¹ Yubu arhola omwazi n'oku derha: ² Nechi menyere oku binali ntyo; k'omuntu akaba mushinganyanya embere za Nyamuzinda? ³ Nka wakajira obuhaka haguma naye, oku bintu chihumbi arhaka kushuza chiro oku chintu chiguma. ⁴ Aba munya bwenge na mugala- byoshi: Nde wakabera buzira kuhanwa? ⁵ Anaheka entondo, anazihindamula omu burhe bwage. ⁶ Anadundagashaagiza egulu aha linali, n'ebikondo liyiyumangirekwo byana ndirhimana. ⁷ Anarhegek'ezuba, n'ezuba lirhanaboneka; anashukir'enkununu. ⁸ Yenine, ye walambulaga omuchanya, ana lambagira oku menji g'enyanja nene. ⁹ Ye walemaga Echirhende zibuzibu, Orioni n'e Baplede, n'enkununu z'omu bihugo bye malambo. ¹⁰ Ye wajiraga ebintu bizibuzibu n'ebirhankagalika, ebirhangazo birhakaganjwa. ¹¹ Lolaga, anagera hofu nani, ntanachimubonaga chiro, anachigendera, ntanachi mulangirraga chiro. ¹² Nk'akarhenga, kahali nji walahira? Nde nji wamubwira: Bichi wamajira? ¹³ Nyamuzinda arhagalula oburhe bwage; eshishi wage yeba simikiro ya bw'okuchibona. ¹⁴ Nani, gurhe naka mushuza? Myazi michi na kalondola? ¹⁵ Amango namaba mushinganyanya, ntakashuza; njinaba ndi nakuz'omuzuzi wani. ¹⁶ N'amango nja nyunva, nka namamuhamagala, ntamenyere nkaba njayunva omulenge gwani, ¹⁷ Oyu wanshunika haguma n'omuhusi, ana yushula obuvune bwani buzira chibazo, ¹⁸ Orhalonza nkayisa, n'okunyugusa obuhanya. ¹⁹ Ka kulwis'emisi? Ali Mugala-Byoshi. Omu kuli? Nde nji wanjisa lubanja? ²⁰ Kandi mushinganyanya, obunu bwani nji bwanyagisa; kandi mweru kweru, nj'aderher' oku nayagire. ²¹ Mweru kweru! Ndi yewe; Aliko nt'akalamo nchiherhe, ntasimire oku ndamire. ²² Ntacho bimalire chirwakaba? Bulala, kumbere naderha, anabihya omweru kweru nka mubi. ²³ Chiro akaba echinjira chinalerh'olufu! Aliko analema ashekera ebibazo by'omweru kweru. ²⁴ Egulu liri omu fune z'ababi; linashukira amalanga g'abazuzi. Ch'akaba arhaliyewe, ali nde obola? ²⁵ Esiku zani ziridubaduba nka lwandiko; Banalibirha buzira kubona omurhula; ²⁶ Yizangera nka bwarho bwamugugu, nka karhuli ka shamula echi kalya. ²⁷ Chiro na kaderha: Nanayibirira oburhindibuke bwani, ndeker'oburhe bwani, rhondera obushiru, ²⁸ Nyubahire amalumwa gani goshi. Menyere oku orhakantola okuba mweru kweru. ²⁹ Njinaga; Charhuma na chirhamya okubusha? ³⁰ Amango na kalaba omu menji g'olubula, amango na shuka efune zani haguma n'esabuni. ³¹ Nji wa ndubika omu chidubikiro, n'emishangi yani yanabiha. ³² Arhaba muntu kuguma nani, mpu mushuze, mpu rhugende haguma naye omu kuli. ³³ Ntaye warhuja omu charagati mpu arhuchira olubanja, arhuhebakw' efune yage rhwembi. ³⁴ Akule akarhi kage enyanga zani, n'abanisi barhachinyobohesaga; ³⁵ Nantyo njinaderha na nji ntakanachiyoboha. Okuhandi, ntayorhere nyenine.