¹ Nie Paulo, Nnamahanga ampamagalaga n'obulonze bwage mpu mbe ntumwa ya Kristu Yesu, na mwene wirhu Sostene. ² Aga maruba ngarhumire omurhwe gwa bakristu b'e Korinto, balya bahamagalagwa mpu balame muli Nnamahanga na balya bakola baba bantu bageerhi Kristu Yesu orhuma, n'abandi bali ngasi hoshi, bala baderha izino lya Nyakasane wirhu na wabo ntyo. ³ Olukogo n'omurhula gw'emwa Nnamahanga Larha Nyakasane Yesu Kristu bibe haguma na ninyu mweshi. ⁴ Ntahusa okuvuga Nnamahanga omunkwa erhi mwe murhuma okwa lulya lukogo lwa Nnamahanga muli Kristu Yesu. ⁵ Bulya erhi mulungana mweshi na Kristu, mwashobola ngasi buhiri, ci bwenene eri nshobolo y'oluderho n'ey'obumanye. ⁶ Obuhamirizi kristu ajiriragwa bwabezire muli mwe. ⁷ Mpu lyo murhaki bulirwa n'enshokano nguma ya Nnamahanga, mwe muli mwalinda akasangi Nyakasane wirhu Yesu Kristu ayalagala. ⁸ Ye wamu imanza buzi buzibu kuhika oku buzinda, lyo haleki jira akanwa kabi bamushobeka olusiku lwa Nyakasane wirhu Yesu Kristu. ⁹ Namahanga arhatwa omu kanwa kage, ye warhu hamagalaga mpu rhulungane haguma n'omugala Yesu Kristu Nyakasane wirhu. ¹⁰ Bene wirhu, mmuyinjibine omw'izino lya Nyakasane wirhu Yesu Kristu nti: Muka yunvanya, harhanabaga obwiyungule muli mwe; mulungane buzi buzibu mube na borhere buguma omu ngererezo muka nahiga kuguma. ¹¹ Yaga bene wirhu bene Kloe bambwizire mpu muli mw'akadali. ¹² Ka mubwiragi: Ngasi muguma muli mwe akol'akaheka kwage. Hali oli aderha mpu: Niono mba wa Polo n'owundi mpu: Niehe mba wa Apolo; owundi ashui derha mpu: nani mba wa Petero; n'owundi mpu: Mba wa Kristu. ¹³ Kako mucikebirwe mpu Kristu aba agabanukine? Ka Polo ye babambaga oku musalab erhi mwe murhuma? K'erhi mubatizibwa ka mwayunvirhe izino lya Paulo? ¹⁴ Nvuzire Nnamahanga omunkwa bulya ntaye nabatizize muli mwe, aha nyuma lya Krispo bone Gayo bone. ¹⁵ Ntaye wankaderha mpu okw'izino lyani mw'o abatizibagwa. ¹⁶ Neci nama kengera oku nabatizize na bene Stefano, nta wundi ncikebirwe. ¹⁷ Kristu arha ntumaga mpu mbatize, ciantumire mpu nyalize emyanzi y'akalembe, buzira kukolesa obwenge bw'enderho, lyo ntaki rhenza obuhashe olufu lwa Kristulwaberaga oku musalaba lujira. ¹⁸ Enyigirizo zidesire olufu lwa Kristu lwa beraga oku musalaba, bwo buhwinja emihera yohe ederha; cikwone rhwe rhuli omu njira y'obucire zo rhuderha buhashe bwa Nnamahanga. ¹⁹ Yunvagyi oku amandiko gadesire: Nashereza obumanye bwa bana bumanye naheza obwenge bwa bana bwenge. ²⁰ Ngahi ali omurhimanya? ngahi ali omwandisi? Ngahi ali ow'amakengu? Kali mira Nnamahanga ayerekanaga ok'ubumanye bwer'igulu buba buhwinja? ²¹ Ecirhumire bulya abantu b'en'igulu bayabirwe bwamanya Nnamahanga omw'obwo bumanye bagwerhe, barha cibwiraga aha obumanye bwa Nnamahanga bwarhengaga. Okwo kwo kwarhumire Nnamahanga ahiga okw'akolaga acungula ngasi bayemire akanwa karhali mwo buhwinja rhuli rhwayigiriza. ²² Abayahudi bohe birhangaza bahuna, n'abagiriki bahuna obumanye. ²³ Cikwone rhwehe rhuhamiriza Kristu wabambagwa oku musalaba: Ogwo guli mwanzi gwaku sarhaza abayahudi bunali buhwinja oku barhali bayahudi. ²⁴ Cikwone kuli balya Nnamahanga ahamagala, bayahudi n'abarhali bo, Kristu ye rhuyishi oku ye buhashe bwa Nnamahanga ye na bumanye bwage. ²⁵ Bulya ebiboneka nka buhwinja bwa Nnamahanga byo bigwerhe obumanye hali obumanye bw'abantu, n'ebi bonekana nka bugonyo byo bizibu kulusha emisi y'abantu. ²⁶ Bene wirhu musinze bahi na bahi Nnamahanga ahamagire mpu bayubake omurhwe gwinyu: nk'oku abantu banayorha, mulli mwo babumanye banyi; na banyi b'omu mulala gujir'irenge. ²⁷ Cikwone Nnamahanga acishoga ebi abantu bahindula buhwinja aba byo abonesa mwo ab'obumanye nshonyi; acishoga ebi abantu bahindula buzamba abonesa mwoba ciri misi nshonyi. ²⁸ Acishoga ebi abantu bahindula bya busha n'oku biganyaguza, ebi abona nka busha aba by'ashereza mwo ebi babona nka bigwerhe akamalo. ²⁹ Intyo kwo kwankarhuma ntaye wanka cikungira emalanga ga Nnamahanga. ³⁰ Cikwone mira Nnamahanga amulungaga haguma na Yesu Kristu, aba Kristu ye ahindula bumanye bwirhu: Oyo Kristu ye warhumaga rhwajira bashinganyanya embere za Nnamahanga. Rhukolaga bantu bakulama muli Nnamahanga, rhwacungwirwe oku byaha. ³¹ Nka kulya amandiko gadesire mpu: Owalonza okucikunga, acikungire ebi Nyamuzinda ahikirize.