¹ K'akalamo k'omuntu hanola gulu kali nka nfola miherho, n'esiku zage ziri za murhabazi w'okulimya. ² Nka kula omuja achifija ahali echibohololo, nka kula omukozi alinga oluhembo, ³ Nantyo nani nahabirwe emyezi y'amalumwa, n'aba n'endurhu z'amadufu g'amarhindibuke. ⁴ Eri najiryama, n'aderha: Ago mango nji nazuka? Ago mango nji namala obudufu? Nayugurhire omurhamo kuhika emiseke. ⁵ Omubiri guyunjwire migaku gwana rhonyoka masira, n'oluhu lwani yilwarhulika n'okuyuma. ⁶ Esiku zani yizagenda dubaduba kulusha akalibirhiro, zanahirigirhira: Buzira kulangalira kantu! ⁷ Oyibuke oku akalamo kani kanali muka gonine! Amesho gani garhakachibona chiro ebikwirire. ⁸ Elisho liri lya bona nji lirhachindolereza; n'elisho lyawe nji lyandonza eri ntanachiriho. ⁹ Kulala echichu chinyamuka n'oku kuhirima, n'owajire ekuzimu arhakanachirhenga yo; ¹⁰ Arhakachigaluka mpw'ashubire omu mwage, n'aha mwage harhakachimumenya. ¹¹ Che chirhumire ntakahanz'obunu bwani, njina derha omu burhe bw'omurhima gwani, njinaganira omu mujinya gw'omuka gwani. ¹² Ka nyono ndi nyanja nene, changwa chiryanyi ch'omu muluziba, mpu bampebekw'abalanzi eburhambi bwani? ¹³ Ago mango na derha: Enchingo yani yampumula, n'echiryamiro chani cha rhuliriz'amalumwa gani, ¹⁴ nantyo njiwanshalamya n'ebilorho, njiwanyobohesa n'ebi oherhe wanyereka. ¹⁵ Ah! nalonzaga owanyirha! Nalonzag'olufu kulusha amavuha gage! ¹⁶ Nabayubahire! ntakalama esiku zoshi, ondeke nyono, bulala akalamo kani kanali nka muhusi. ¹⁷ Omuntu chiri jichi, mpu wamushibirira ntyo, mpu wamuyibuka ona muhebere ko omurhima, ¹⁸ Chiri chichi mpu wajimulola ngasi sezi, mpu wamuhenguza ngasi mango? ¹⁹ Mango gahe nji waleka oku ndolereza? Mango gahe nji wandekera akasanzi k'okumira amachanira? ²⁰ Akaba chaha najirire, gurhe na kujirire w'oyo, mulanzi w'abantu? Charhumire wandibuza ntya n'empimbo zawe, chirhumire warhuma nachibera ndurhu? ²¹ Korhaka nababalira echaha chani, n'okuyibirira obubi bwani? Bulala nkola kulyama omu kachulo; nji wandonza, eri ntanachiriho.