¹ Yubu arhola omwazi aderha: ² Ku binali, okuli, obuko bw'ebilemwa ye w'oyo, na kugerera w'oyo oburhimanya bwanafa. ³ Nani mperhe obwenge kuguma nenyu, nani, ntacho mundushire mwe byola; na nde orhenji ebintu muderhere? ⁴ Ndi masheka embere za bera bani, amango ndi nahema oburhabale bwa Nyamuzinda; omushinganyana, omweru kweru, chintu ch'amasheka! ⁵ Omubuhanya wanashekerwa! ly'erhegeko ly'abashagalukire; N'owa chihuma huma mpu bamuholereze. ⁶ Amango hali omurhula omunju z'abanyezi, obulanzi ku balala bashologosa Nyamuzinda, chiro na balala balonza oku chijirira nyamuzinda w'emisi yabo. ⁷ Odose ebirhungano, byakubwira, n'enyunyi z'omuchanya, za kuyigiriza; ⁸ Onshambalire egulu, nji lyakuyigiriza; n'efi z'omu nyanja nene nji za kuganulira. ⁹ Nd'orhamenyere emwenyu oku btyoshi byajirwaga n'efune za Nahano? ¹⁰ Aba afumbarhire omu fune yage akalamo ka ngasi oyisa, n'omuka gwa ngasi muntu. ¹¹ K'oku rhwiri arhali ko kuyunva emyazi, nka kulala olulimi luyunva okuloka kw'ebiryo? ¹² Omubashaja muba okurhimanya, n'omu kalamo kanene buba bwenge. ¹³ Omu Nyamuzinda m'omuba oburhimanya, n'obuhashe. Obuhanuzi n'obwenge biba byage. ¹⁴ Ebya kumbagaza birhachiyumbakwa, n'eyashweka ntaye nji wamushwekula. ¹⁵ Anachingiriza amenji na byoshi byanayuma; Anagalika, n'egulu lyanabiha. ¹⁶ Aba aherhe emisi n'okukenguka; y'egala owa herere changwa okuheza abandi. ¹⁷ Abahanuzi anabahabisa; Anashandaza okuli kw'abazuzi. ¹⁸ Anashwekula omukaba gw'abami, n'okuhebw'olukoba omumpindi zabo. ¹⁹ Ahabisa abadahwa; n'okukubagaza bachiri misi. ²⁰ Asiza abalemaga baderha baliherhe obuhashe; anyega abashaja olubanja. ²¹ Anasheshera obubi oku bakulu; n'okubanyega bachirimisi omukaba. ²² Anayerekana ebibishirwe omu mwizimya, anayerekana obuche omu chichu ch'olufu. ²³ Anayushula amashanja, anashuba maheza; anagalandisa hale, anashuba magalula omu mbibi gazo. ²⁴ Abakulu b'echihugo anabanyega obwenge, anabahezeza omu mpinga erhali mu njira; ²⁵ banadubaduba omu mwizimya, barhanabona bwinja; badandabagana nka bantu balalukire.