¹ Ntyo Pilato anacigwarha Yezu, n'oku mushurha emikoba. ² Abasirika baluka ecimane c'emishugi n'oku muyambika co okw'irhwe, n'okumuyambika ecishûli cidukula; buzinda, bamuyegera ho, ³ n'okuderha: Asinge, mwami w'Abayahudi! N'okumushurha ebifundo. ⁴ Pilato Ashubi huluka n'okubwira abayahudi: Ala, oku mundwirhire ye, ci mumanye okuntabwine bubi kuli ye. ⁵ Ago mango Yezu ahuluka, ayambirhe ecimane c'emishugi n'agulya mushangi mudukula. Na Pilato aderha: Alagi ye. ⁶ Erhi abagula bakulu bamubona, banaciyakuza: Amanikwe! Amanikwe! Pilato Anacibabwira: Mumurhole mwene, mumumanike; bulya nta bwini, obubi muli ye. ⁷ Abayahudi bamushuza mpu: Rhujira irhegeko; na, kushimbanana irhegeko lirhu, ashinganine ayirhwe, bulya anacijijire Mugala wa Nyamuzinda. ⁸ Erhi Pilato ayunva eco cinwa oboba bwage bwayushuka. ⁹ Ashubi galuka omu Praitoria (omu batwira emanja), n'okubwira Yezu: oli wangahi? Ci Yezu arhamuhaga ishuzo. ¹⁰ Pilato amubwira: K'orhalonzizi oku nshuza? K'orhamanyiri oku ngwerhe obuhashe bw'okukumanika, n'oku ngwerhe obuhashe bw'okukulika? ¹¹ Yezu ashuza: Nta buhashe wana gwarhe kuli nie, nko rhabuhabirwi kurhenga enyanya. Co cirhume ompanyire emwawe ajijire ecaha ciguma cinene. ¹² Kurhangira ago mango, Pilato alonza mpu amulike. Ci Abayahudi bayama: Okamulika erhi orhaciri mwira wa Kaizari. Ngasi yeshi ociderha mwami erhi agomire Kaizari. ¹³ Pilato, erhi ayunva enderho zabo, aheka Yezu embuga; n'okutamala ahantu h'okutwira emanja, hantu h'okuyerekana, n'omu ci Ebrania Gabata. ¹⁴ Gali marheganyo ga Basaka, mwali nk'omunsa ya kalindarhu. Pilato abwira abayahudi: Loli omwami winyu. ¹⁵ Ci bayakuza: Rhenza, rhenza, maniki-ye! Pilato ababwira kanie namanika omwami winyu? Abagula bakulu bashûza: Nta wundi mwami rhujira orhali Kaizari. ¹⁶ Lero anacibaha ye mpu bamumanike. Ntyo barhola Yezu, n'okumuheka. ¹⁷ Yezu, abarhula omusalaba gwage, ahika ahantu haderhwa aha kampanga, aha kaderhwa omu ci Ebrania Golgotha. ¹⁸ Ho amanikiragwa, haguma naye hali bandi babiri, muguma ekumosho owundi ekulyo, na Yezu ekagarhi. ¹⁹ Pilato ajira amandiko, agaheba oku musalaba, go gali go gaga: Yezu w'enanzareti, mwami w'Abayahudi. ²⁰ Bayahudi banji bakasoma ago mandiko, bulya aho hantu Yezu amanikagwa hali yegerire omurhundu: ganali omu ci Ebrania, omu Cigriki n'omu Cilatini. ²¹ Abagula bakulu b'Abayahudi babwira Pilato mpu: Orhayandike: Mwami w'Abayahudi. Ci oyandike oku adesire mpu: Nie mwami w'Abayahudi. ²² Pilato ashuza: Ebi nayandisire, nabiyandisire. ²³ Abasirika, enyuma ly'okulalikwa Yezu, barhola emishangi yage, bayigaba kani, ngasi musoda n'ecage cigabi. Barhola n'akanzu kage, kalya karhali mwo buhange, ka ciraga ciguma kurhenga enyanya kuhika edako. ²⁴ Banacibwirana erhi: Rhurhagubere, ci rhuguyeshe ecigole rhulole gwayishiba gwandi. Ebyo byaba lyo gulya mwanzi gw'amandiko guhikirira: Bâgabire emishangi yani, banagu yeshera ecigole. Ali eby'abasirika bajijire. ²⁵ Hofi n'omu salaba gwa Yezu erhi bacishungasire nnina na mulumuna wa nnina, Maria, mka Clopa, na Maria w'Emagdalene. ²⁶ Yezu, abona nnina, n'eburhambi bwage entumwa asimaga, anacibwira nnina: nyokowe, ala mugala wawe. ²⁷ Buzinda abwira entumwa: Ala nyoko. Na, kurhenga ago mango, eyo ntumwa ya muheka emwayo. ²⁸ Enyuma zaho, Yezu, ali amanyire oku byoshi byagezire, aderha, lyo Amandiko gahikirira: Ngwerhwe n'enyorha. ²⁹ Aho hali akabehe kayunjwire nkalishi. Abasirika bavunvuza ecihorholezo omweyo nkalishi, n'okucishwekera okwirhwerhwe ly'olushekesheke, bakamuyegeza byo ahakanwa. ³⁰ Erhi Yezu ayusi nywa okw'eyo nkalishi aderha: Byoshi bya mahwa. Ana, cikub'igosi, arhenga mw'omuka. ³¹ Omu kuyoboha okw'emibiri erhankabera oku musalaba amango ga basaka, - bulya gali marhenganyo, n'olo lusiku lwa basaka lwali lusiku lukulu, - abayahudi badosa Pilato mpu kabahagule amagulu oku bali bamanike, n'okugakula. ³² Abasirika banayisha, bavuna ag'omurhanzi buzinda n'aga owundi walimanisirwe haguma naye. ³³ Erhi bayegera Yezu, bashimana anafire barhaci muvuna amagulu; ³⁴ ci muguma omubasirika amutumirha itumu omu mirhibadu, ho na ho harhenga omuko n'amishi. ³⁵ owabonaga okwo yene ye wanabihamirize, n'obuhamirizi bwage buli bw'okunali; amanyire oku adesire okunali, mpu lyo ninyu muyemera. ³⁶ Ebyo byoshi byabire, mpu lyo Amandiko ga hikirira: Nta civuha c'omu bivuha byage canavunwe. ³⁷ Na handi Amandiko gashubire derha mpu: Bayishibona oyu batumirhaga itumu. ³⁸ Enyuma z'ebyo, Yusufu we Armateyo, ye wali ntumwa ya Yezu, ci okw'ihwe omu kuyoboha abayahudi, ahuna Pilato oluhuma lw'okujirhola omubiri gwa Yezu. Na Pilato amulikula. Anaciyisha, n'oku rhola omubiri gwa Yezu. ³⁹ Nikodemu, wakagi genda budufu emunda Yezu ali, naye ayisha, aduirhe amarashi n'enshagi bya nkahisire nka bitabu igana. ⁴⁰ Banacirhola omubiri gwa Yezu, n'okuguboha omu bitambara, haguma n'amavurha g'obuku, yali nkomedu y'Abayahudi nka babishi ofire. ⁴¹ Ci, hali ishwa aho hantu Yezu abishagwa, n'omwel'ishwa enshinda mpyahya, erhali sagi hebwa mw'omuntu yeshi yeshi. ⁴² Abaho ho bajidekereza Yezu, omu marheganyo g'abayahudi bulya enshinda yali hofi.