¹ Muzibuhe omu buzigire bw'abaguma. ² Murhayibagiraga obuyegereze bulya omu kubukolesa baguma baguma bayegerezize bamalahika buzira kumanya. ³ Mukengere abali bashweka nka kulya mwakaba nka mushwesirwe, ababonerirwe nka kulya mwakaba muli konoko omu mubiri. ⁴ Obuhya bukengwe n'abantu boshi, n'encingo y'obuhya erhajagako izinga, bulya Nyamuzinda ayishihana abagonyi n'abahushi. ⁵ Murhabaga n'obuzigire bw'enfaranga ci musime eci mugwerhe, bulya Nyamuzinda yene adesire mpu: ntaka kunyihira, ntaka kuleka ciru n'ehitya. ⁶ Rhwanahamiriza buzira nshonyi oku: Nnahano ye murhabazi wani, ntaco nakayoboha, gurhi omuntu akanjira? ⁷ Mukengere eborongozi binyu byamuyigirizagya akanwa ka Nyamuzinda,murhimanye obuzinda bw'akalamo kabo,ninyu muyige obwemere bwabo. ⁸ Yezu ye yolya injo, ene, n'emyakan'emyaka ⁹ Murhashimbaga enyigirizo zarhenga eyi n'eyi mpyahya,bulya kulikwinja omurhima guyunjuzibwe n'inema, ci arhali n'ebiryo birharhabalaga abachishwekire kobyo. ¹⁰ Rhugwerhe oludero nka kulya aba kolera omu ihema barhajira buhashe bw'okulya. ¹¹ Omubiri gw'ensimba zirya omuko gwyo gwahesirwe n'omudahwa mukulu ahantu hacese omu ka-Nyamuzinda baziyokere embuga z'ikambi enyanya z'ecaha. ¹² Co carhumaga Yezu naye lyo acesa oluba kugerera omuko gwage alibuzibwa embuga y'olugo. ¹³ Rhuhulukage, rhumukulikire embuga ly'enkambi, omu kuheka ebijachi byage. ¹⁴ Bulya hano rhurha gwerhi lugo lwabera ci rhulirhwalonza olugo lwayisha. ¹⁵ Kugerera ye, rhuhe Nyamuzinda enterekero y'obukuze, go malehe g'eminwa eciyunjuza izino lyage. ¹⁶ Kandi murhayibagiraga okujira aminja n'okuderha haguma, bulya kugerera entulo nk'ezo Nyamuzinda anazigire. ¹⁷ Kengi abimangizi binyu n'oku cirhonda emunta bali, bulya banalale bahunir'emirhima yinyu nka kuba bashihana oluporo, bikaba ntyo lyo bakola n'omwishingo, ci arhali omu midudumo, bulya birhakamulerhera obunguke. ¹⁸ murhuhunire Nyamuzinda, bulya rhulangalire okuba n'oburhimanya nbwinja omu kulonza okurheheka omubintu binja. ¹⁹ Nani mbayingizire nti mujire ntyo lyo bangalul'emwinyu duba. ²⁰ Nyamuzinda w'omurhula wakulaga abangere b'ebuzi omu mifu, kugerera omuko gw'olushangi lw;ensiku na mango,Nnahano wirhu Yezu kristu. ²¹ Amuhashise oku ngasi cijiro cinja omu kuhikiriza obulonza bwage, anajire mulimwe ebi musimisize kugerera Yezu Kristu.Emwage obukuze emyaka n'emyaka! Bibe ntyo! ²² Mbayingizire, bene wirhu muzibuhire ebi binwa by'enfinjo, bulya bayandikire oku bofi. ²³ Mumanye oku mwene wirhu Timoteyo ashwekirwe, erhi akayisha aha duba, nayisha mubone rhwenaye. ²⁴ Mulamuse ebirongozi binyu, n'abacese boshi.Abe Italiya bamulamusize. ²⁵ Inema libe haguma ninyu mweshi bibe ntyo!