¹ Olusiku lurhanzi lw'omugobe, Maria w'Emagdalene alamukira ebwa cusho, hibungubungu, oku muceracera; anacibona barhenzire lir'ibuye oku nshinda. ² Alibirhira emunda Simoni Petro ali n'emunda erya yindi ntumwa Yezu azigiraga, ntya anababwira: Bakuzire Nnâhamwirhu omu nshinda, rhurhanamanyiri ngahi bamurhebire. ³ Petro n'eyo yindi ntumwa bahuluka, n'okuj'ébwa nshinda. ⁴ Banacilibirha haguma bombi. Ci eyo yindi ntumwa yalibirha kulusha Petro, n'okuba wa burhanzi okuhika aha nshinda; ⁵ anaciyunama, abona ebitambara byali okw'idaho, ntyo arhacimudahaga. ⁶ Simoni Petro, wali mukulikire ahika n'okuja omu nshinda; abona ebitambara byalikola biri okw'idaho, ⁷ n'ebirere byalishwesire irhwe lya Yezu, birhali haguma n'ebitabara ci bibungire haguma eburhambi. ⁸ Lero elya yindi ntumwa, yarhangigihika aha nshinda, yaja mwo nayo; yana bona; yana yemera. ⁹ Bulya erhali cishihasha okuyunva, kugerera Amandiko, oku Yezu afuka omu bafîre. ¹⁰ N'entumwa zagaluka emwabo. ¹¹ Ago mango Maria erhi ali alaka, eburhambi by'enshinda. N'okwali alaka anahenguza omu nshinda; ¹² anacibona bamalaika babiri bayambirhe emyambalo myeru, batamire halya hantu omubiri gwa Yezu gwâli mugwishize, muguma eby'irhwe, n'owundi ebwa magulu. ¹³ Bamubwira: Nyoko, bulya gurhi oli walaka? Anacibashuza: Bulya bagendine omubiri gwa Nnâhamwirhu, nta namanyiri ngahi baguhebire. ¹⁴ N'omukuderha ebyo, ahindamuka, anacibona Yezu ayimanzire; cikwone arhamanyaga oku ye Yezu. ¹⁵ Yezu amubwira erhi: Nyoko, bulya gurhi oli walaka? Ndi oli walonza? Yehe, amanya mpu mulanzi w'ishwa, amubwira: Nnâhamwirhu, nkaba we wamuhesire, mbwira ahawamuhebire, na naji murhola. ¹⁶ Yezu amubwira erhi: Maria! Ahindamuka, n'okumubwira omuci Ebrania: Rabuni! kwo kuderha mpu: Mwigiriza! ¹⁷ Yezu amubwira erhi: Orhampume kwo; bulya nta ciyinamukira emwa Larha. Ci ojibona bene wirhu, n'okubabwira oku nyinamukire emwa Larha ye na sho, emwa Nnâmahanga wani yena Nnâmahanga winyu. ¹⁸ Maria w'Emagdalene agendi manyisa entumwa oku anabwine Nnawabo, n'oku anamubwizire ebyo byoshi. ¹⁹ Ebijingo by'olo lusiku, lwo lwali lurhanzi ly'omugobe, enyunvi za hantu entumwa zali erhi ziri mpamike enyanya ly'ecoba baligwerhe oku Bayahudi, Yezu anaciyisha, aciyerekana ekarhi kabo, n'okubabwira mpu: Omurhula muli mwe! ²⁰ N'erhi ayusi derha ntyo, abalangula ebigasha byage n'enkanga. Entumwa zaba n'obushagaluke omu kubona Nnawabo. ²¹ Yezu ashubi babwira erhi: Omurhula muli mwe! Nk'oku Larha antumaga, nani murhumire. ²² Enyuma z'ebyo binwa, abasuhira, anacibabwira erhi: Yankiriri Mûka Mwimâna. ²³ Abamwababalire ebyaha, bayîshi babalirwa; n'abamwabilekere, barhakabibabalirwa. ²⁴ Tomaso, oderhwa Kahasha, muguma w'omw'ikumi na babiri, arhali haguma nababo erhi Yezu ayisha. ²⁵ Ezindi ntumwa zamubwira: Rhwabwine Nnâhamwirhu. Cikwone abashuza erhi: Nka ntabwini enzigo z'erya misumari omu bigasha byage, nankantahebiri okuboko kwani omu mirhibadu yage, nta nkayemera. ²⁶ Enyuma lya nsiku munane, entumwa za Yezu erhi kandi ziri omunyumpa, na Tomaso haguma nabo. Yezu ayisha, erhi n'enyunvi z'iri nyigale, abayimanga ekarhi, ntya aderha erhi: Omurhula e mwinyu! ²⁷ Buzinda abwira Tomaso: Lerha omunwe gwawe, olole n'ebigasha bwani; lerha n'ecigasha cawe, ompume omu mirhibadu; orhanacibaga wakubula bwemere, cikwone oyemere. ²⁸ Tomaso amushuza erhi: Nnâhamwirhu na Nnâmahanga wani! ²⁹ Yezu amubwira: Omukuba wambwine, wamayemera. Iragi lyabayemire, buzira kubona! ³⁰ Yezu ashubirijira, birhangaza binji, embere z'entumwa zage, ci birhayandikagwa muli eci citabu. ³¹ Ci ebyo byandisirwe mpu lyo muyemera oku Yezu ye Kristu, Mugala wa Nnâmahanga, mpu n'omukuyemera muhabwe obuzine okw'izino lyage.