¹ Nahano abwira Musa, mpu: Lero okola wabona oku najira Farao: Abalika bagende hano azidoherwa n'okuboko kudarhi, chiro abalibirhako yenine, mpu kuboko kudarhi kurhuma. ² Nyamuzinda ashubiderhesa Musa, amubwira, mpu: Nye nahano. ³ Nabonekere aburahamu, Isaka na Yakobo nka Nyamuzinda ogala byoshi, chi ezino lyani lya Nahano ntalimenyisagabo. ⁴ Kandi najira endagano yani, haguma nabo, oku nabaha echihugo cha Kanana, chihugo babungiragamo banaberamo nka babunga. ⁵ Nyono nayunvirhe omulenge gw'abene Israeli, oku bagwerhe balibuzibwa n'abanya Misiri, nayibuka echiragane chani. ⁶ Che chirhumire, abwirire bene Israeli oku NYe Nahano. Nabalikuza omu mikolo midarhi y'e Misiri, nabalikuza omu buja bwabo, nabalikuza n'obuhashe bw'okuboko kwani n'omubuhane bunene. ⁷ Nabayankirira nka lubaga lwani, nani mbe Nyamuzinda wenyu. Mwamenya oku Nye Nahano, Nyamuzinda wenyu, obakulire omu mikolo midarhi y'e Misiri. ⁸ Nabahisa omu chihugo nachigashaga nti nahaga Aburahamu, Isaka na Yakobo. Nabahacho kashambala. Nye nahano!" ⁹ Musa abwira bene Israeli ebyo binwa, chi barhayunvaga Musa mpu enyanya z'okuchika omurhima n'obuja budarhi kurhuma. ¹⁰ Nahano abwira Musa, mpu : ¹¹ Genda obwire Farao, mwami w'e Misiri, aleke bene Israeli barhenge omu chihugo chage. ¹² Chi Musa aderha ntya embere za Nahano, mpu : Obula bene Israeli barhayunvaga, gurhe Farao akaba, ye nyunva nyono n'akanwa karhakembulagwa? ¹³ Nahano aganiza Musa na Haruni, abarhuma emwa bene Israeli n'emwa Farao, mwami w'e Misiri, mpu ly'alika bene Israeli barhenge omu chihugo ch'e Misiri. ¹⁴ Alaga abakulu b'emilala ya bashokuluza babo: Bagala ba Rubeni, fula ya Israeli: henoki na Palu, Heroni na Karimi: Obw'obuko bwa Rubeni. ¹⁵ Nabo bagala ba Simoni, bo Yemuweli, Yamini, Ohadi, Yakini, Sohari na Saulo, mugala w'omukazi mu Kanana, bw'obuko bwa Simoni obo. ¹⁶ Agala g'amazino g'abagala ba Lawi, nk'oku amaburhwa gabo ganali: Gersoni, Kehati na Menari. Lawi alamire myaka egana na makumi masharhu na mushanvu. ¹⁷ Bagala ba gersoni bo: Lawi na Shimovi, nk'oku obuko bwabo bunali. ¹⁸ Bagala ba kehati bo: Amurani, Yisehari, heburoni na Uziyeli, Kehati alamire myaka egana na makumi masharhu n'esharhu. ¹⁹ N'abagala ba Meraribo. Mehali na Mushi. B'obuko bwa Lawi obw'omu kushimba amaburhwa gabo. ²⁰ Amurani arhola omukazi, arhola na shenge Yokebedi; amuburhako Haruni na Musa. Amurani alama myaka egana na makumi masharhu na mushanvu. ²¹ Bagala ba Yisehari bo: Koreya, Nefegi na Zikiri. ²² Bagala ba Uziyeli bo: Mishaheli, Elisafani na Sitiri. ²³ Haruni ashaba omukazi, ye Luzabeti, mwaliwa Aminadabu, mwali wabo Nahisoni; amuburhako Nadabu, Abihu, Eliyazari na Itamara. ²⁴ N'abagala baKore bo: Asiri, Elikana na Abiyasafi. Obw'obuko bwa bene-Kore. ²⁵ Eleyazarim mugala wa Haruni, ashaba omukazi, mwali wa Putiyeli amuburhako Pinasi. Abo bo bagala b'omulala y'Abalawi, nk'oku obuko bwabo bunali. ²⁶ Bo baliri Haruni na Musa abo, bala Nahano abwiraga mpu : Mukule bene-Israeli omu chihugo ch'e Misiri, bachigabe nka mirhwe ya balwi. ²⁷ Bo bajaga bwira Farao, mwami w'e Misiri, mpu akule bene Israeli e'Misiri. Ba Musa na Haruni abo. ²⁸ Olusiku Nahano ashambalaga na Musa omu chihugo ch'e Misiri, ²⁹ amubwira mpu: " Nye Nahano. Obwire Farao, mwami w'e Misiri, ngasi byoshi nkubwirire." ³⁰ Musa ashubiza nahano mpu: " Gurhe Farao akayunva nye w'obunu burhakembulagwa?"