¹ Ubhádjúliyáyi tàà bhagwali bhanédulusie angá bha túmbá ká angá bhakota, na iésimiya, na igwala tayali á mokambo wá n'kima, ² Na mbese ivfiya bhubhi dyúlú lá mushé, ni gwala mbese mbiko na bhshé, igwala mufano wan'kima, mudjali na iné dulusiya ápele na bhushé bhatopá. ³ Mungusa djúwe dyokúto, tubhiya móno tititi, mbèse iésimiya, bhabholé, bha owáné á tumbá djitopá dja kúlú dja mobhi ká na djá bhubhi, bhabhiké á bhukáli ká á kúlú, na iyónda bháné bhiliyá, ká djúwe dyokúto ibhiliana djuwe ngúngu. ⁴ Ngé, dyaa bhusumbá bhá Mbali mubhikisiyá wàsú ká bhuóndusia bhèse angá bhushé bhu énikiana, ⁵ Utú bhikisia, mbèse dyúlú lá mékambo má seliya miyo tubhi kiya, ngé iyékana na bhukúkú bhésé, na idjina lá ibhútala káamó ká na i iganila káamó mpumatima wa kengo, ⁶ Úwo úvfandja angásu na bhodye na Yesu Kilisito m'bhikisiyá wàsú, ⁷ Ambúsa tàà, mu bhandané na lokówa lésé, tu oúwe, na ikpalia, tiko á ibhika lá masi ku matopá. ⁸ Livfiya liuno li la angili, ká iyondúwe taa údjéliya bhima bhino, mungusa taa bhàà bhú djéliya Mbali bha andji ikamba mekambo mamikina. ⁹ Éna iyo iékima ká na faidha anga bhushe. Nge sekayi mikákányi tóku bhushé bhá tombé, na mingúso ma mabhoti, mbiko, mikakanyi á miyo mibhoniye idjéliya lá bhushé; mungusa mindjèse na maana ká mi tititi. ¹⁰ Gwalá dhómú, ambusa na isowáná lá kwanza ká na lamavfili, undjo ukpekisiye ivfakanana; ¹¹ Na idjibha taa tumba wa mushé tóku úndjo ú nudji basiyé dhomú, ká undjo úküe djambe, na idji ukúmúwa idjé ku bhanéné. ¹² Dyàa inétunúwe á Aletema áo á Tikiko, kiyá mángbalángba úkwi gboki á Nikopoli; mungusa i dyàa yá éngika iétisiya wakati wa lugwe. ¹³ Yayalisiyá ekima lokéndo lá Zenasi, Dokotolo wa seliya, ká lá Apolo, taa bhané kandé éma. ¹⁴ Ekpiye tàà bhangangasú dyokuto bhadjibhi ikamba mékambo ma mikimá mungusa bhasaidiyá kúlú dja bhaa bhá bhakandé, ambusa tàa bhané gwale mbèse ibhúta puma. ¹⁵ Bhatopá bhaa énabhó bhané salimiya núwe. Salimiya bhaa bhatú onduwe á idjeliya. Kiya lokówa lúgwali nanú bhatopá