¹ Sofari w'e Nama arhola omwazi aderha: ² Eno myazi minene erha kabona chishubizo chiro, n'okuyorha muntu oyinji derha mpu yinja habwa olulishinja? ³ K'emyazi yawe minene njiya jira abandi barhanderhaga? Nji washekerwa, na nta muntu oku yazize? ⁴ Waderha: Oku ndi nalola kwa bushinganyanya, ndi mweru-kweru omu mesho gawe. ⁵ Oh! Nka Nyamuzinda alonza oku nderha, nka kabumbula obunu mpu lya kushuza, ⁶ Nka kakuboholera amahwe gw'oburhimanya bwawe, kw'oku oburhimanya bwage bulugire, wali wamenya oku arhakujira kubi oku mabi mawe. ⁷ K'osimire oku menya amahwe ga Nyamuzinda, n'okuyunva bwinja bwinja obumenyi bw'Ogola- Byoshi? ⁸ Yeri kandi enyanya kulusha omu chanya: Bichi nji wajira? Kandi biri kulusha ekuzimu: Bichi omenyere kw'ebyo? ⁹ Obugali bulehukire kulusha egulu, bwona bugalihire kulusha enyanja nene. ¹⁰ Nka achigerera, nka akamenya, nk'alegemere oku karubanda kage, nde wakalahira? ¹¹ Bulala yewe anamenya ababesha, n'okubona dubaduba abayagire. ¹² Omuntu, oku handi, ajira obwenge ka bwa musire, ana burhagwaga nka mwana gwa Punda y'elubala. ¹³ Oku w'oyo, oyerekeze omurhima gwawe emwa Nyamuzinda, olambule efune zawe embere zage, ¹⁴ Ochiyeguze n'amabi, oleke okulama omu mwawe n'obulyalya. ¹⁵ Na ntyo nji wayinamula amalanga gawe buzira ezabyo, nji wazibuha orhanayunva buba: ¹⁶ Nji wayibirira oburhindibuke bwawe, nji wabuyibuka nka kulala bayibuka amenji gashulula. ¹⁷ Esiku zawe nji zashubikolera kulusha ezuba lya hacharagati, N'omwizimya gwawe nji guhindamuke nka buche bw'esezi. ¹⁸ Nji waba oyunjwire obulangalire, n'ebi walingaga nji birhabula; nji wachilol'eburhambi, nji wanahumuka nk'oku binali. ¹⁹ Nji walyama na ntaye wakuhangala n'abantu banene nji basimisa amalanga gawe. ²⁰ Aliko amesho g'ababi nji gabula ahagalola; Nabo nji babula ahabayakira; Olufu, lolaga omunihiro gwabo!