¹ Mwago mango, Nahano ambwira, beja mbaho ebiri z'ebale nka zilala zirhanzi n'okuzamuk'emunda ndi oku ntondo; onajire kandi esanduku y'omurhi. ² Nji nayandika kw'ezo mbaho emyazi yaliyandikirwe kuzila zirhanzi waberaga, nj'ozihire omusanduku. ³ Najir'esanduku y'omurhi gw'omukasiya, nabeja mbaho ebiri z'ebale nka zilala zirhanzi, nazamuk'oku ntondo, nazilala mbah'omu fune zani. ⁴ Nahano ayandika kuzila mbaho ebyali bya yandikirwe kuzilala zirhanzi, ela myazi ekumi ababwiraga oku ntondo, ahagarhi kw'omuliro, olusiku lwokubuganana; Nahano azimpa. ⁵ Nagaluka nayandagal'oku ntondo, naheb'ezo mbah'omu sanduku najiraga, zaber'omo nkoku Nahano anambwiraga. ⁶ Abana be israheli bagenda kurhenga e Beroti Bene-yakini kuja e Masera . eyomunda yi Haruni afiraga, n'eyo yanahambwagwa, omugala Eliyazari arhol'akasi k'eshe kw'obudahwa. ⁷ Barheng'eyomuda baja e Gudigoda n'omukurheng'e Gudigoda baja e Yotibata chihugo chiri mw'enyinji. ⁸ Mwago mango Nahano alondol'obuko bwa Lawi babe bw'okuheka e sanduku y'endagano ya Nahano n'okuyimang'embere za Nahano oku mukolera n'okugish'abantu oku zino lyage , nka nazene. ⁹ Chechirhuma Lawi arhajira chigabi chang'akashambala haguma na bena babo: Nahano k'akashambala kage ku Nahano Nyamuzinda wage amubwiraga. ¹⁰ Naberag'okuntondo, nka kulala kwa burhanzi, siku makumi mane na madufu makumi mane. Nahano anyunva kandi; Nahano arhachilonzag'okubayirha. ¹¹ Nahano ambwira: Yimanga, genda, jira abantu embere omu lugenzi. Abajirhol'echihugo nalaganyaga b'eshe. ¹³ Hanaho, Israeli, bichi muhunire Nahano Nyamuzinda wawe, kurhali kuyubaha Nahano, lulema wawe, n'okulambagir'omunjira zage zoshi, n'okumusima, n'okumukolera Nahano, Lulema wawe, omu murhima gwawe goshi n'oku kengero zawe zoshi; ¹² n'okulang'amarhegeko ga Nahano n'okuli kwage nkuyigirize zene, y'oba n'obushagaluke? ¹⁴ Lola, oku Nahano, Nyamuzinda wawe, e mpingu buli bugale bwage n'empingu z'empingu, n'egulu na byoshi birimo. ¹⁵ Bayisho bonyine ba Nyamuzinda alichishwekerek'omukubasima n'enyuma yabo, abana babo, mwabo mwachishogag'omu bantu boshi, nko kumubwene zene. ¹⁶ Njimwakembul'emirhima yenyu, murhanabaga n'egosi lizibu. ¹⁷ Bulala Nahano, Nyamuzinda wenyu ali Nyamuzinda wa bazimu, Nahano wa banahano, Nyamuzinda mukulu, muzimu na mudarhi, arhanajira kabolo na nta kuyemer'echituliro; ¹⁸ Yeboner'efubi n'omukana, asim'omuhisi n'okumuh'ebiryo n'emyambalo. ¹⁹ Nji musim'abahisi, bulala mwaliri bahisi omu chihugo ch'e Misiri. ²⁰ Njoyubahe Nahano, Nyamuzinda wawe, njonamukolere, n'okuchishweker'okuye,n'okuch'emanja oku zino lyage. ²¹ Ali bukuze bwawe,ali Nyamuzinda wawe; ye wajirag'omu garhi kawe e bintu bizibuzibu n'ebidarhi by'amesho gawe gabonaga. ²² Bayisho bayandagalag'e Misiri oku luganjo lwa bantu makumigalimushanvu; nalola Nahano, Nyamuzinda wawe, akujira nka nyenyezi zinene z'empingu.