¹ Mbuse e sambo djaho, iokali moli mwesi etetelake nda moli e ngbii e wikelamu wa likolo, wokoasaka ate, '' Alleluia! okalesani, otwa, koto okulu edje atie Mwengei. ² Laate wisambeselo wande widjei meemene koto wilamu, laate amosambesi inde moli ondumba ongo obitesali mbume la ondumba wonde, awongoselia ewo e moli oho obe la makila ma tuke djande.'' ³ Wasia mbala ewale: ''Alleluia! Milungu mande mikotelaka libela la libela.'' ⁴ Mbange tuku iwale la inei la wikelamu winge widjei la mokalo inei wamosembelia Mwengei ongo oyabati la ngbelengo e okumu, waasia ate, ''Amen. Alleluia!'' ⁵ Moli mwesi mopumbali la ngbelengo e okumu, moasali ate, ''Modombani Mwengei osu ino kpaa tuke djande ino wango wakomowangaka, wana la wiloko wato.'' ⁶ Iokali moli mwesi enge edjaki nda moli e ngbii e wikelamu koto nda modudu e malia masungu enge ekohumbaka la otetelake, koto nda ogbami wo ngombe, easia ate, ''Alleluia! Laate Likumu, Mwengei osu Mokondji e okulu kpaa, abatia okumu onde. ⁷ Toemeleni koto todje la mwemu, tomohe koto otwa, laate elambo e mana o meme eumia, koto moli onde ayawongeli. ⁸ Amohekelia esindje enge ekongengeke, la ongengi wungo wolamu, esindje eho elamu edjei tomo ndamu ma wasantu. ⁹ Ahumbwa andjaselia mbai ate, ''Dhinga: Mwemu la wato wango wawelani la ilaka e liwala e Mana o meme.'' Aewesali mbai alidji ate, ''Ehenge edjei engbundu e meemene e Mwengei.'' ¹⁰ Ikwia la makolo mande laate iyakonge la inde, aasia la mbai ate, ''Otiakonge la mbai! Idjei mangwa o wotomo, koto motuke mo wamangwa wango wadjei la otomo e ototoli Yesu. Yakonga la Mwengei laate witiesakoli wihekelani nde la omototoli Yesu.'' ¹¹ Yenia koto likolo liluhuania, yenia punda e langi bubake. Ongo oyabatakali likolo la punda kombo ende omeemene koto olamu, akosambesaka akosanaka koto wita la oyengebene. ¹² Maiso mande madjali nda misa, la moto monde wilembo ngbii, adjeiaka koto la nkombo esi ekomiaka iwo moto tweti atiewakali nkombo eho, ndi inde amene. ¹³ Akpaliaka esindje edjeiaka la makila, kombo ende engbundu e Mwengei. ¹⁴ Wasoda wango wadjei ongo likolo wamotutiakali likolo la punda bubake, wakpali isindje wibubake. ¹⁵ La monoko monde ewuni ewotake epumbakali, laate abinge la eho miki, akowasombesa la pimbo e ebende. Akohotoko koto pukapuka la eboteli e bino e limemu e Mwengei Mokondji e okulu kpaa. ¹⁶ La esindje ende la ebelo ende wadhingali kombo: Likumu e makumu, engali e waengali.'' ¹⁷ Imoenali ahumbwa ayamali ongo la liwusa wuse, apamali la moli motetelake, aasali la mbulu kpaa ikohumbwaka ndondo e likolo ate, ''Djakani ahala, gbotononi la yenga esungu enge ekeli Mwengei. ¹⁸ Laate olakeni ndjini dja makumu, la ndjini dja makumu ma wasoda koto la ndjini dja wato kpaa, tuke, wato wakeke wakeke la wango wasungu wasungu.'' ¹⁹ Yenia koto mbau mbe, koto la makumu ma mbume, la wasoda wawu wayaboleiya laate wasane wita la ongo oyabatali likolo la punda la wasoda wande. ²⁰ Mbau mbe ehelanali mongndji la motiesakoli o moleho, ongo okelakali liwoso lande wikamwiseli winge indjimesakali inde wango watotali elembo e mbau mbe la wango wayakongoli la elima eho, wawalumbali iwo kpaa la misa minge mikololaka la supulu. ²¹ Wango weti wagwia la ewuni enge epumbakali la monoko mo ongo oyabatakali likolo la punda, mbulu kpaa wigbetia la ndjini djau.