¹ Lolaga, elisho lyani lyabwene ebyola, n'okurhwi kwani kwa biyunva nanabibikirira. ² Ebi mumenyere, nani bina nyinji, ntacho mundushire mw'ebyola. ³ Aliko naderha n'Ogala-Byoshi, na bwira Nyamuzinda entambala yani. ⁴ Bulala mwabo, munaderha ebishugu by'emyazi, mweshi muli bafuruma babusha. ⁵ Ka murhaka chisirira? Nenyu mwakabonekana kuba n'oburhimanya. ⁶ Muyumve, mbasengerere, amasambo gani, muyunve echiba omu bunu bwani. ⁷ Kamumenyere oku mwaka derha ebirhashinganene enyanya za Nyamuzinda, n'oku muderhera mwana derh'obulyalya? ⁸ Ka mulonzeze oku muderhera? Mulonzeze oku sambira Nyamuzinda? ⁹ Nka bayunvirize, njarhababeshuza? Nji mwamurhebeka kulala murhebeka omuntu? ¹⁰ Ku binali ntyo nja bashwekesa, nka murhajirire omuhwe n'okuchilang'okuye. ¹¹ Obukulu bwage burhakabayobohesa? N'obuba bwage burhakabarhogerako? ¹² Emigani yenyu eba migani y'omu luvu, n'okufunguzana kwenyu kuba kufunguzanya kw'ebishoho. ¹³ Musiranwe, mundeke, nyekola naderha! Nji byagerera oku njanalonza. ¹⁴ Chirhumire omubiri gwani ngusezeze omu menyo? Njinahana akalamo kani. ¹⁵ Lolaga, nja nyirha yenine; ntacho chiro nchinihire; Aliko embere zage njinayerekana obushiganyanya bwani. ¹⁶ N'okwola konine kwakachiza obuchunguke bwani, bulala omubi arhakachihanyagaza mpu ayumange omu mesho mage. ¹⁷ Muyunve, muyunve emyazi yani, murhege okwirhwi bwinja okubi nalonza okuderha. ¹⁸ Mundolage naja lubanja; menyere oku nayaza. ¹⁹ Nde olala njiwanjisa lubanja? Na kandi nchisirire, na nachifira. ²⁰ S'aliko, onyemerere bintu bibiri ntakanachibisha hale n'amalanga gawe: ²¹ Okule efune yawe enyanya zani, n'obuba bwawe burhanshalamyaga chiro. ²² Na ntyo ohamagale, nji nakushuza, na nka na kaderha, onshuze! ²³ Bubi bungana gurhe n'ebyaha binga na kujirire? Ombwire olugomo lwani n'ebyaha byani. ²⁴ Chirhumire wambisha amalanga gawe, wantola nka mushombanyi wawe? ²⁵ Walonza okushurha echibabi cha hehuka? Bichi oshimbire olukere luyumukire. ²⁶ Chirhumire wantolera emihigo ekomere, oshubi ganjira obubi na jirire omu kuyushuka kwani. ²⁷ Chirhumire waheba amagulu gani mwe byuma, n'okulolereza ngasi hyoshi na kajira, n'okushokeranya ngasi aha nagezeze olushando, ²⁸ Amango omubiri gwani gwarhondera okubola, nka mushangi gwalibirwe n'omushwa?