¹ lutufu lwa bubele lwa sabatu , bawenda halwela û mujyama , usamuna malasi gabagula. ² Basanga lye bwehelyali ibi ya ibelu ya mugumbu likatushubu. ³ Habasheela nda bamona nubili gwa Mwanana Yesu. ⁴ Bibageyua ye ng'handa, lola bandu babili bâbafumina , b'a na bilamba bitoa wamehe. ⁵ batiina, bahulu na yali mu mavu; Ila bâbasot'lwela: Njyayi mum'keba mu bafahi yoga guli buome? ⁶ Ndaliu hanu, ila gwa sangua. Muningi gwa muswahial bini, na hagwali û Galilaya , ⁷ na gwaboya: Yim'kebea mwana gwa mundu gwa lambulubu mu magaza ga babiha , na gwa sufubu, na usangua lutufu lya busatu. ⁸ Na baninga myoolo ya Yesu . ⁹ Habagalusha û mugumbu , bâbasahila bâ baumi na jimu ng'handa yooso yakila , na bâba booso bakum'ngh'hana. ¹⁰ Ba koola bê byoso û bamitwana gwali Malia Mandelena, Yuani muazi, Malia najyagi na Yakobo, na booso bali hamonga nabu. ¹¹ Nda bawitaba bâ bana-bâbaazi , na bamumona myoolo yabu yali paa ubanda. ¹² Ila Petelo gwawigoya, na wêlubilu û mugumbu.gwawil'mina , gwamona bupani bwa sandu mu mavu;Gwawenda wagi, na uhanua yeya yakila. ¹³ Na lola, lulola lutufu, Bamitwana babili bibawenda û jyaati yimu zina lyayu Emausi, ula na Yelusalemu lugendu lya bihindi bisatu bya yuba; ¹⁴ na bamwiyulila yooso yakila. ¹⁵ habamwiyulila na wiyihujyena, Yesu gwa bagoboela gwa sumua nabu hamonga mw'isinda. ¹⁶ Ila mesu gabu nda gazig'tila kumuyua. ¹⁷ Biogubihujya: Njyiayi imumwiyulila hamumwisumua, na muna bwazi? ¹⁸ Jimu gwabu, zina lyagi Kleopa, bigumulunga:Bebunga, gushigili ng'handa yatekea û Yelusalemu mu ganu matufu? ¹⁹ Njyiayi?Imum'boya. Na bamulunga:Yauv'gaya û mushu gwa Yesu gwa Nazaleti, gwali ng'hanga-bil;oto gwana buswata bwa biezegeli na myoolo uluebu lwa Vili na uluebu lya bandu booso, ²⁰ na bini bayui bâ Makuhani na bayenga betu bamulambula na umualila gwa fahi na bâ muhulia. ²¹ twam'kuugila nang'haha ni jehe gumwa wobula Izilaeli; ila hamonga na yiyi yooso, hujy'nena hanyuma ya matufu gasatu lola bindu bya kila. ²² Ni lugila bâbaazi ba wetu batuhanushawamehe; bawenda haluela û mujyama, ²³ na nda bamona mubili gwagi, bauv'gaya utusot'lwela nang'haha bamalaika bâbafumina na ubaswahila guni-pah. ²⁴ Bamu bali bali hamonga netu bawenda û mujyama , na bawamona byooso byakoola bâbaazi; Ila ndaumumona. ²⁵ Yesu bigubaswahila: Ô bandu gushi na mabtia,a tima linema kuwitaba yooso ya koolubu na bang'hanga-biloto ! ²⁶ Nda byakumbana nang'haha Klistu gwasuba, na usheelqa mubutumbu bwagi ? ²⁷ na gwabanga tangu Musa na bang'hanga-biloto booso, gwa bamonesha bisingi byooso bimumalola. ²⁸ Habat habwihi na jyaati y'i bamwenda , gwa keba ukila. ²⁹ Ila bamulolila , na uboya :Kaä netu, na butufu bufia , na yuba lihulua. Na gwa sheela û kaä hamonga nabu. ³⁰ Na habanyungila tabu hamonga nabu, gwa samua mukate; Na , hanyuma ya ufekusha na uhajya, gwatimuna ,na ubaha. ³¹ Na mesu gabu bigamona , na bamuyua ; ila gwazimina û mesu gabu. ³² Na bakoola jimu wa jingi: Tima lyetu nda lya temba munda mwetu, lolwa lu gwamukoola netu mwisinda na utuswahila bisingi? ³³ Bawimana mu yi ye ng'hunga , bagalusha û Yeluzalemu , na usangana umi na jimu, na bali hamonga nabu, ³⁴ na uboya : Mwnana walugila gusangua, na gwafumina Simoni. ³⁵ Na gwasahwila yooso yakila mu sinda , na twa muyua lugwatimuna mukate na ulyaha. ³⁶ Habakyia mwikoola yi ng'handa, jem'nindu gwafia hangati yabu, na uboya: Atalala-ndonga yakaï hamonga nenu! ³⁷ Bamona moyo na utina, baninga nang'haha bamona muuli. ³⁸ Ila gwabaswahila:Mum'tina ayi, nibininga mutina ayi bite mutima genu? ³⁹ Mundole magaza gami na magulu gami nyami; Mundejyene na mundole: Muuli nda î na mubili wala miufu, pana bimumona nabyu. ⁴⁰ na hogwaboya Yeya : gwabamonesha magaza na magulu gagi. ⁴¹ Bêbya biba na musangu, nda bawitabeu, bahanua, bigubihujya? ⁴² Bamuhanha ihindi ya Misiya ibwangi na manghani ga bui. ⁴³ Gwa tambula na ulyaha uluebu lwabu. ⁴⁴ na bigubswahila: Yiyi yinyaibaswahila hanibyali hamonga nenu, yali buose yatekee ye yooso yasingubu ukila mimi mu misweela ya Musa, û Bang'hanga-Biloto, na nyimbu. ⁴⁵ Gwabatotola matima, niuboya bahujyinene bisingi. ⁴⁶ Na biguboya: Honga yasingubu nang'haha Klistu gum'suba, na gumwasangua û bafahi lutufu lwa busatu, ⁴⁷ na ng'handa ya lusa na wifilena bin'sonya û bubiha yimwasahulubu wazina lyami mu bisamba byooso, na ubanga û Yelusalemu. ⁴⁸ Muli bashuula bâ ying'handa. ⁴⁹ Mumone, nimwabatumina ulwegulu yenu yeya Tutu yigwa balanga; ila banu, musagali muibalu biata vuuhamuv'bavalisha buswata bwa higulu. ⁵⁰ Gwa wenda nabu û Betaniya , na bigutundula magaza bigubafiegula. ⁵¹ Hagwajila , gwa wileena nabui, na gwa banda higulu. ⁵² Na boho, hanyuma ya umunemea, bagalusha û Yelusalemu hamonga na musangu guata. ⁵³ naq matufugooso bali mu yende ya Vili nyambi û meesiula na mufigula Vili Nyambi.