¹ Hali muntu mugume eKaisariya izino lyage aderhagwa Korneli, ali murhegesi w'engabo ederhwa y'aba Italiana. ² Oyo mumtu ali mwinja anakagi yoboha Mungu, n'enyumpa yage yoshi; akagi hana ntulo nyinji oku bantu, anakagi shenga Nnamahanga ngasi mango. ³ Aha nsa mwenda z'omu legerege, anabonekerwa n'obwalagale Malaika wa Nnamahanga aja omu mwage, ana mubwira erhi: Korneli! ⁴ Amulolereza bwenene, ana gwarhwa n'ecoba, anashuza: bici, Nnahamwirhu? Malaika amubwira erhi: Amahuno gawe n'entulo zawe zasosire embere za Mungu, anaku kengire. ⁵ Orhumage abantu eYopa, bajilerha Simoni, okola oderhwa Petero; ⁶ Aba ahamwa muntu muguma oderhwa Simoni, omu bambu w'empu, n'enyumpa yage eri eburhambi bw'enyanja. ⁷ Erhi Malaika wali mubonekire aba ama genda, Korneli ahamagala baganda bage babiri, abaheba kwo n'omusoda oyoboha Nyakasane, muguma w'omu balalisi bage; ⁸ N'erhi ama ba bwira byoshi, abarhuma eYopa. ⁹ Erhi buca, nk'oko banali omu njira, banali kola bayegerire olugo, Petero asokera oku nyanya ly'e nyumpa, aha nsa ndarhu, mpu aji huna. ¹⁰ Ashalika, alonz'okulya. Erhi bali bamutayarikiza ebilyo, abonekerwa. ¹¹ Abonan'empingu eyigusire, n'ecirugu ca yandagala, nka mushangi munene cayandagalizibwa enw'igulu, cishwesirwe bikwi binni, ¹² N'omu karhi kaco mw'emilala yoshi y'ensimba yali, ez'amagulu gani, n'ensimba zooshi z'igulu z'okuci bulula, n'orhunyunyi rhw'emalunga. ¹³ N'izu liguma lyamubwira erhi: Yimuka, Petero, oyirhe onalye. ¹⁴ Cikwoki Petero aderha: Nanga, Nnahamwirhu, bulya ntasangi lya ebilyo bibi erhi b'izinga. ¹⁵ Nakandi bwwa kabirhi izu lyaciri murhengera lyaderha erhi: Ebi Mungu anadesire bicesibwa, orha bibonaga nka b'izinga. ¹⁶ Bya ciri hikirira oku bwa kasharhu; na lero omu ntyo, ecirugu cashubira eMpingu. ¹⁷ Erhi Petero agwerhe acidosa erhi lero byo bici ebyo anbwine, olole, abantu bali rhumirwe na Korneli, badosa enyumpa ya Simoni, bana yimanga emalanga g'omuhango, ¹⁸ Banadosa n'izu linene erhi haho ho Simoni ali lamire, waderhagwa Petero. ¹⁹ Na nkoku Petero aciri gwerhe arhimanya oku ebyo abonaga, Mûka Mutakatifu amubwira erhi: Lola, bantu basharhu bali bakudosa; ²⁰ Yimuka, honoka, onagende nabo buzira oku cisimbaha, bulya nyene mbarhumire. ²¹ Petero lero ahonoka, anabwira abo bantu erhi: Alagi, nye niono mugwerhe mwalonza; bici birhumire mwayisha? ²² Bashuza erhi: Korneli, murhegesi w'abasirika, muntu w'okuli na wakuyoboha Mungu, mukengwa omw'ishanja ly'abayahudi lyoshi, abwizirwe na malaika mpu akuhamagale aha mwage, ayunvirhize n'emyanzi yawe. ²³ Petero abaheka omu nyumpa, ana bahandisa. Erhi buca, aheba njira, agenda boshi nabo haguma nab'eYopa bamulusa. ²⁴ Bahika eKaisaria erhi buca. Korneli ali abalinzire, anali lalisire ababusi bage n'abira bage. ²⁵ Erhi Petero adaha, Korneli amuja