¹ Moresungawe e nkumanano, Yesu wataya habhasirwa ne r'ou; na, kuruma n'er'erika we e kwansi, e santumwa sae bhashere kwihi nae. ² Kuruma, wobhore e bhunu, wahana bho, n' iebha: ³ Bhakasanirwa imbi e bhasene bhe mutima; bhushwa e bhubhake bhwa mo mbingu bwabho! ⁴ Bhakasanirwa imbi bhari n'e bhonso bhushwa ibho bhasebhongwa bhongwayo! ⁵ Bhakasanirwa e bharongu, bhushwa ibho bhasesimayo mo chuo! ⁶ Bhakasanirwa imbi bhari n'e rwaka na mbusha y' ereira, bhushwa bhasesikutayo! ⁷ Bhakasanirwa imbi bhesensasi, bhushwa bhasesheeyo nsasi. ⁸ Bhakasanirwa imbi bhe mutima wakonda, bhushwa bhasesungayo Ongo! ⁹ Bhakasanirwa imbi bharongani, bhushwa bhabhikirwayo bhasike bha Ongo! ¹⁰ Bhakasanirwa imbi bhanubhiwange mo n'eira, bhushe e bhubhake bhwa mo mbingu bhwaboh! ¹¹ Mukasanirwa amabhesa entambi mumakambawa, mumanubhiwa bhushwa n' ani. ¹² Mushime na mubhese n'kokoma bhushwa e r'ohembo rw'inu rusebhundukeyo rukiri mo mbingu; bhushwa imbo ng'wanubyangabho e bhatahwa mbi bhabhesenga kubhusongori ninu. ¹³ Bhanu ng'e mukwa w' echuo. Ina kuti e mukwa wamariminya er'ichake rao, hima nanki ngi risekurucharo? usira tu mufa itawa ho ekumbhuka, n' inantwa mo mindi y' ebhea. ¹⁴ Bhanu chaka ch' echuo. obhungu rwimbwa habhasirwá n'ou rutamukochi ibhisama; ¹⁵ Na bhatasachanga kasuku mwi iriyako kumunda na mutundu, Ina bhariangako habhasirwa na bhutanda, na ntikarisha chaka mu mbi bhari mo rechumbi. ¹⁶ Echaka kinu kisake bhumbo bhusondori bhwe bhea, kongo bhasung'e mikorere y'inu yakonda, n'itata tita winu ingu urikire mo mbingu. ¹⁷ Angi anikira mbu n' iya kabhisha e myomba ari e bhatahwa, nareya nti bhushe ebhisha, ina bhushe n' ibhereresha. ¹⁸ Bhushe, nabhwire cho mo reira, ibhesa embingu n'echuo bhitangeti, hatangeta mu myomba anga na kunda ari anga na kakeke ka-rwandiko, nambu bhusekiayo ebhiti bhyasungwa. ¹⁹ Ingu waseriribhanyayo uma mo myomba nji mikeke-mikeke, nangwa ahanayo mo bhea ikora bhubho-bhubho, wabhikirwayo mukeke nguru mo bhubhake bhwa mo mbingu; Ina kinsi ngu wasubhahayo, ni ihana erisubhaha yo, ingo wabeseyo mukakare mobhubhake bhwa mo mbingu. ²⁰ Bhushe nabhwire, kuti ereira rinu ntirarenga e bhandiki bh'e myomba n'e bhafarisayo , mutukimiyo mo bhubhake bhwa mo mbingu. ²¹ Murikorukira imbu bhwarekind' iyebhwa n' ebhakakare: ang' ishura. kinsi ng' washura wakomenwa obhansa kuri ebhakeri bh'e samansa. ²² Ina ani, nabhwere kinsi ng'wasibhuke munachabho wakomenwa obhansa kuri ebhakeri bhe semansa, ingu webhayo na munachabo mbu: nti usi kikai! wakomenwa erierwa ha rushu rukakare; na kínsí ngu wasebayo mbu usira bwenge. wakomenwa obhansa rw' eribha ra kasha. ²³ Amabhese nti ukurisha ohembo umasibhukia mbu munakinu uri na kinwa kuri Ongo, ²⁴ Siaro erohambo rwabhe habhusondori ebhukoki, na