¹ Bhakakare , munink'ebhakori bhinu imbi bhiri eira na byarengeka, musibhiriranga mbu na bhanu hotu bhanu muri na mukakar'ekwiyo. ² Mw'esumye mo mahemo, mukohye muo hima n'eshima n'itata. ³ Mutuhemi na bhate kongo Ongo watobhore rubhi rw'ekinwa, n'ikoch'itura ebhishisharo bya Kirisitu, bhushe nancho naminwa, ⁴ N'isibhirisha cho bhuri mbu bw'er'iebha'ni. ⁵ Mwendi hima na bwenge kuri mbi bhari ekubhutara, na mukururi entambi. ⁶ N'ebhinwa bhinu bhiti by'emisanye na nchumo, byaroe mukwa, kongo musibhirire bhuni bwamusako bhanu kinsi mwea. ⁷ Tikiko, ingwashimwa, munakitu na wakomenwa mukori, mutindikiri wani mo murimo wa Nyerekuritu, wabhutureyo ebhiti byankae. ⁸ Namwere mbu w'endi tete kuri bhanu, kongo musibhirira ebhuri bhate, na kongo wabhongabhong'emitima yinu. ⁹ Namwere wendi kuri bhanu hima na Onesimo, wakomenwa na munakitu, nae uma mu bhanu. Bhasebhuture bhiti byetange kuno. ¹⁰ Aristariko mutindiki wani wamor'eminwa, wabhukeya, na Mariko musara wa Baranaba, mo kinwa ncho ch'orikiranga bhanu, wamenda kuri bhanu mumukoki. ¹¹ Yesu, ing'wabhikirwa Yusto, wabhukea hotu.Uri mumbo bharend'ekotende, nabho bhesine ngi bharekora hima nani mo bhubhake bwa Ongo, na ngyabhesenga bhanibhongabhongange. ¹² Epafrodito, winu wabhukea: mukori wa Yesu Kirisitu nt'wareke mor'ebhukwame mo mahemo ae, kongo, bharengekana, bhasimira n'eruti murikeyo na mucho na kw'ehicha n'eruti mor'isasa ra Ongo. ¹³ Bhushe nimwebherengi imbu wenubyange bhushe ninu, mumbo bha ku Raodikia na ku Hiarapori. ¹⁴ Ruka, mirani, wabhukea, na Dema nae. ¹⁵ Mutukeree bhanakitu bhari ku Raodikia, naku Ninfa,n'erirameso 'ndi riri mw'echumbi rae. ¹⁶ E ntambi emitiro isekiya yamakind'insonsomorwa kuri bhanu, muronje risonsomorwe tu mor'irameso ra ku Raodikia, na munsonsomore turo kuri bhanu eraku Raudikia. ¹⁷ Na muturio Arkipo: warangane n'emurimo ing'waninkwae na Nyerekuritu kongo wakorao ishu. ¹⁸ Nabhukea, ani Pauro, mo mine yani. Musubhukianga ereminwa rani. N'enchumo ibhe hima ninu.