ho, ahirima aha magulu gage ana fukama. ²⁶ Ci Petero amuyimanza, amubwira erhi: Yimuka; na nani, ndi muntu. ²⁷ N'omu kuj'aganira haguma naye, adaha omu nyumpa, anashingana bantu banji batamire. ²⁸ Aderha n'abo erhi, mwehe mumanyire oku omuyahudi arhanka yinjibana erhi aj'omu nyumpa y'omuntu w'ogundi mulala. Cikwone Nnamahanga anyigirizize okurhanka lola omuntu nka mubi erhi w'izinga. ²⁹ Co carhumire nayisha buzira kadali amango mwampamagalaga; nantyo ndosize mpu bici byarhumaga mwa mpamagala. ³⁰ Korneli aderha erhi: Nsiku zini izi, omu kuhinka nka buno, nakagi huna omu mwani aha nsa nda; lolaga, omuntu muguma waliyambirhe omushangi gw'okumoleka ambonekera emalanga gani, ³¹ Ana derha erhi: Korneli, amahuno gawe gayunvikine, na Nnamahanga akengire entulo zawe. ³² Orhume abantu eYopa, baji hamagala Simoni, okola oderhwa Petero; aba omu nyumpa ya Simoni, muntu w'okuband'empu, hofi n'enyanja. ³³ Honaho nakurhumiza, wamana jira bwinja oku yisha. Nantya rhukola rhuli rhweshi emalanga ga Nnamahanga, lyo rhuyunva byoshi Nnahamwirhu anakubwizire warhubwira. ³⁴ Lero Petero, ayigula akanwa, aderha erhi: Okunali, mmanyire oku Mungu arhajira kalondola oku bantu, ³⁵ Ci omu mbaga zoshi omuyoboha n'ogenda oku bushinganyanya anamurhonye. ³⁶ Arhumire akanwa oku bana b'Israeli, omu kubaha omurhula oku Yesu Kristu, oli Nyakasane wa boshi. ³⁷ Mumanyire ebyahikirire omu Yudea mwoshi, enyuma ly'okurhondera eGalilaya, enyuma ly'obubatizo Yohana ayigirizagya; ³⁸ Mumanyire oku Nnamahanga ashigaga Yesu w'e Nanzareti amavurha g'okumuyunjuza na Muka Mutakatifu n'emisi, akagi ja ngasi hoshi ajajira aminja n'oku fumya boshi bali rhambwirwe na lyangombe, bulya Nnamahanga ali haguma naye. ³⁹ Rhuli badima rhweshi b'ebi ajijire omu cihugo c'eBuyahudi n'eYerusalemu. Bamuyirha, omu kumu manika oku murhi. ⁴⁰ Nnamahanga amufula lusiku lwa kasharhu, anamulangulana n'obwalagale, ⁴¹ Arhali oku bantu boshi, c'oku badima balondolagwa na Mungu burhanzi, oku rhwe rhalire n'okunywa haguma naye, enyuma ly'okufuka omu bafu. ⁴² Na Yesu arhu rhegesire oku rhuyigirize abantu n'oku hamiriza oku ye wajiragwa na Nnamahanga mutwi w'emanja wabazine n'abafire. ⁴³ Yolya abalebi booshi badesire mpu ngasi omuyemire anakulirwe ebyaha oku izino lyage. ⁴⁴ Nk'oku Petero aciri gwerhe aderha, Mûka Mutakatifu ahonoka oku bantu boshi bakagi yunva omwanzi. ⁴⁵ Abemezi boshi b'omu buyahudi baliyishire na Petero boshi basomerwa n'okw'enshokano ya Mûka Mutakatifu yahonokeraga ciru n'oku bapagani. ⁴⁶ Bulya bakagi bayunva baderha oku zindi nderho n'okukuza Nnamahanga. Lero Petero aderha erhi: ⁴⁷ Ka rhwana lahira okubatiza oku mishi aba habirwe Mûka Mutakatifu na nirhu? ⁴⁸ Anaci rhegeka mpu babatizibwe okw'izino lya Nyakasane. Banamuhuna mpu ajire nsiku nsungunu emwabo.