¹ Aha murhondero hali omwanzi, n'ogu mwanzi gwali haguma na Nnamahanga. ² Gwali haguma na Nnamahanga kurhenga aha murhondero. ³ Ebintu byoshi byajiragwa naye, na ntaco cajijirwe buzira go. ⁴ Muliye mw'obulamu bwali, n'obwo bulamu bwo bwali kamole k'abantu. ⁵ Akamole kalangashana omu mwizizi, n'omwizizi gurhakazimagya. ⁶ Hanaisha omuntu wali rhumirwe na Nnamuzinda: Izino lyage ye wali Yohana. ⁷ Ayisha muhamiriza, wa hamiriza akamole, lyo boshi bayemera erhi ye rhuma. ⁸ Arhali ye wali kamole, cy'ayishire aja hamiriza akamole. ⁹ Aka kamole kali kamole k'okuli, ko, kayishaga omw'igulu, kalomekera abantu boshi. ¹⁰ Kali kaba omw'igulu, n'igulu lyalemirwe nnako, n'igulu lirhakamanyaga. ¹¹ Aliyishîre abage, n'abali bage barhamuyankiriraga. ¹² Ci emwabalya bamuyankirire, balya bayemire izino lyage, abahire obuhashe bw'okuba bana ba Nyamuzinda, ¹³ Bobabo babusirwe, arhali oku muko, erhi oku bulonza bw'omubiri, erhi okubulonza bw'omuntu. c'oku bulonza bwa Nyamuzinda. ¹⁴ N'ogu mwanzi gwajirikana mubiri, gwana lama ekarhi kirhu, guyunjwire lukogo n'obushinganyanya; rhwanabona irenge lyage, irenge nk'irenge ly'Omwana cusho wahubuk'emw'ishe. ¹⁵ Yohana amuhamiriza, anayakuza: ye naderha oyu: oku waisha enyuma lyani ye walishokolire, bulya ahali erhi ntasangihaba. ¹⁶ Rhweshi rhwahabwa oku bwimana bwage, n'olukogo oku lukogo; ¹⁷ Bulya amarhegeko gahanagwa na Musa, olukogo n'obushinganya byaisha emwa Yesu Kristo. ¹⁸ Ntaye osangibona Nnamahanga; muli Ishe, ye wanamumanyisize. ¹⁹ Alaga obuhamiriza bwa Yohana, amango abayahudi barhumaga e Yerusalemu abadahwa n'abalawi, mpu bamudose: w'olindi? ²⁰ Anacibabwira n'obwalagale, arhalahiraga, aderha oku arhali ye wali kristo. ²¹ Banaciri mudosa: Kurhigi? kawe Eliya? Anaciderha: arhali niene. Koligi mulebi? abashuza: erhi nanga. ²² Lero banaciri mubwira, oligi ndi? Lyo rhumanya shuza abarhurhumaga. Oku odesire wene? ²³ Niono, kwo ndesire; nd'izu lyolya waja yakuza omw'irungu: Mushogogondeze enjira za Nnawirhu, kulya omulebi Isaya aderhaga. ²⁴ Abalirhumirwe bali bafarisayo. ²⁵ Bashubi mudosa er'idoso: Gurhi gurhumirage waja batiza, erhi wakaba orhali we Kristo, erhi Eliya, erhi mulebi? ²⁶ Yohana abashuza: Nie, naja nabatiza oku mishi, ci omukarhi kinyu, muli oyu murhamanyiri, ²⁷ Ayisha nyuma lyani; ntaka hasha nashwekula emigozi y'ebirato byake. ²⁸ Ebyo byaberaga e Betaniya, ishiriza ly'eyordani emunda Yohana ajaga abatiza. ²⁹ Erhi liba lisirhondo, abona Yesu ayishire emunda ali, anaciderha: Ala omwanabuzi wa Nnamahanga, olya warhenza ecaha c'igulu. ³⁰ Ye naderhaga oyu: oku enyuma lyani haisha omuntu walishokolire, bulya ahali erhi ntanacihaba. ³¹ Ntali mumanyire, cilyo amanyikana omu Izraeli cocarhumire nayisha naja batiza oku mishi. ³² Yohana ahamiriza: Nabwine Mûka mweru ayandagala arhenga emalunga nka nguuku anamurhwako. ³³ Ntali mumanyire, ci oyu wantumaga okunje nabatiza oku mishi, ye wambwizire: Oyu waishibona Mûka Mweru ahonokera anarhinda kuli ye, yoyo ye wayishija batiza na Mûka Mweru. ³⁴ Namubona, nahamiriza okuye Mugala wa Nnamahanga. ³⁵ Erhikuba lisirhondo, Yohana erhi aciri aho, na babiri b'omu baganda bage; ³⁶ Anacibona Yesu agera, aderhaNamubo: Ala Omwanabuzi wa Nnamahanga. ³⁷ Balya baganda babiri erhi bayunva aderha eyo myanzi, bakulikira Yesu. ³⁸ Yesu akebagana, anacibona okubamushimbulire, ababwira: Bici mwalonza? Nabo bashuza: Mpu mwalimu (kwo kuderha mwigiriza) ngahi oba? ³⁹ Mwishe, kwo abâbwizire, munabone. Banagenda, banabona ahaba; bana legerera boshi olo lusiku. Zalikola aha nsa kumi. ⁴⁰ Andrea, mulumuna wa Simoni Petro, ali muguma w'omwabo babiri bayunvagya emyanzi ya Yohana, abo bashimbuliraga Yesu. ⁴¹ Anacishimana burhangiriza mukulu wage Simoni, anamubwirabo: Rhwabwinage Masiya (kwo kuderha Kristu). ⁴² Anacimuhekera Yesu. Yesu, erhi amusinza, aderha: We Simoni, mwene Yona; okola waka hamagala Kefa (kwo kuderha Ibuye). ⁴³ Erhikuba lisirhondo, Yesu akola aja e Galilaya, anashimana Filipo. Amubwira: Nshima. ⁴⁴ Filipo ali we Betsaida, w'omu cishagala cemwabo Andrea na Petro. ⁴⁵ Filipo ashimana Natanieli, anamubwira: Rhwabwine olya Musa ayandikaga omu citabu c'amarhegeko n'abalebi bamuderha, Yesu we Nanzareti, mugala wa Yusufu. ⁴⁶ Natanaeli amubwira: Erhi akantu kinja kanarhenga e Nazareti? Filipo amushuza: Isha, ocibonere. ⁴⁷ Yesu, erhi abona Natanaeli aja emunda ali, amubwira: Ala omw'israeli menemene orhali mw'ishembo endalala lyage. ⁴⁸ Natanaeli amubwira, erhi ngahi wamanyiraga? Yesu amushuza: Embere Filipo arhacikuhamagala, galya mango wali aha mutini, erhi nkubwine. ⁴⁹ Natanaeli ashuza anamubwira: Erhi Rabbi, oli Mugala wa Nnamahanga, we mwami w'Israeli. ⁵⁰ Yesu amushuza: Kabulya namokubwira oku ene oli ah'idako ly'omutini erhi nkubwine, lyokolaga wayemera; wacibona n'ebinene bilushire ebyo. ⁵¹ Anamubwira: Okunali, okunali, mwacibona amalunga gaiguka na ba malaika wa Nakasane bakainamuka banahonokera oku mwene omuntu.