¹ Entumwa na b'ene wabo abâli e Yudea bayunva oku abarhali Bayahudi nabo bayankirire akanwa ka Mungu. ² N'erhi Petero arheremira e Yerusalemu, abo b'okukarhwa bamulonzagya, ³ Baderha erhi: Wajirage omu mw'abarhali bakarhe, wanalya haguma nabo. ⁴ Petero arhondera ababwira oku byabiire n'oku bya hwire. ⁵ Aderha erhi: Nâli omu cihugo ce Yopa, na, erhi ndinahûna, nahola n'okubonekerwa: ecirugu, cashusha nka mushangi mugali mushweke ebishumiro byaco binii, cayandagala kurhenga e mpingu caja ho. ⁶ Amasu nakanirize oku ogwu mushangi, n'alolereza, n'abona ensimba z'amagulu gani z'igulu n'ensimba z'erubala, n'enjoka n'orhunyunyi rhwe malunga. ⁷ Nanayunva izu lyambwira erhi: Oyimuke, Petero, onige onalye. ⁸ Cikwone naderha nti, nanga, arhali ntyo Nnahamwirhu, bulya akantu kabi erhi k'izinga karhasangi ja omu kanwa kani. ⁹ Cikwone izu lyayunvikana bwa kabiri kurhenga okunkuba lyaderha erhi: Eci Mungu acesize, orhacibonaga cizinzire. ¹⁰ Eco cayisha kasharhu; enyuma ly'aho byoshi byashubi lengezibwa oku nkuba. ¹¹ Muli ago mango go na neene, bantu basharhu barhume kurhenga e Kaisaria kuja emwani baja oku lunvi lw'enyumpa nali mwo. ¹² Mûka gwa Mungu ambwira mpu ngende rhweshi buzira kurhindira. N'aba bantu ndarhu bagenda haguma na nani, rhwanaja omu nyumpa ya Kornelio. ¹³ Oyu muntu anarhurhondereza oku abonaga Malaika ayimanzire omu nyumpa yage anaderha erhi: Orhume e Yopa, ohamagale Simoni, erindi izino lyage Petero, ¹⁴ Oyo akubwira ebinwa byokukuciza, we n'enyumpa yawe yoshi. ¹⁵ N'amango narhangiraga okuderha, Mûka mutakatifu abayandagalira, nk'oku arhuyandagaliraga burhanzi. ¹⁶ Ago mango nakengera kalya kanwa Nnahamwirhu aderhaga erhi: Yohana abatizize n'amishi, cikwone mwehe, mwabatizibwa na Mûka gwa Mungu. ¹⁷ Ntyo, bulya Mungu abahire olwo luhembo nk'oku arhuhaga kwo rhwehe amango rhwayemeraga Yezu Kristo, kananahasha, nie, okulahira ebi Mungu amaderha? ¹⁸ Erhi bababamayunva ntyo, bahweekera, babuli citakira Mungu, baderha erhi: Lero Mungu ahire obuciyunjuze ab'eyindi milala, mpu lyo bahabwa obuzine. ¹⁹ Na ntyo abashandazibagwa enyanya ly'ago malumwa gayishaga enyanya lya Itefano bagenda kuhika e Foiniki, n'omu cihugo ciri omu nyanja e Kipro, n'e Antiokia, ci kwone barhaderhaga akanwa ka Mungu okuzindi mbaga ci em'Abayahudi bone. ²⁰ Cikwone abandi muli bo abantu b'ekipuro n'e kurene, abo erhi bahika e Antiokia, baderha n'Abagiriki haguma, babayigiriza emyanzi y'akalembe ya Nnahamwirhu Yezu. ²¹ Okuboko kwa Nnahamwirhu kwali haguma nabo, n'abantu banji bayemera bahindukira Nnamahanga. ²² N'emyanzi enyanya lyabo yahika omu marhwiri g'aba kanisa k'e Yerusalemu, lero barhuma Barnaba mpu aje e Antiokia. ²³ Naye amango ahikaga, abona olukogo lwa Mungu, ashagaluka, abahanûla mpu boshi babe n'omurhima muguma bacishwekere kuli Nnahamwirhu. ²⁴ Bulya ali muntu mwinja, ali ayunjwire Mûka Mutakatifu n'obwemere. N'abantu banji bashiga Nnahamwirhu. ²⁵ Barnaba aja e Tarso, ajilonza Sauli; ²⁶ N'amango amubonaga, amulerha e Antiokia. Bayusa bombi mwaka muguma gwoshi omu mirhwe y'akanisa, banayigiriza yo bantu banji bwenene. Aho Antiokia ho, harhanzi, entumwa zihamagalwa ba kristo. ²⁷ Muli ago mango, abarhonzi bayandagala kurhenga e Yerusalemu kuja e Antiokia. ²⁸ Muguma muli bo, izino lyage Agabo, ayimuka, n'okuderha kugerera Mûka wa Mungu oku haba ecizombo cinene omw'igulu lyoshi. Cayishagiba, amango, Klodio ali rhambwire. ²⁹ Abigirizibwa batwa mpu barhume, ngasi muguma okwanahashire, oburhabale oku baabo ba kristo b'e Buyahudi. ³⁰ Babarhumira abagula omu maboko ga Barnaba na Sauli.