¹ Pauro, ntumwa ya Yesu Kirisitu mor'isasa ra Ongo , na munakitu Timoteo. ² Mo bhashuururwa na bhanakitu mbi bhakomenwa kumunda na Kirisitu imbi bhari ku Korosai; esansasi n'ebhuhoro muninkwe byo, etuka kuri Ongo Tita! ³ Twatata Ongo, Tita wa Nyerekuritu Yesu Kirisitu, na nti twareke mor'ebhuheme. ⁴ Mw'iyorukira bhate erisimira rinu kumunda na Yesu Kirisitu n'enchimi yinu mo bhashuururw'ebhati, ⁵ Bhushe n'emwenyihiro ingu wabhikirwa bhanu kokwiyo, n'ekinwa ch'ereira, ekinwa ch'emwasi wakonda chasibhanga bhanu erisondori. ⁶ Kiri munkati ninu, na mochuo kiti, kibhutange byuma, na ch'oshukange, bhuri hotu e bwasusa bho munkati ninu, etukir'erotu ndo rwerukiranga bhanu n'iteerera ensasi iemisanya n'ereira, ⁷ Itukana n'emahano aninkanga bhanu na Epafrodito ingwashimwa witu mutindikiri mo murimo ngu kuri bhanu mukori wakomenwa wa Kirisitu. ⁸ Na ng'waretuture ini nchimi nji ikorange kumunda ninu. ⁹ Bhushe nancho na bhate hotu, etukir'erotu nda rw'erikiranga bhate, nti twarek'ihema Ongo kuri bhanu, n'ihema mbu murise iteerera erisasa rae, mo bhuteesa na bwenge bwa Mutima. ¹⁰ Mw'ienda mo bhususe bwarengekana na bwa Nyerekuritu n'imukomenwa n'eruti ebhuta byuma munkati n'emikorere njy'akonda mw'ioshuka mor'iteerera Ongo. ¹¹ Bhari na maa mu kinsi kikai mo bhunkangwe bw'ebhusime bwae, bhushe kongo mubhese ematw'eati hima na ngoa sandira na kirinso. ¹² Mutate Tita, ng'warebhukochesha mw'ishee muhango mo mwandu w'ebhashuururwa kumunda n'echaka ¹³ Ing'waritukuto mo bhunkangwe bw'emwerimya n'ituria mo bhubhake bw'emwana w'enchimi yae, ¹⁴ Ekuriwe turi n'enshukaro yitu, isasirwa r'ebhubhi. ¹⁵ Iwe nsusanya ya Ongo ing'utangasungwa, ntangi y'erironjiw'ebiti mbi bhiri ho. ¹⁶ Bhushe kumunda nae ngi kwaronjiw'ebhiti mbi biri ho ebhikai mbi biry'ekwiyo na kuno kwansi, ebhisungwange nambi bhitangasungwa, bhitumbi bya mabhake, bhukomenwa, bhuhime, bhukakare. Ebhiti byareronjiwa nae na bhushwa nae. ¹⁷ Urikubhusondori n'ebhikai bhiti, n'e bhikai bhiti byatingyane e kumunda nae. ¹⁸ Iwe muntwe w'emubhi w'erirameso; iwe ntangiro, ntangi munkati n'ebhakwi bhushe n'ibhesa mo bhiti waroso. ¹⁹ Bhushe Ongo abhesenga usondange mbu ebhukomenwa bhuti bhubhesi kuriwe. ²⁰ Ntusondange ekuriwe ekumanyany'ebitu hima nae, imbi byamubhese ekwansi nambi bhiri ekwiyo, mw'ironja ebuhoro ekuriwe, mo nchama y'eriango rae. ²¹ Na bhanu mbi mubhesenga karekare bheni na bharenda mo bhubhi bwinu na mikorere yema, wamabhukumanyanya kano kashangi mo roku rwae kumunda n'emubi w'enyama yae. ²² Mor'esungwa rinu kubhusondori nae bhashuururwa, anga kitambo chabhiha, anga mekero. ²³ Amabhese mukubha n'esimana munkati n'eresimira, bhusira ebunduka mo mwenyihiro w'emwasi wakonda ing'worukiranga bhanu, ing'wareturwa, munkati mbi bhiri ho hano hansi, na mumbyo ani Pauro nareronjiwa mukori. ²⁴ Niri na ngoa mukano kashangi munkati n'eminubho yani kuri bhanu; nanshi charuka mo minubho ya Kirisitu, nakindanya cho munkati n'enyama yani, mo mubhi wae ng'erirameso. ²⁵ Muro ngi mwareronjiwani mukori, iemisanya n'emurio ing'warembese Ongo kuri bhanu bhushe ntatura n'eruti ekinwa cha Ongo. ²⁶ Enama nji ya bhiswa y'esentambi siti n'ebhiranga bhingi, ina byasheiwa mo bhashuururwa bhae, ²⁷ Mumbi bhakiya Ongo wasondekanya ishea inki ng'ebhusime w'ebhusoki bw'emurimo ngu munkati n'enti bhasimira,isibha: Kirisitu kumunda ninu, emwenyihiro w'e bhusime. ²⁸ Iwe ng'uturange bhate, ihana kinsi mwea mo bhuteesa, mwishea Ongo kinsi mwea, wamakind' ibhesa mukomenwa munkati na Kirisitu. ²⁹ Muncho ngi mukorangy' ani mw'ikwana hima n'emaa ae ingy'ankoreshange na bhunkangwe kumunda nani.