeshe ebwa kuboko kulyo kw'obwarho, mwagwasa. Honaho bakakweba, ci barhacihashaga oku kakulula, enyanya ly'obunji bw'enfi (nsamaki). ⁷ Lero erya ntumwa Yezu asimaga ya bwira Petro mpu: Amaba Nnâhamwabo! na Simoni Petro, erhi ayusi yunva oku ye Nnâhamwabo, ayambala imishangi yage n'omukaba bulya ali bushugunu, n'okuchi kweba omu nyanja . ⁸ Enzindi ntumwa barhenga omu bwarho, bakulula akeshe erhi kayunjwire nsamaki, bulya baciri kuli n'ishiriza z'enyanja hali nka hamakano magana abiri. ⁹ Erhi bahonokera okw'idaho, babona amakala gayasire, galiko ensaki, n'omugati. ¹⁰ Yezu ababwira erhi: Lerhagi ensamaki mwadubire. ¹¹ Simon Petro ashonera omu bwarho, n'oku kulula akeshe kayunjwire nsamaki igana na makumi arhanu na zisharhu nnenene; ciri ankaba zali nyinji, akeshe karhatwikaga. ¹² Yezu Anacibabwira: Yishagi, mulye. Na ntayo ntumwa yaco mudosize: mpu wendi? bali manyire oku ali Nnâhamwabo. ¹³ Yezu abayegera, arhola omugati, abaha; abaha n'enfi. ¹⁴ Bwalikola bwa kasharhu Yezu aciyerekana emw'entumwa zage enyuma ly'okufuka kwage omubafu. ¹⁵ Erhi bayusa okulya, Yezu abwira Simoni Petro: mpu Simoni, mugala wa Yona, konzigira kulusha oku ababandi banzigira? Anacimushuza: Neci, Nnâhamwirhu, oyishi oku nkuzigira. Yezu amubwira mpu: Oyabule ebibuzi byani. ¹⁶ Ashubi mubwira obwaka biri: Simoni, mwene Yona, konsima? Petro amushuza mpu: Neci, Nnâhamwirhu, oyishi oku nkusima. Yezu amubwira: Oyabule ebibuzi byani. ¹⁷ Amubwira obwa kasharhu erhi: Simoni, mwene Yona, konsima? Petro agaya oku byo amudosagya obwa kasharhu: Konsima? Anacimushuza: Nnâhamwirhu, oyishi byoshi, onamanyire oku nkusima. Yezu amubwira: Lis'abanabuzi bani. ¹⁸ Okunali, okunali, nku bwizire, amango waciri musole, wakagi cikabika wene, wakagija n'ahonalonzinze; ci hano obamushosi, wayishikalambul'okuboko, n'owundi akukabikire, akuheke n'ah'orhalonzizi. ¹⁹ Adesire ebyo omu okumanyisa okulufu luci Petro ayishikuza mwo Nnâmahanga. Erhi aciri aderha, amubwira: Nshimba. ²⁰ Petro, erhi akebagana, abona erya ntumwa Yezu asimaga, olya, enyuma ly'okushega, aliyegemire oku cifuba ca Yezu, anaciderha mpu: Nnâhamwirhu, ndi olya wakuhana? ²¹ Erhi Petro amubona, anacibwira Yezu mpu: N'oyu, we Nnâhamwirhu, gurhi bya ishi mubera? ²² Yezu amubwira: Nkalonza okw'abere ho kuhika nyishe, bici bya kulerhera? Wehe onshimbe. ²³ Ahanyanya lyokwo, emyanzi ya lumira emyabene wabo oku eyo ntumwa erhakafa. N'obyo Yezu arhabwiraga Petro oku oyo arhakafa; ci mpu: Nka nankalonza ahebere kuhika ngaluke; bici byakuyungula? ²⁴ Eyo ntumwa ye muhamirizi w'ebyo, ye wanabiyandikaga. Rhunamanyire oku obuhamîrizi bwage buli bw'okunali. ²⁵ Yezu ajizire bindi binji; nka byanka yandisirwe higum'oku higuma ntarhanynizi erhi igulu ciru lyankabwin'ebitabu byaja mwo.