¹ Bha monima, kiya idjelia lasu anga m'bibisia wasu Bhwáná Yesu Kilisito bhu gwali ta dhomu na bhitopa bhio bhi djeliana na bhushe. ² Toku dyaa undjo olumilie na a'yavfulu yanu ya Mbali, mushe tomoi sa sala lopete la olo ka na ngombe ya ekima, ka undjomo dyokuto, ilumila mobhoka n'sale te ébhibhi; ³ Ani wam'bhona undjo asala ngombe ya ékima, onsouwe: Owe, djumana dyano na éfula ya ekima! ka ani wavfia na mobhoka: Owe, tema dyaa! Ao djumana utchi la makulu mani, ⁴ Ombésé nuwe bhakulu bhaao igwala bha vfakanake, ka nu kiyanu nuwe kubha nene bhutumba ni bhona mawazo maanu ma mabhibhi? ⁵ Okai,bha monima bha bhundusia: Mbali sa minulésé bha bhoka a kisi n'no ta bha gwali bhagumia a idjelia, ka bhaa bhaéniye bhakota bha Mbali bhuo uláká anga bhaa ubhonduwe? ⁶ Ka nuwe bhaa nubheni bhabhoka ombésé énu! kókó bha gumia nuwe a' masitaki? ⁷ Ombésé ibho bhaa bhsekisimónó linya la likima lio nunao? ⁸ Ani nuwakisiè selia ya bhukota, niyekana na iyo ikpaluáná: Omunduwe mangenai tókù owe mukulao, nakia ekima. ⁹ Ngee, ani na vfakania bhushe, nakia djambi, nu-udhuwe azabho na selia tókù bhaa bhaluvfu dhomú na selia. ¹⁰ Ngo n'topa undjo u'luvfu aselia étopa nge akuwa a selia temoi, a tuka djitopa. ¹¹ Nataa, undjo avfia: undji kütaai ,avfani, avfia dyokuto: undjo lúútaai. Ngo, ani suku mbiai mavfani, ngee wóóla mushe, wóówa n'tukia waselia. ¹² Vfiai ka kiai tókù bhaa bhatoti isamba apele na selia ya uhulu; ¹³ Ngo bhundjésé na bhukuku anga undjo sa kiésé bhukuku. Bhukuku bwetie bhutumba. ¹⁴ Bha monima, indjé évfanisie anga mushe taa una-idjelia, ani sa vfanisie mekambo? Idjelia lésé lim'bhikisie? ¹⁵ Ani wanyinya wa mulume ao wa mwali bha bholumbo ka bha kanda bhima bhidhia bha masi kumatopa; ¹⁶ Ka tomoi wáanú ibha sowa: kenai ta guwe, ko, okama isala ka nu-ogutuwe! Ka nubhowanu iyo yabha ékpéané na mobhi, iyo eku indji? ¹⁷ Idyokuto nii djelia: ani lindjésé na mekambo, idjelia laogwa kubha nene. ¹⁸ Nge womo uvfie: owe, una ijdelia; ka émi, éna mekambo. Ivfanisia idjelia lai la ombésé mekambo, ka émi, énévfanisie idjelia na mekambo mami. ¹⁹ Wa djelia taa Mbali wésé ku tomoi, wakia ékima; bhágú bha djelia dyokuto, ka bha kpokpuma. ²⁰ Woondu odjibhi, owé mushe ketiti, taa idjelia ombésé mekambo indjésé na énu? ²¹ Abhala yama, idja-asu, sa bhandane-ésé na mekambo, dyaa woowa mona wese Isaka. ²² Wéna taa idjelia likiana na mekambo mésé, ka, ka mekambo idjelia louwa likima. ²³ Dyaa ya akisiana iyo makpalua muvfia: Abalayama an'djelia Mbali, Abalayama a-bandana waendjini ka a-bhisiana mbeni wa Mbali. ²⁴ Nééna tókù mushe adjeliana nisowala mekambo, ka mbésé kwidjelia ngúngú. ²⁵ Lahabu, n'kola idje dyokuto andji bhandaniese na mekambo, dyaa mangobhalia bhatambia ka abha-atisia a-pakiyomó? ²⁶ Tóku mobhi wa-mbésé m'pumatima woogue, inamuna tomoi idjelia mbésé mekambo looguwe dyokuto.