¹ Mw'ago mango gonene, mwami Herodi anacigwarha baguma b'omu ka Lulema mpu abalibuze, ² Ayirha Yakobo mukulu wa Yohana n'engorho. ³ Erhi abona oku asimisize abayahudi, ana cirhegeka mpu bakwarhe na Petero. Zali nsiku za migati erhali mwo lwango. ⁴ Erhi aba amamugwarha n'okumuhira omu mpamikwa, anamuhira kwobirundo bini bya basirika banibani mpu bamulange, ali alonzize mpu amulerhe embere z'olubaga enyuma lya pasaka. ⁵ Petero alilanzirwe omu mpamikwa; erhi n'omu ka lulema namo barhahusa n'okumusengera emwa Nnamahanga. ⁶ Ci obudufu bonanene herodi ali alalire mpu hano buca amuheke embere ly'olubaga, Petero, erhi ashwesirwe na nkoba zibiri, agwishire n'ekarhi k'abasirika babiri; n'abalanzi b'empamikwa ali oku lunvi. ⁷ Olole, malaika wa Nyakasane ayimanga hofi naye, empamikwa yayunjula bulangashane. Malaika ahuma Petero oku nkanga, anamubwira erhi: zuka duba! enkoba zalimushwesire amaboko zanarhoga. ⁸ Na malaika amubwira erhi: Yambala omukaba gwawe n'ebirato byawe. Anajira ntyo. Malaika aciri mubwira: Cibwiké igoti ryawe, ona nshimbe. ⁹ Petero ahuluka, anamushimba. Arhamanya oku ebi malaika ajiraga byanali by'okuli, ci yehe akamanya pu bilorho. ¹⁰ Erhi barhaluka abalanzi barhanzi, n'abakabiri, bahika oku lunvi lw'ecuma lw'okuja omu lugo, lwaciyigula lwonanene embere zabo; bahuluka, banagendekera omu njira. Honaho malaika asiga Petero. ¹¹ Erhi akengukwa, Petero aderha erhi: Namabonaga nk'oku kunali oku Nnamahanga anarhumire malaika wage, amana ndikuza omu maboko ga Herodi n'oku ngasi byoshi olubaga lwa bayahudi lwakagi linga okunjirira. ¹² Erhi ayusa oku gerereza, aciyerekeza ebwa nyumpa ya Maria, nnina wa Yohana, wali uderhwa kandi Marko, emunda batu banji bali sanyikire n'okusengera. ¹³ Akomanga oku lunvi lw'emuhanda, na mwananyere muguma, izino lyage Roda, ayishi yunvirhiza. ¹⁴ Amanyirira izu lya Petero; anashagaluka, ahali h'okuyigula, alibirha okuji derha oku petero ali oku lunvi. ¹⁵ Bamubwira: oli mw'isirhe. Cikwoki aderha bwenene oku kwobinali ntyo. Banaderha erhi: Ali malaika wage oyo. ¹⁶ Na Petero agendekera akomomba oku lunvi. Bayigula olunvi, bana somerwa okumubona. ¹⁷ Petero, abakema n'okuboko oku bahulike, ana bashambalira gurhi Nyamuzinda anamukulaga omu mpamikwa, anaderha: Mubwire Petero na bene wirhu ogwo mwanzi. Anahuluka, anagenda ahandi hantu. ¹⁸ Erhi buca, embaka zaja omu kagarhi k'abasoda, mpu gurhi Petero anabire. ¹⁹ Herode, aja kw'amulonza ci arhacimubonaga, adosa abalanzi, anabaha irhegeko oku banigwe. Enyuma lyaho ahonokera e Yudea arhambikira e Kaisaria, abera yo. ²⁰ Herodi akunirira bwenene abana b'e Tiro n'e sidoni. Cikwone bayisha emwage na murhima muguma; n'erhi aba amayinjibana Blasto, ye wali murhonyi w'omwidumbiro lya Herodi, bajihûna omurhula, bulya ecihugo cabo cakagi lwisibwa n'eca mwami. ²¹ Olusiku bali balaganine, Herodi ayambala enyambalo yage y'obwami, atamala oku ntebe yage y'obwami, ababwira e myanzi. ²² Olubaga lwakayama mpu: izu lya mungu, ci lirhali lya muntu! ²³ Honaho, malika muguma wa Nnamahanga amushurha, bulya arhahanaga obukuze emwa Mungu. Afa, ali alundwa n'emivunyu. ²⁴ Emyanzi ya Mungu yalumira bwenene, n'abigirizibwa bayushuka. ²⁵ Barnaba na Sauli nabo, erhi baba banayusa ebi bali barhumirwe, bagaluka e Yerusalemu, balerha na Yohane wayirikagwa kandi Marko.