¹ Na nirhu, bulya rhuzungulusirwe n'abadima banji rhulahire ngasi mishoko n'eccaha cirhushwesire buzira kadali, rhunalibirhire omu mikol erhuyigulirwe omu kuci hangana. ² Erhi baba balibalolereza Yezu abimangizi,erhi mwishingo bagwerhe kuli Yezu gurhumire alibuzibwa n'omusalaba akala enshonyi, anacidamala ekulyo kw'entebe ya Nyamuzinda. ³ Murhimanye k'oyo wahimire akadali enyanya zagenembere z'abanyabyaha mpu lyo murharhamaga. ⁴ Murhaji chihangara kuhik'oku muko mwalwisa echaha. Kandi mwayibagira amahano mwahabirwe nka bana. ⁵ Mugala wani orhagayaga obuhane bwa Nnahano, orhana rhamaga nka amakukalihira. ⁶ Bulya Nnahano anahane olya azigira, kandi anashurhe akarhi balya boshi arhola nka bana bage. ⁷ muzibuhe obuhane, nka kulya bana ba Nyamuzinda bamurhola, bulya mwana ohi ishe arhahana? ⁸ Cikoki, nka murhahanwa obuhane buyerekire boshi ko kuderha mulimishana ngozi, murhali bana bage. ⁹ Ciru, bulya balarha kugerera omubiri barhuhanyire, rhwagali bakenga , rhurhashinagnini okukenga kulusha ba larha b'emirhima lyo rhuba n'akalamo? ¹⁰ Ba larha bakagirhuhana nsiku ntyu, nk'oku balibwine kwinja, ci Nyamuzinda yehe anarhuhane oku bunguke bwirhu , lyo rhushangira obucese bwage. ¹¹ Kobinali ngasi buhane bunakazilerha oburhe okumurhondero, ci burhalera mwishingo, ci erhi ensiku zigera, bunakazilerha kuli balya babukolesize amalehe minja g'obushinganyanya. ¹² Museze amaboko ginyu garhasezirhi n'amadi ginyu garhamirhe. ¹³ Munakulikize amagulu ginyu enjira zishinganine lyo ebirema birhahabaga njira, cibafume. ¹⁴ Longerhezi omurhula n'abantu boshi, n'obuchese, buzira bucese ntaye wabona Nnamahanga. ¹⁵ Mulwikirize lyo ntaye ociyegulaga n'inema lya Nyamuzinda, lyo nta muzi gw'obululu gushabukage n'okuzinza abantu banji. ¹⁶ harhabonekaga omuhushi olya orha yoboha nyamuzinda nka Ezau waguzagya obwime bwage bw'obukulambere oku biryo. ¹⁷ Mumanyire oku erhi hagera nsiku achilonzize ahabwe emigisho n'okulaka emirenge minji, ci bamulahira bulya arhabonaga aha ahungamira. ¹⁸ Bulya murhahikaga aha ntondo mwaligwasirhwe muhumeko, inaliyayaka muliro n'ebitu byiru, n'omwizimya,n'ecihusi. ¹⁹ Ciru n'izu ly'okuderha kushimbana n'abakagiliyunva bayinginga mpu birhacibarega intyo. ²⁰ Bulya barhalemberaga akanwa kaderhagwa ciru n'ensimba yakahumire kw'eyo ntondo yaligwasirwe ebandwe amabuyenefe. ²¹ N'ebyo binwa byali byakuyobohya ciru na Musa aderha mpu: namayoboha n'okugera m'omusisi. ²² Cikone mwayeger'entondo y'e Sioni, n'olugo lwa Nyamuzinda ozine, ye Yeruzalemu w'empingu n'abasoda n'ebihumbi byab malahika. ²³ Omu burhimanane bw'ababurhwa baburhanzi bayandisirwe omu mpingu na Nyamuzinda muzuzi wa boshi w'emirhima ecire bayemire. ²⁴ Na Yezu mulunganisa w'endagano mpyahyahya n'omuko gwashahizibwe guderrha bwinja kulusha gwa Abeli. ²⁵ Murhahiraga mwalahirh'okuyunviriza owaderha, bulya akaba balimo abarhachungukaga, alikulya balahira kuyunva olya wakagi bahanula omw'igulu. Ci bwenene rhwe rhurhacungulwe nka rhwakahinduka rhuje kuli nanye oliwarhuhanula kurhenga empingu. ²⁶ Ye yolya wadundaga igulu okw'izu lyage n'ene ahanire eciragane : lindi liguma kandi nadundaganya arhali igulu lyone ci n'empingu. ²⁷ Ebi binwa, kandi iyerekine empindulo y'ebintu bidundaganye, nka ebyakozirwe lyo bikola kasanzi katyu, lyo ebintu birhaka dundaganywa biberhe. ²⁸ Co cirhumire, rhwamahabwa obwami burhadundagana, rhuyerekane okusima kwirhu omu kugashaniza Nyamuzinda okushinganine. ²⁹ Omubukenge n'oboba, bulya Nyamuzinda wirhu guba muliro gushereza.