¹ Elembo eesi esungu epumbia ongo likolo: Moli mwesi okpali liwusa wuse, ndebo edjaaki sese e makolo mande, lingboka eesi e minoto liomu la iwale la moto monde. ² Adjakali la leni, adjaaki opami la ekoni koto la otomo e wotake. ³ Eeti elembo koto eenenia ongo likolo: Dhenga! Dalagona mwesi mosungu enani ngbaa, adjei la mito sambo koto la ndjeka liomu koto la mangboka sambo la mito mande. ⁴ Mokondo monde mogulaka eesi e ndambo e isato e minoto dja likolo, koto adjilumbia ono sese. Dalagona ayamalali liwoso la moli oho ongo obalali owoti, laate ango ekowota inde, emolake. ⁵ Awotali mana, mana opele, ongo okosombesa maliye kpaa la pimbo e ebende. Mana onde akpalanali ongo likolo atie Mwengei koto ongo la ngbelengo e okumu wonde. ⁶ Moli oho atilali ongo la esobe, la ebete enge emowongeselali Mwengei, laate wamolakese ongo masio koto esi la kama iwale la tuku motoba. ⁷ Wita wimaya ongo likolo. Mikaeli la waahumbwa wande wamaiya wita la Dalagona, koto Dalagona la waahumbwa wande wasanali. ⁸ Ase Dalagona atidjaali la okulu. Watidjali kine la ebete ongo likolo. ⁹ Dalagona eho mosungu alumbanali sese-inde ndjo e ebende, enge emoweli iwo Djabulu koto Etota, ongo okokosaka mbume kpaa ebete eyabati wato, alumbania la mbume, koto waahumbwa wande walumbania la mbume mongindji la inde. ¹⁰ Iokali ongo likolo moli mopamake mokoasaka ate: ''Sikandjo mokalo, motogbotia, koto okulu, la okumu e Mwengei osu, la okumu o Kilisito onde edji, laate mopundi o wamangbasu alumbani la mbume, inde moto okopundaka wamangbasu likolo la wuse liwoso la Mwengei osu. ¹¹ Wamolongali la kole e makila ma mana o meme koto la kole e engbundu e litotoli lawu, watibalali koto milimo mau odjangi owangi logo. ¹² Eho lenge, eengi la ino oemeli, likolo, koto ino wango wakoyabataka likolo, magba la mbume koto la ewale, laate Etota eyadjimbeli ino, adjei la limemu litetelake, laate ayewi ate adjei la engele keke! ¹³ Ango enia dalagona ate alumbani la mbume, emoenesali moli ongo omowotali mana opele odjidji. ¹⁴ Wamohali moli oho mambulu maale e ndjio mosungu laate ahumbwe la esobe tee la ebete ende, ongo omolakesali iwo la oumoyi e engele eesi koto la miengele lihele e mbanda e ndjo eho. ¹⁵ Ndjo eho etoholali malia nda ewale la monoko monde mbuse e moli oho, laate emolindese la wale eho. ¹⁶ Ase mbume emogamesali moli, koto mbuse iluholali monoko muho emelia malia ma ewale mango matoholali ndjo la monoko monde. ¹⁷ Dalagona amemelali la moli oho, koto akeeli omai wita la litoto e moli oho wango watikalali, wango wakotemeiyaka tomani dja Mwengei, koto wadjei la otomo e ototoli la kole e Yesu. ¹⁸ Ayamali likolo la ngene e ewale.