¹ Yunva,Israeli, zene washabuk'e Yorodani, enyanya y'okujiba mukulu w'abantu bagwerh'emisi kukulusha, myumbakire y'engurhu zigirer'emalunga, ² Bantu bakulu n'abalebale bwenene, bene Anaki, obayinji, wanakazaga bayunva bana baderha: mpunde wakahima bene anaki? ³ Omenye zene oku Nahano, Nyamuzinda wawe, alambagira emalangambere gawe nka muliro gulyana, yewe abashereza n'oku bayandagaza emalangambere gawe ojewabahiga, obashandaze , nk'oku Nahano akubwiraga. ⁴ Amango Nahano, Nyamuzinda wawe, abahiga emelangambere gawe, nj'omenye orhaderh'omu murhima gwawe; mpu enyanya ly'okubinali kwani kukurhumire Nahano ampira mw'echi chihugo nchirhambule. Bulala enyanya ly'obubi bwag'amashanja boburhumire Nahano ababungisa embere zawe. ⁵ Nanga arhali enyanya z'okubinali kwawe changw'obwinja bw'omurhima gwawe chechirhumire wa habwa echi chihugo, s'aliko enyanya z'amabi g'abantu yi nahano, Nyamuzinda wawe, ababungisaga embee zawe, lyanayumanza omwazi Nahano achigashaga embere za bay'isho, Abrahamu, Isaka na Yakobo. ⁶ Omenyage okwarhali enyanya ly'obwinja bwawe burhumire Nahano, Nyamuzinda wawe, aguhira mw'echi chihugo chikwirire mpw'ochirhambule; bulala nenyu mujir'oburhengu. ⁷ Yibuka, orhayibiriraga gurhe wajiraga Nahano oburhe, Nyamuzinda wawe, omu mpinga. Gurheng'olusiku warhengaga omu chihugo ch'eMisiri kugerera ahawajaga, waliri mugomi wa Nahano. ⁸ E' Horebu, mwagayisa Nahano; na Nahano agaya enyanya zenu, chiro alonz'okubarhindibuza. ⁹ Amango nashonaga oku ntondo najirhola empaho z'amabale, embaho z'endagano ya Nahano ajira haguma nenyu, naber'oku ntondo siku makumi mane ezuba n'obudufu, buzira kulya na buzira kunyw' amenji; ¹⁰ na Nahano amp'embaho z'amabale ziyandikirwe n'omudoke gwa Namahanga okuzo kwaliyandikirwe emyazi yoshi Nahano ababwiraga oku ntondo, omu kagarhi kw'omuliro, olu siku lw'echigusho. ¹¹ Byagerere oku buzinda bwa siku makumi mane ezuba n'obudufu yi Nahano ampag'ezo mbaho ebiri z'amabale g'endagano. ¹² Nahano ambwira ntya: Yumuka, yandagala duba orhenge hano; bulala olubaga lwawe, wakulag'e Misiri, barhebekerwe. Baleker'enjira na bahaga; bajirire echishushano ch'echuma chiyosezwe. ¹³ Nahano abwira: Nabwene okw'abantu ali bantu bagwerh'oburhengu. ¹⁴ Ondeke barhindibuze n'okuzimy' amazino gabo eshishi w'empingu, nakujira woy'okuba lubaga luherh'obuhashe, lunene kulusha. ¹⁵ Nagaluka, nayandagal'oku ntondo, e ntondo ya koler'omuliro n'embahw'ebiri z'endan'omu fune zani. ¹⁶ Nalola, nabona mwajirir'olugomo embere za Nahano Nyamuzinda wenyu, mwajirir'omwana w'embuzi oku chuma chiyosizwe, mwaleka duba enjira ya Nahano. ¹⁷ Narhola zila mbao ebiri, nazikabula n'efune zani, nazivuna omu mesho genyu. ¹⁸ Nafukam'embere za Nahano, nka kulala kwa burhanzi , siku makumi mane, ezuba n'obudufu buzira kuly'akalyo na buzira kunyw'amenji, enyanya ly'ebyaha byoshi mwajirag'omu njira mwakol'amabi, oku mugayisa. ¹⁹ Bulala naliyubahir'enyanya ly'oburhe bwage n'obuba, oku bona Nahano abag'abagayire kuhik'alonza, oku bamalisa. Aliko Nahano ashubi nyunva buhyahya. ²⁰ Nahano alubira Haruni bwenene alonz'okumuheza, nahunira Haruni mwago mango. ²¹ narhol'enyena ajiraga, obunguke bw'ebyaha byenyu, nabiyosa n'omuliro, naguhombola kugerer'ahagwabaga gachulo, n'okukabula, ako kachul'omu lwinji lurhenger'omu ntondo. ²² E Tabera, e Massa, n'e Kibroti-hataava, mwachul'oburhe bwa Nahano. ²³ N'ago mango Nahano abarhuma e Kadesi-Bernea, ababwira: Mushone, n'okurhol'okulu bw'echihugo nabahere! Mwaliri bagomi oku rhegeko lya Nahano, Nyamuzinda wenyu, olala murhayemera , ntakukeng'omulenge gwage. ²⁴ Mwaliri bagomi emwa Nahano kurhenga mbamenyere. ²⁵ Nafukam'embere za Nahano, nafukama siku makumi mane, ezuba n'obudufu, bulala Nahano aderhaga mpw'alonza abamale. ²⁶ Nahuna Nahano na derha: Yagirwa Namahanga orhamalaga olubaga lwawe ,kashambala kawe, kalala wagulag'omu bunene bwawe, n'oku wabakulag'eMisiri oku buhashe bw'okuboko kwawe. ²⁷ Oyibuk'abakozi bawe, Abrahamu, Isaka na Yakobo. Orhalolag'obubi bw'olubaga n'obukali bwabo n'ebyaha byabo. ²⁸ Y'echihugo rhwarhengamo chirhaderha: Bulala Nahano arhaliherhe buhashe bw'okubahis'omu chihugo abalaganyaga, na bulal'ali bagayire abakulayo mpu ly'abayirhir'omu mpinga. ²⁹ Bali bantu bawe na kashambala kawe, wakulag'e Misiri oku bunene bw'obuhashe bwawe n'oku kuboko kwawe kulambwire.