¹ Cikwone Sauli, arhalekaga oku yobohya abana abigirizibwa na Nnahamwirhu mpu abayiirhe, ajà emw'omudahwa mukulu, ² Amuhuna amaruba g'okuja omu sinagogi z'e Damasi, mpu lyo, akabona abali omweyo njira, akaba balume erhi bakazi, abalerhe e Yerusalemu. ³ Aligi omu njira yage, anali akola ahika hofi n'e Damaski, obulangashane bwarhenga oku nkuba bwamu funika n'oku bwamu gorha. ⁴ Aci rhimba okw'idaho, ayunv'izu lyamuyakuza erhi: Sauli, Sauli, bici wandibuliza? ⁵ Ashuza erhi: wendi, Nnahamwirhu? Na Nnahamwirhu aderha erhi: Ndi Yesu oli walibuza. Kuli kuzibu kuli we oku labarha emishugi. ⁶ Ajuguma asomerwa aderha erhi: Nnahamwirhu, gurhigi olonzize njire? na Nnahamwirhu amushuza erhi: Yimuka, oje omu lugo, bakubwira ebi wajira. ⁷ N'abalume babalamaga boshi bayimanga bahulika; bakayunvirhiza izu, cikwoki barhakagi bona muntu. ⁸ Sauli ayimuka okw'idaho, erhi amasu gage gazibuka, arhabonaga bici; bamu gwarhira oku kuboko, bana mulusa e Damaski. ⁹ Ayusa nsiku isharhu arhabona, arhana kagi lya ciru n'oku nywa. ¹⁰ N'obu, Edamasi yali omuganda izino lyage ye wali Ananiya. Nnahamwirhu amubonekera amu bwira erhi: Ananiya! Ashuza: Nyono, Nnahamwirhu! ¹¹ Nyakasane amubwira: Yimuka, ja omu njira ederhwa eshinganine, ona lonze, omu nyumpa ya Yudea, oderhwa Sauli w'e Tarso. bulya ali ashenga, ¹² Ana bonekerwa n'omuntu izino lyage Ananiya, aja omu ali, anamulambulira kwo amaboko mpu amuhunira. ¹³ Ananiya anacishuza erhi: Nnahamwirhu, nayunvirhe oku bantu banji ebintu byoshi bibi ajirire abatakatifu e Yerusalemu; ¹⁴ anayishire hano n'obuhashe abajinji bamuhaga mpu agwarhe abashenga izino lyawe booshi. ¹⁵ Ci Nyakasane amubwira erhi: genda, bulya oyu muntu nacishozire ye nti mukolese aheke izino lyani embere ly'embaga, embere ly'abami, n'embere lya mwene Israeli; ¹⁶ nana muyereka kulibuzibwa kuci acibona aha nyanya ly'izinolyani. ¹⁷ Ananiya anagenda; n'erhi ahika omu nyumpa, alambulira amaboko oku Sauli, anaderha erhi: Sauli, mwene wirhu, Nnahamwirhu Yesu, wakubonekeraga omu njira wayishaga, anantumire lyo ohabwa akalamu ly'ona habwa Mûka Mutakatifu. ¹⁸ Honaho, anahinduka honaho aja kwo ebiri nka magamba, anabona. Anayumuka, ana batizibwa; ¹⁹ Na, buzinda erhi amalya, emisi yamugalukira. Sauli abera nsiku nka zinga haguma n'entumwa zali e Damasi. ²⁰ Honaho anayigiriza omu sinagogi oku Yesu ali mwene Mungu. ²¹ Boshi bakagi muyunva basomerwa, bana derha erhi: Kahali olya wa sherezagya abahamagalaga eryo izino e Yerusalemu, n'oku yisha enomunda mpu abashweke, abalerhe emalanga g'abakuhani bakulu? ²² Lero Sauli aja azibuha kulusha, arhangaza abayahudi e Damaski, aba yeresa oku oyo ali Kristu. ²³ Omu nsiku nsungunu, abayahudi balaganana mpu bamuyirhe, ²⁴ Cikwone ihanolyabo lya manyikana kuli Sauli. Bakalanga emihango budufu n'omushi, mpu lyo bamuyirha. ²⁵ Cikwoki, omu budufu buguma, entumwa zamu gwarha, bamuheka budufu, bamu yandagaza kurhenga enyanya ly'ecogo c'amabuye omu lurhanda. ²⁶ N'erhi ahika e Yerusalemu, Sauli alonza oku ba naye muguma w'entumwa; ci boshi bakagi muyoboha, bulya barhayemeraga oku akola ntumwa. ²⁷ Lero Barnaba anaci murhola, amuheka emw'entumwa, anababwira kurhi omu njira Sauli abonaga Nyakasane, wamu derhezagya, na gurhi e Damaski ayigirizagya okw'izino lya Yesu. ²⁸ Akagenda anagaluke haguma nabo omu Yerusalemu, ²⁹ Akagi derha n'obu rhwali okw'izino lya Nnahamwirhu. Anakagi derha n'oku jisa kadali abagiriki; cikwone bohe balonza oku muyirha. ³⁰ Bene wabo, erhi bamanya okwo, bamulerha emwa Sezari, ana murhuma e Tarso. ³¹ Akanisa kali omu murhula omu Yudeya yoshi, Galilaya na Samariya, bazibuha n'okulama omu kukenga Nnahamwirhu, kwaka yushuka kugerera Mûka Mutakatifu. ³² Nkoku Paulo atembereraga abatakatifu boshi, ahonoka naye emw'abali e Luda. ³³ Acimana yo omuntu oderhwa Aineya, aba gwishirhe oku ncingo miaka munani, bulya ali ahozire ebirumbu. ³⁴ Pierre amubwira: Aineya, Yesu Kristu akufumye; yimuka, shweka encingo yawe. Honaho anayimuka. ³⁵ Abantu boshi be Luda n'e Sarona bamubona, b'ana hindamukira Nnahamwirhu. ³⁶ Hali e Yopa, omu ntumwa, mukazi muguma aderhagwa Tabita, ko kuderha Dorkase: akagi jira mikolo minji n'oku hana entulo. ³⁷ Analwala omwezo nsiku, anafa. Erhi bayusa oku mushuka, bamu dekereza omu chumpa c'enyanya. ³⁸ Na bula Luda ali hofi n'e Yopa, entumwa, erhi zimanya oku Petero ayili, barhuma abantu emunda ali, bamubwire ayishe emunda bali buzira n'oku cisimbaha. ³⁹ Petero anayimuka, anagenda n'abo balume. Erhi ahika, bamuheka omu cumpa ce nyanya. Abakana boshi bali muzungulusire bali bayama, bana yerekana emishuli n'emishangi Dorcas akagi baha erhi aciri haguma nabo. ⁴⁰ Petero ahulusa abantu boshi, ashurha amagoti, anahuma; buzinda, ahindamukira omubiri, aderha erhi: Tabita, yimuka! afungula amasu, anabona Petero, ana tamala. ⁴¹ Petero amugwarha okuboko, anamu yimanza. Anahamagala aba takatifu n'abakana, anabalangula ye akola azine. ⁴² Ebyo byamanyikana omu cihugo c'eYopa coshi, n'abanji bayemera Nyakasane. ⁴³ Petero anabera nkanzi kasungunu eYopa, aha mw'omuhuzi w'empu izino lyage Simoni.