¹ Kwoki, akasanzi awayima aciri murho,naderha oku arhagwerhi lubero lwoshi n'omujà, ciru ankaba ya nahano wa byoshi. ² cikwone anabere idaku ly'abaka mulera bo banakamurhegeka kuhika amango ishe adesire gahike. ³ Nanirhu kwo birintyo, amango rhwaciri bana barho, rhwaciri omu buja bw'ebikono b'igulu; ⁴ Cikwone erhi akasanzi kahika, Nnamahanga arhuma omugala aburhwa n'omukazi; aburhwa idako ly'amarhegeko, ⁵ mpu lyo aciza abali idako ly'amarhegeko, lyo rhuhinduka bana. ⁶ Nabulya muli banaburhwa, Nnamahanga arhuma mûka gwa mugala wage omu mirhima yirhu, ye wakayama: Aba! Larha! ⁷ Omw'okwo arhaciri mujà , ci mwaburhwa; n'erhi wankanaba mwanaburhwa, okola wa mwimo oku lukogo lwa Nnamahanga. ⁸ Burhanzi, erhi murhacimanya Nnamahanga, mwakagikolera emyungu erhali kulemirwe. ⁹ Cilero buno mwamanyirage Nnamahanga, erhi kandi buno mwamanyikine na Nnamahanga, gurhigi mwankacigaluka emwa zirya ngonyo z'abazimu bakenyi, balya kandi mukola mwacilonza oku kolera? ¹⁰ Muli mwalola oku nsiku, emwezi, akashanzi n'emyaka! ¹¹ Nyobohire oku omukolo namujirire gwahera busha. ¹² Muyorhe akani, bulya nani nyosire nkamwe. Benewirhu ntyo kwomuyingizire. ¹³ Ntabwo bubi mwanjirire, mumanyire oku kwali oku bugonyogonyo bw'umubiri namuyigirizagya emyanzi y'akalembe burhangiriza. ¹⁴ N'omu kugerwa n'omubiri gwani, mwakubona n'obwalagale murha nganyagusagya erhi ku ndahira; cikwone mwanyankirira nka malaika wa Nnamahanga nka Yezu Kristu. ¹⁵ Ngahigi ecijiro c'obwinja bwinyu cicirigi? Bulya mubwizire okuli oku nka byanka hasikine, mwanka cirhomwire amasu mpu lyo mu gampa. ¹⁶ Ka nabirage mushombanyi winyu enyanya ly'oku babwira okunali? ¹⁷ Obushiru bagwerhe kulimwe burhakwanini, cikwone balonza oku murhenza emunda rhuli, lyo muba bunguke bwabo. ¹⁸ Kuli kwinja okusimwa n'olya oli mwinja akasanzi koshi, ci arhali amango ndi haguma naninyu gone. ¹⁹ Bana bani, mwe nshubiri yunviz'amalumwa buhyahya, kuhika amango Kristu alemwa omu ndalala zinyu; ²⁰ Naligi cifinjire omu kano kasnzi okuba haguma na ninyu, n'oku hindamula enganiro, bulya nyunvirhe mpahire erhi mwe murhuma. ²¹ Mbwiragi mwe mwalonza oku rhambulwa n'amarhegeko, ka murhayunvirhi gurhi amarhegeko gadesire? ²² Bulya biyandisirwe oku Abrahamu aligwerhe bagala babiri, muguma wa mujanyere na muguma oku nabana wage. ²³ Cikwone ow'omujanyere abusirwe lugenda mubiri, n'owoku nabana aburhwa kushimbana eciragane. ²⁴ Ebyo biyerekine omugani, bulya abo bakazi biri biragane bibiri, ciguma c'oku ntondo ye sinayi, caburhira obujà, ye Hajiri. ²⁵ Bulya Hajiri, ciri cirhwa ca sinayi c'omu Arabia, cishushanyibwe na w'ene yeri omu buja n'abana bage. ²⁶ Cikwone yerusalemu w'enyanya arhali muja ye na nyama wirhu; ²⁷ Bulya biyandisirwe: Shagaluka ngumba, we, orhaburha! obande akabuli n'izu linene, we orhayunvagya malumwa ga kuburha! Bulya abana b'owa lesirwe bayishiba banji kulusha abana b'owaliherusire. ²⁸ Ninyu, benewirhu, muli bana b'oku ciragane nka Isaki; ²⁹ na nka kulya mira byabaga owaburhagwa oku mubiri ashimbuliraga owabusirwe oku murhima, ntyo kwo biri buno. ³⁰ Ci gurhigi amandiko gadesire? hinva omuja n'omugala, bulya omwana w'omuja arhanka yima boshi n'omugala w'omukazi w'obuyumpa. ³¹ Cocirhumire, benewirhu rhwehe rhurhali bana ba muja, vi ba mukazi nabana.