¹ Nahano ashambala na Musa, amu bwira: ² Olusiku lwambere lw'omwezi gwambere, nji wayumanza ehema, ehema ly'okubuganana. ³ Nji warhabika Esanduku y'oku hamiriza, nji wayishukira n'omushangi. ⁴ Nji walerha ameza, nji wanagarhabika okukwanene. Nji walerha olwenge, nji wanahebakw'amatara. ⁵ Nji waheba oluherero lw'ehoro embere z'Esanduku y'okuhamiriza, nji wana manika omushangi oku lunvi lw'ehema. ⁶ Nji warhabika olurhamba lw'okuhererako embere z'olunvi lw'ehema, ehema ly'okubuganana. ⁷ Nji warhabika omukenzi omu charagati ch'ehema y'okubuganana n'olurhamba, nji wanagenda waheba mw'amenji. ⁸ Nji wayumanza olugurhu oku burhambi rhambi, nji wanahanika omushangi oku lunvi lw'olugurhu. ⁹ Nji warhola amavurha g'obuhashe, nji wana mashiga oku hema, n'oku ngasi hyoshi hilimo y'ebikoleso; nji wabichesa; nji bibe bichesibwa. ¹⁰ Nji washiga oluherero lw'embagwa n'ebikoleso byage byoshi, nji waches'oluherero; Olurhamba nji lwanaba luchesibwa. ¹¹ Nji washiga omukenzi haguma n'ebikondo, nji wanaluchesa. ¹² Nji walerha Haruni n'abagala bage aha wa lunvi lw'ehema ly'okubuganana, nji wanabashuka n'amenji, ¹³ Nji wayambisa Haruni emishangi echesezwe, n'oku mushiga, nji wanamugisha, y'ekola oku mirimo yani oku luherero. ¹⁴ Nji walerha bagala babo, nj'obayambise amalopo, ¹⁵ Nji wabagisha nka kulala washigaga eshe, mpu nji bakol'emirimo yani y'oluherero. Oko kushigwa nji kwaba kw'esiku n'amango omuburha lyabo. ¹⁶ Musa ajira oku Nahano ali murhegekere; Ajira ntyo. ¹⁷ Omu lusiku lurhanzi lw'omwezi Gurhanzi g'omwaka gwa kabiri, ehema lyayumanga. ¹⁸ Musa abumba ehema; ashimika ebikondo, arhabikw'empaho, emilambaliko, ayumanza n'enkingi. ¹⁹ Alambika ehema oku bikiro, aheba echifuko ch' ehema enyanya, nk'oku Nahano arhegekaga Musa. ²⁰ Arhola obuhamirizi, abuheba omu Sanduku, aheba emilambaliko oku Sanduku, arhabika echifuko enyanya y'Esanduku. ²¹ Alerha Esanduku omu hema; aheba kw'omushangi g'okugaba, ashukira esanduku, nk'oku Nahano arhegekaga Musa. ²² Aheba Ameza omu hema ly'okubuganana, ewa lunda lw'amalembe lw'ehema, emusikesike gw'omushangi; ²³ n'okurhabika emigati kukulikirana n'erhegeko, embere za Nahano; nk'oku Nahano arhegekaga Musa. ²⁴ Arhabika olwenge omu ehama ly'okubuganana, emalang'embere g'Ameza, ewa lunda lw'amalyo lw'ehema; ²⁵ Ana kulikirany'amatara embere za Nahano, nk'oku Nahano arhegekaga Musa. ²⁶ Anaheba olurhamba lw'ehoro omu hema ly'okubuganana, embere z'omushangi; ²⁷ Ana yosa amalashi g'akabayo nk'oku Nahano arhegekaga Musa. ²⁸ Anaheba omushangi aha lunvi lw'ehema. ²⁹ Anaheba olurhamba lw'embago aha lunvi lw'ehema ly'okubuganana; N'okurhula enterekero z'embagwa n'entulo, nk'oku Nahano arhegekaga Musa. ³⁰ Anaheba omukenzi omu charagati ch'ehema ly'okubuganana n'olurhamba, n'okuheba mw'amenji g'oku kalaba; ³¹ Musa, na Haruni n'abagala bage, balema bakalaba efune n'amagulu; ³² Amango bamajaga omu hema ly'okubuganana n'oku shegerera olurhamba, banakalaba, nk'oku Nahano arhegekaga Musa. ³³ Anayumbaka olugurhu oku musikesike gw'ehema n'oluherero, anaheba omushangi g'oku lunvi l'olugurhu. Byanaba ntyo Musa anamala emirimo. ³⁴ Oku handi olwakungu lwashukira ehema ly'okubuganana, n'obukuze bwa Nahano bwayunjula ehema. ³⁵ Musa arhachijaga omu hema ly'okubuganana, bulala olwakungu luliri enyanya, n'obukuze bwa Nahano bwa yunjwire ehema ly'okubuganana. ³⁶ Omu kulambagira kwabo bamalaga, abana b'e Israeli bagenda, eri lwakungu lwamarhenga enyanya w'ehema. ³⁷ N'amang'olwakungu lurharhengere, barhagenda, kuhika hano lurhenga. ³⁸ Olwakungu lwa Nahano lwaliri ezuba oku hema ly'okubuganana; n'obudufu, haliri omuliro, oku mesho y'enju yoshi y'abana b'e Israeli, amango g'okulambagira kwabo koshi.