¹ Ehele edjei eeneseli e Yesu Kilisityo enge Mwengei amohali inde la oenesi tuke djande sambo djinnge iengali okelani mbuse e ma engele keke. Amotomali ahumbwa onde, koto la mboka ende aenesali eho la wilembo atie motuke monde Yoani, ² ongo ototololi la kole e engbundu enge Mwengei ahali koto la kole e litotoli linge lihali Yesu Kilisito, la sambo djinge kpaa ieneli inde. ³ Mwemu la moto ongo okotangaka la moli mo pamake koto la ongo okookaka sambo e ehele Buku e sakweli, koto la ongo okotemeiyaka sambo djinge idhingani ndondo, laate engele enge ebatana eumia ahue. ⁴ Yoani atie e masambo sambo mango madjei la moki mo Azia: Ngolu la logoo edje la ino enge elongoyi atie ongo odjei koto ongo odjaakate, koto ongo ogeleli, atie milimo sambo minge midjei liwoso la ngbelengo ende e okumu, ⁵ koto la Yesu Kilisito mototoli mo meemene, Mana o poo koto moto o poo ongo obasali, koto likumu e okumu wo mbume. Inde ongo otobali koto otolongosi iso ndondo e masumu masu la makila mande ⁶ inde ongo otoumesi iso makumu, wanganga-Mwengei la kole e Mwengei onde koto Sango inde Yesu adje la otwa libela la libela. Amen. ⁷ Dhenga, ageleli ongo la mapata, liso kpaa likomoene, te wango wamoolali, la wango wamomaali likonga, maliye kpaa dja mbume wakoyabanya la odjidji la kole ende. Ndjongo. Amen. ⁸ Likumu Mwengei aasia ate, ''Idjei Alapa koto Omega,'' ongo odjéi, ongo adjaakali koto ongo okodjaa, Mokondji e okulu kpaa. ⁹ Mbai, Yoani magbanu ndondo e odjidji la okumu la okandi motema mongindji la ino ebete eikima la Yesu. Wakpalali mbai la esi enge eweli iwo patimosi la kole e engbundu e Mwengei la omototoli Yesu. ¹⁰ Itotanali la elimo wuse e Likumu iokali mbuse e mbai moli motetelake nda kelelo. ¹¹ Mokoasaka ate ''Djinge sambo ikoeneke owe dhinga djaho la buku koto toma djaho ndondo e masambo sambo-ongo la Epeso ,Sumuluna, Pelagame Tiatila,la Salada,Piladelepia koto Laodikia.'' ¹² Iyakalambali la oewi nda moli mungo modjaakali oaseli mbai. Mbuse e mbai oyakalambi ienia yaamalelo e matambe sambo ma wolo. ¹³ la odja e yamaaleselo wa matambe sambo ma wolo imoenia moto mwesi ongo okuani la Mana o Moto akpali lobe, ayanangi litambala e wolo la mokpoto. ¹⁴ Moto monde to sue djande idjaali buluu nda mapata mabubake-maiso mande nda ligbagba e misa. ¹⁵ Ihoteli wande nda motako molangake engele ekokalaka eho ndondo e ligbagba e misa, moli monde nda modudu mo malia masungu makohumbaka. ¹⁶ La ewo ende e lilome aiki Minoto sambo, adjaaki opumbesi kpoka enge ewoti wiati kpaa la monoko monde, mbanda ende ekobataka nda wuse. ¹⁷ Ango emoenia mbai, ikpia la makolo mande nda moto mogbaake. Abatelia mbai ewo ende e lilome la oasi ate, ''Otiwange. Idjei moto o poo koto o gboo ¹⁸ moto o mokalo, igbali dhenga idjei la mokalo la masio madjangi gbo. Iyiki mapungola ma logo e mbila. ¹⁹ Dhinga djinge sambo ieni owe djinge idjei koto djinge ikouma mbuse. ²⁰ Maisani dja minoto sambo minge mieni owe ma ewo ende e lilome koto wiyamaleselo wa matambe sambo ma wolo: Minoto Sambo milimboli nda tuke djande Sambo ndondo e masambo saambo koto wiyamaleselo wa matambe sambo einei mangomba Sambo.''