¹ Yavfia kotiyo: Mbali utikila bhushe bhese? mbese! ngo emi dyokuto mu Isalaeli, wa libhoti la Abhalayama, wa kabila ya Benyamina. ² Mbali satiki lese ta bhuwa bhushe bhese, bhaa ubha djibha pikilie. Nundje djibhianu iyo makpalua muvfia dyulu la Eliya, namuna eyo ú sitakiye Isalaeli anga Mbali: ³ Bhwáná, bhu ola bha kanga, bhu bhukula mituwa mai, etikala emi ka lesi, ka bha vfungalie ini ndula? ⁴ Nge indje djibhu iyo Mbali ú muwa? itayalisia bhushe elefu sabha, bhaa bha tshume abho malu á pele na Bhaala. ⁵ Inamuna ku emoi dyokuto á wakati uno, itikale bhaa bhu minulana iyekana na lokowa. ⁶ Ngo, ani i na mungusa wa lokowa, indjese dyulu la mekambo; namuna yomo lokowa lun'djese tese lokowa. Ka ani i ku mekambo, indje tese lokowa; namuna yomo, mokambo indje tese mokambo. ⁷ Idje kotiyo? iyo Isalaeli uvfungalie, sali udhe ese, nge iminula li udha, ka bhaamo bhubhia na mitima kpingbi, ⁸ Toku ibhia ekpaluana: Mbali ubhaowa mpumatima wa ibhelia, madjo ma mbese iena, ka matoi ma mbese ioka, mpaka bhusi bhuno. ka Daudi avfia: ⁹ Kia meza mabho migwali angabho mulungo, bhokila, makiya, ka igwali malipo mabho! ¹⁰ Kia madjo mabho magwali na livfue na mbese imi iena, ka mikongo mabho mikenila na ikonguma! ¹¹ Yavfia kotiyo: i mungusa wa itutala liyo bhu kuwa? mbese! nge, i á ikuwa labho liyo, bha pagano bhu djeliana bha bhuki, ambusa taa bha gwali bha susuliana á ibhiliana. ¹² Ngo, ani ikuwa labho libha bhu bhugumia bha kisi, ka ibhúú maishiana la bhugumia la bha pagano, bha gwali imbani dyaa bhatopa bha dji bhasie. ¹³ Yanesowa nuwe eyo, bha pagano: matoku emi ntende wa bha pagano, ebibie mokambo wami, ¹⁴ Ambusa, ani iwezekanie, isusulia ibhilia la bhaa bha bhami, ka na ibhikisia bhaamo. ¹⁵ Ngo, ani ituana labho i iyo kanisiana la bhushe á kisi, igwali titani ikpudhusiana labho, imbi ibhika labho anga bhaa bhuogwa? ¹⁶ Ngo, ani bhiapikilie bhikengo, undukowa ao ú dyokuto; ka ani mulika ú kengo, mitavfi mi dyokuto. ¹⁷ Nge ani mitavfi mimo mibhia miesesiane, ka ani owe, undjo ubhia eti wa mizautuni ya muluwa, ubhia mutangane á semele nabho, ka waouwa wa mulika ka wa isoguwa la eti ya mizaituni, ¹⁸ Mbese idji biba mungusa mitavfi miyo. Ani wadji biba, djibha taa mbese owe undjo ó na mulika, nge imuliko uwo anevfevfa. ¹⁹ Ovfikotiyo: mitavfi mibhia mi esisiane, ambusa na taa emi egwali mulumile. ²⁰ Iyo i ekima; mibhia mi esisiane dyulu la ikanda idjelia, ka owe, ubhikie na idjelia. Mbese inetikilisia á bhisaú, nge ondhúa. ²¹ Ngo, ani Mbali sa tike esemitavfi mya asili, andjene tikiliese. ²² Bhona kotiyo bhu kima ka bhukali bha Mbali: bhukali anga bhaa bhu kuwa, ka bhukima bha Mbali angai, ani wa gwala n'kane á bhulima bhuwo; ani wakia namuna yomo, ugwali dyukuto muesiana. ²³ Ka namuna temoi, ani bha gwale abho bhalivfie á mbese idjelia, bha gwalie bhalumile; ngo Mbali ú na lokulu la ibha lumusia kaamo. ²⁴ Ani owe, ani ubha mu esisiane á eti wa mizautini ya asili wa muluwa, ka na itanganisiana kuvfi á asili wai á eti ya mizetumi ma ekima, inamuna temoi bha gwali bha tangane iyekana na asili yabho á bhiti bhabho bha mizeituni. ²⁵ Ngo indje onduwami, bhamomima, ta musinuwa sili ino, ambusa taa nunekone bhonile toku bha tumba, iyo séému temoi ya Isalaeli ikuwa á mbese idjelia, mpaka dyaa bha pagano bhatopa bhalumila. ²⁶ Ka inamuna ino Isalaeli n'topa igwalie m'bike toku ikpaluana: m'bhikisia ú ekie á Siona, ka ú esisie anga Yakobho bhaa bhu kanda ine monduwa Mbali; ²⁷ Ka egwalie malonga mami nabho, dyaa iesisie djambi djabho. ²⁸ Na eyo ibhonie livfia la Mbali, bha bha akodhu dyulu lanul nge na iyo ibhoni iminulana, bha bhaondane dyulu la bha idje bhabho. ²⁹ Mungusa iyowa na ibhisia la Mbali indjese na nganyi. ³⁰ Inamuna temoi toku nubhia mungo uwomo mbese ine esimia Mbali ka na ikanda labho la esima nu udha kotio bhukuku, ³¹ Inamuna temoi bhu kanda i esimia, ambusa taa na bhu kuku bhuo bhu kiana anganu, bha udha dyokuto bhu kuku. ³² Ngo Mbali ubha avfisia bhushe bhatopa á mbese isimia, mungusa á ku bhu kuku anga bhatopa. ³³ Na ibhona bhugumia, bhu tumba ka otinga la Mbali! Dyokumu djese djindjese dji dji bhikiane, ka paki djese dji ndjese dji enikiane! mungusa. ³⁴ Undjo ú djibha mawazo ma Bhwáná, ao neni undjo ubhia aowa makoko wese? ³⁵ Undjo ú muwa wa pikilie, mungusa an'kpudhusia? ³⁶ I angese, na idje, ka dyulu lese iyo i bhima bhitopa. Angese obibo á bhidjo bhitopa! Inôô!