¹ Sauli naye ali yemire mpu bayirhe Stefano. Haba, olwo lusiku, obululu bunene aha nyanya ly'olwarhamba lw'e Yerusalemu; na boshi, kukula entumwa, bashandala omu cihugo c'e Yudea n'ece Samaria. ² N'abantu b'obwemere babisha Stefano, bana mulakira okw'izu linene. ³ Sauli, olunda lwage, ashereza akanisa, aja omu ngasi nyumpa, agwarha abalume n'abakazi, n'oku bakabulira omu mpamikwa. ⁴ Aba shandabazibagwa eyi n'eyi, baja hana omwanzi gw'akalembe. ⁵ Filipo, ahonoka omu cishagala c'e Samaria, aja yigiriza Kristu. ⁶ Olubaga lwoshi lwa nunirwa n'enyigirizo za Filipo, erhi bayunvagya b'anabona ebi manyuso ajiraga. ⁷ Bulya abazimu babi bakagi rhenga omu bantu banji, baja bayakuza bwenene, na abali bahozire n'ebirema ba fuma. ⁸ Haba obushagaluke bwinji omw'eco cishagala. ⁹ Haali mbere omw'eco cishagala omuntu muguma wahamagalagwa Simoni, abaga mukurungu, akagi someza abantu b'eSamariya n'okuciderha muntu mukulu. ¹⁰ Booshi, kurhenger'oku murho mpaka oku mukulu, bamuyunvirhiza bwinjabwinja, bana kagi derha: Oyu ali buhashe bwa Mungu, bulya baderha kukulu. ¹¹ Bakagi muyunvirhiza bwinja, bulya kurhenga mira bak'agi barhangaza n'amankurungu gaage. ¹² Cikwone, erhi baba bamayemera Filipo, wakagi bayigiriza emyanzi ya kalembe k'obwami bwa Nnamahanga n'izino lya Yesubak- Kristu, mulume n'omukazi boshi babatizibwa. ¹³ Simoni yene ayemera, na, enyuma ly'oku batizibwa kwage, arhaci kagi siga Filipo, anakagi somerwa n'ebyo birhangaza n'ebisomerine bizibu akagijira. ¹⁴ Entumwa, zali e Yerusalemu, zayunva oku ab'Asamariya bayemire emyanzi ya Nnamahanga, zabarhumira Petro na Yohana. ¹⁵ Abo, erhi bahika emwa b'Asamariya, baba hunira, lyo bayankirira Mûka Mutakatifu. ¹⁶ Bulya Mûka wa Mungu arhalisingi honokera ciru n'oku muntu muguma mulibo; bali babatizibwe kwone okw'izino lya Nnahamwirhu Yesu. ¹⁷ Ago mango Petro na Yohana babahira kwo amaboko, nabo bahabwa Mûka Mutakatifu. ¹⁸ Erhi Simoni abona oku Mûka Mutakatifu akagi habwa n'okuhebwa kw'amaboko g'entumwa, babaha enfaranga, ¹⁹ Erhi: Mûmpe nani okw'obwo buhashe, lyo nani oyu nashika heba kwo amaboko ahabwe Mûka wa Mungu. ²⁰ Ci Pierre amubwira: Okahera we n'enfaranga zawe, bulya wamanyire mpu wanagula enshokano ya Nnamahanga n'enfaranga! ²¹ Nta cigabi n'anta mwanya ogwerhe omwebi, bulya omurhima gwawe gurha shinganini embere za Nnamahanga. ²² Ocicikubulage kw'obwo bubi bwawe, ona hune Nyamuzinda: kwankanaba okurhenza ezo ntanya omu murhima. ²³ Neci, mbwine oku oyunjwirwe endulwe y'obubi onali mubohe n'emigozi y'ebyaha. ²⁴ Simoni aderha: mumpunire emwa Nnahamwirhu, lyo ebi mudesire birha mpikire. ²⁵ Erhi baba bama hamiriza n'oku derha emyanzi ya Nyakasane, bashubira e Yerusalemu, omu kuyigiriza omwanzi kw'akalembe omu mirhundu minji y'e Samaria. ²⁶ Malaika wa Nyakasane, aderhesa Filipo, amu bwira: Yimuka, ojé olunda lwedako, oku njira ehonosire kuja e Yerusalemu, kuja e Gaza, liri irungu. ²⁷ Anayimuka, agenda. Omunjira mwayisha muntu muguma w'e Etyopiya. Ali mulumba murhonyi wa Kandasi, mwami kazi w'e Etyiopiya, na murhegesi w'ebirugu byage byoshi. Ali gashaniza e Yerusalemu, ²⁸ Erhi akola ali omu njira y'okushubira emwabo, erhi atamire oku ngaale yage, anagwerhe asoma omu citabu ca Isaya. ²⁹ Mûka Mutakatifu anaci bwira Filipo erhi: Yimuka ogwarhe eyo ngaale. ³⁰ Filipo ayunva agwerhe asoma omu citabu c'omulebi Isaya. amudosa erhi: K'oyunvirhe ebi ogwerhe wasoma? ³¹ Ashuza: Gurhi nankahasha, nka ntaye ondongoline? Obwo ayigiriza Filipo mpu ashonere oku ngaale yage, anatamale eburhambi. ³² Ecigabi c'amandiko akagisoma, co ceci: Bamurhesise nka cibuzi caj'ibagwa; nka mwana buzi orha bumbula akanwa embere z'owa mutwa obwoya, arha shagala cibi. ³³ OLubanja lwage balutwira akagayo. Iburha lyage ndi wanaliganje? Bulya obuzine bwage babukuula en'igulu. ³⁴ Olya mulamba anacidosa Filipo, erhi: maashi mbwira ndi oyo mulebi aderhire ntyo? Ka yene nisi erhi windi? ³⁵ Oku bundi Filipo anaci murhondereza, arhondera kuli ebyo binwa by'amandiko, amuyigiriza emyanzi ya kalembe ya Yesu. ³⁶ Oku bali omu njira, bahika aha amishi gali. Olya mulamba amubwirha erhi: Amishi aga, bicibicimpanzize oku batizibwa? ³⁷ Naye Filipo amubwira, erhi: Akaba oyemire n'omurhima gwawe gwoshi, kwana hashikana. Ashuza, erhi: nyemire oku Yesu Kristu ye Mugala wa Nyamuzinda. ³⁸ Anayimanza engaale, ba bungulukira omu mishi, Filipo n'olya mulamba; amubatiza. ³⁹ Erhi baba namarhenga omu mishi, omuka gwa Nyakasane gwashamula Filipo, n'olya mulamba arhacimubonaga. agendekera omu njira haguma n'obu shagaluke. ⁴⁰ Filipo ayigiriza emyanzi ya kalembe omu bishagala byoshi, kuhika alinda ahika e Sezariya.