¹ La enge engele ndjongo, Yowani mopatesi apumbali pe apotali otiesakoli ongo a manganga e yudeya. ² Aasali ate: kukolani mitema manu, la loyi ate okumu o Mwengei ewumika ahue. ³ Yowani adjei moto ongo okpomali mosakoli Izaya la tina eende ate: edjei mooli mo moto ongo akopamaka la manganga: wongeleni mboka e likumu, atani mboka edje ngbai. ⁴ Yowani adjali okpali esinje enge edjakali la kunja e kamela pe mokaba mo ekombaka e nama alibele lande. Adjakali olaki waapepe la woi emotulu. ⁵ Wato wa yelusalema,la wango wa yudeya kpaa la wango wa yolodane kpaa wa djakali oki atie inde. ⁶ Wayewali la hoho masumu mahu, wabatisamali la inde la maliya ma yolodani. ⁷ Ango eenia inde Wafalizeyo la wa sadukayo wa kodjaka atie inde ate wa batisame, awaaseliya: liwota la ndjo, ndayi oosumini ate otileni limemu linge likodjaka? ⁸ Ndjongo kelani sambo djinge ikoyenese ate okukoligani mitema. ⁹ Otiaseni ino amene: Abalayama adjei sangbasu. La ndenge eho, iyowaselini ate maamabukeli Mwengei akoki omawumesi wana wa Abalayama. ¹⁰ Wabatika engboma la lidjo dja mite; motekpaa mungo mowoti pukapuka ndamu ekotenama aleeti ekolumbama la misa. ¹¹ Mbayi, ikobatisaka la maliya la tina e okukoli mitema, kasi ongo okodja mbuse e mbayi aeti mbayi la okulu pe ikokiti otokoli moliki mo ikpokpo eende, inde akoobatisani la elimu esatu pe la misa, ¹² A djei la lungu ende la ewoo; akowongele ebete ende etangake opunga, akoisa pukapuka, akolumba pulu amisa mitilimanaka. ¹³ Ndjongo Yesu alongwali a galileya, akeli la yolodani atie Yowani, aloyi ate Yowani amopatese, ¹⁴ kasi Yowani atonali ase aasiya ate: mbai moto ikoki odji atie owe ate opatese mbai, owe odji atie mbai nda ndenge? ¹⁵ Yesu amowongweselali ate: otitone, ewongi la iso ate tokokese sambo kpaa dja osembo, ase Yowani agemiali. ¹⁶ Mbuse e obatisami, Yesu apumali a maliya. denga likolo lihanali ngbai ase elimo e Mwengei e moyadjimbelali nda eluwa edjia ngambo ende. ¹⁷ Denda, moli molongwali la likolo mwaasali dji sambo: oholo adjei mana o mbai olibalano, ongo omobali mbai.