¹ Luhanga lubi wa baya bene balihuhungila bihisho bya buubi, na ugila buubi u biingo byabo! Busugu bwa huya balihubigila, wa yulu ya uosha wa maboo mabo; ² Nabo balihubenja mabala, naumaguha; na madu byoka biya, nabo balihubiguha; nabo balihumonena mtu na ndu gyage, ehe,mtu na buhyana bwage. ³ Haho Mlume gwagana bino, Lingamina,nilihulangila ihisho ibii yulu ya ibushi ino, yine yamushiosha uhunya maoshi menyu, na mushigya wa mnenunana; bululi ii mengo mabii. ⁴ Mamo masugu biita mihingu yulu yenyu, na ulila wa malilo usumya mtima, na ugana, beswe batuchimya abisa; Gee gulihugalulanyaihichi ya batu banyi; Nahi byagapuminya iyo! Gwagabila babii mabala metu. ⁵ Wa bibyo hashibi namtu gwitela mgochi m'usobola wa sumbilo lya Mlume . ⁶ Mushibuwe, noo byabali hubuwa; bashibuwe bino bihisho; ubechiwa ushi huhwa . ⁷ Wi wii! Yiganywa ino inywa, gyenywe ndu gya Yakobo, Mtima gwa Mlume gwahungulwa? Wi wii!Bino ii bihisho byage? Wi wii! Binywa byanyi bishi humtolelecha guya mine gulihugya wa ulisacha? ⁸ Bino mano masugu mwaliginuna nahi tumangu twa batu banyi; mulihusapa bichibabo byine bili hegulu ha bichwalaganywa bya bahishi ba talala nahi batu bashihubenja bita . ⁹ Baachi ba batu banyi mwabatele hambuga ha madu mabo ma mabenju; baana babo ba tulela mwabasapa ugengeda wanyi milumbu. ¹⁰ Humwe muligile ; yulu hano ishi ihana ya ulitucha wenyu; yulu ya bunyenye mwihagwa, ehe, wa uhagwa wa wata abisa ¹¹ Mtu gabegya na mtima gwa lulimi, gabedogoma binywa bya lulimi,gabegana, niubuwila yulu ya byunywa na byuolwa; gugo mtu m'bi mbuwa gyabo babo batu. ¹² Winene niusumbicha, Ee Yakobo, benywe bose iyaka; Hashi mababu nibasumbicha baya bashigele ba Isilaeli; Nibabiya hamwechi nahi biya miyoo gya Bozla; Nahi ihicha ya miyoo hawingi ha ulishiwa wabo; Biita mmukulo nahi batu beengi; ¹³ Gubela gwahita hegulu hambele habo; Babele ihana, bahitila umchango, Batoboile hambuga uya; Oolo lyabo nalyo libangilwe lyahita, Nage Mlume gubangilwe hambele habo.