endanga kasa kironganya hima na munakinu; kuruma, wiye karisha erohembo rwabhe. ²⁵ Rongana n' emusongeri wabhe tete, e ntambi bhanu muri mo munse hima nae, mwesubhaha watangakuriya habhakera mansa, e mukera-mansa utangakuriya kw'emukakare, n'ekuriya mo ngori. ²⁶ Nikwirengi mor'eire utusaiyomo kúti nti neki utuwa erutea rwa hende. ²⁷ Murorukira rarebhwa: kiro singirana. ²⁸ Ina 'ni nabhwire mbu kinsi ng'wakae momína mw'imuraamo wamakindi 'ronja nae osingirwa kumunda n'emutima wae. ²⁹ Amabhese eriso rabhe r'ekwabhume ramubhese kuri ongo inse y'erimina kuraro n'itaaro kore nabhe; bhushe mwengerero kuri ongo kima mo bhitera bhyabhe kirimine ekiya emubhi wabhe uti utawe munkati n'ererunga. ³⁰ N'amabhese emombo wabhe w'ekwabhume wamabhese kuri ongo in se y'erimina, kekerao n'itao kore nabhe; bhushe mwengerero kuri ongo kima mo bhitera bhyabhe kirimine, ekiy'emubhi uti wendi munkati n'ererunga. ³¹ Rarebhwa: kinsi ng'wahensa mukari wamuninkanga rwandiko rw'esiana. ³² Ina 'ni, nabhwire mbu kinsi ngu wahensa mukari, ibhese ho mw'osingirwa, ntwamusia mw'ironja osingirwa, na kinsi wasebhinga mumina wahensiwa, ntwakiya osingirwa. ³³ Murikorukira hotu mbu rarebhwa n'ebhakungu: angi sere, ina wetunjanga kuri Nyere-kurinu munshi chakweba ongo. ³⁴ Ina ani nabwire angi sere kiro nahakeke, ari mo mbingu, bhushe nge kitumbi ch'ebhubhake wa Ongo. ³⁵ Ari mo chuo, bhushe ngyaterekawe emindi; ari ku Yerusaremu, bhushe nge robhungu rw'emubhake mukakare. ³⁶ Angi sere na kubha mo muntwe wabe, bhushe utumuronja anga n'oteo ruma rubhesi ingwi ari rwasiro. ³⁷ E kinwa kinu chabhesenga narisiya, natina; chamurenga mpo ntiye chatuka kw'emurenda. ³⁸ Murikorukira mbu rarebwa: riso mu riso, na rino murino, ³⁹ Ina ani nabhwire angikurucha bhubhi mu mwea wema. kinsi wasekuhumba mw'itema r'ekwabhume, musheanga n'erimpe. ⁴⁰ Kwamabhese usondange ekuriya mu rushu, n'ikunyak' ereshibhabho rabhe, musieri hotu n'engombe ya kumbo. ⁴¹ Kwamabhese wemima mw'ienda nabhe karambo kima, ronja nae tubi. ⁴² Ninka kinsi ngwakukonga, na anga utinirengu usondange kw'isombya ekuri ongo. ⁴³ Murikorukira mbu bhwarebwa: ushimanga munakinu, n'uyongwanga murendabhe. ⁴⁴ Ina ani nabhwire: mushime bharenda bhinu, mukasanyienga imbi bhabuherange, na muhemi imbi bhabhubabhayange n'ibhunubhya, ⁴⁵ Kongo mubhinduke bhana bhatita winu ingu uri mo mbingu; bhushe usachiengi emwishi wae ebhabhi n'ebakonda, na uhichiengi embura kuri bhereira n'ebhasira ereira. ⁴⁶ Amabhese nti mukushima imby'ebhabhushima, ohembo nki ngi rwakomenwa bhanu? ebhakóngóri bhesahoro hotu nabho nti ngi bhuronjangabho bumbo? ⁴⁷ Na amabhese nti mukeya bhanakinu, mukia nki charengana? entibhasi Ongo nabho bhataronjanga mbo? ⁴⁸ Mubhese bheira, bhuri tita winu wamo mbingu weira.